ពលរដ្ឋជាង៤០គ្រួសារស្នើសុំអាជ្ញាធរខេត្តសៀមរាបអោយបើកផ្លូវ១ខ្សែរ

ខ្ញុំបាទ ផ្លុងរ៉េត ចាងហ្វាងកាសែតកម្ពុជាសុវណ្ណភូមិ សូមរាយការណ៍ជូនសម្ដេចទ្រង់ឯកឧត្តម មន្ត្រីរាជការសាធារណៈ ជាពិសេសអាជ្ញាធរខេត្តសៀមរាប និងស្ថាប័នពាក់ព័ន្ធទាំងអស់ អោយបានជ្រាបថា " ផ្លូវមួយខ្សែតាមមាត់ត្រពាំងខ្នារខាងជើងធ្លុះពីកើតមកលិចចំផ្សារខ្នារ ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប ត្រូវបានអាជីវករធ្វើផ្សារបិតផ្លូវ រួចរាល់ជាស្ថាពរហើយ បើទោះជាលោក នួន ពុទ្ធារ៉ា អភិបាលក្រុងធ្លាប់ចុះទៅណែនាំហើយក៏ដោយ" ។

ប្រជាពលរដ្ឋរស់ក្នុងភូមិខ្នារ សង្កាត់ជ្រាវជាង៤០ គ្រួសារ បានផ្តិតមេដៃដាក់ពាក្យបណ្ដឹងទៅសាលាខេត្តសៀមរាប សុំឲ្យអាជ្ញាធរខេត្តទប់ស្កាត់សំណង់ខុសច្បាប់ខាងលើ តែមកដល់ថ្ងៃនេះហាក់គ្មានពន្លឺរស្មីអ្វីទាល់តែសោះ ជាហេតុធ្វើឲ្យប្រជាពលរដ្ឋទាំងនោះ ហាក់មានការអស់សង្ឃឹមទៅលើចំណាត់ការរបស់អាជ្ញាធរ និងមន្ត្រីពាក់ព័ន្ធគ្រប់ជាន់ថ្នាក់។

ពលរដ្ឋនៅក្នុងភូមិខ្នារចោទសួរជាសំនួរថា តើប្រទេសកម្ពុជានៅមានច្បាប់ទម្លាប់ដែរឬទេ? បើនៅតែបណ្ដោយឲ្យពលរដ្ឋចេះតែធ្វើអ្វីតាមតែអំពើចិត្តយ៉ាងដូច្នេះ នោះថ្ងៃអនាគតច្បាស់ជាមានភាពអនាធិបតេយ្យជាមិនខាន។

ពលរដ្ឋជាង៤០គ្រួសារដែលបានផ្តិតមេដៃសុំបើកផ្លូវមួយខ្សែនេះ បានសុំអង្វរយ៉ាងទទូចទៅអាជ្ញាធរខេត្ត-ក្រុង និងស្ថាប័នពាក់ព័ន្ធ មេត្តាបើកផ្លូវមួយខ្សែនេះតាមគម្រោងប្លង់របស់រដ្ឋ ជូនពួកគាត់បានធ្វើដំណើរឆ្លងកាត់ផង៕ ដោយ:ផ្លុងរ៉េត