លោក ទីសុគន្ធ​ បើកឡាន​​បុក​បុរស​ម្នាក់​បាក់​ជើង​ម្ខាង

ឧបទ្ទវហេតុ​គ្រោះថ្នាក់ ចរាចរណ៍​មួយ​បានកើត​ឡើង ដែល​បង្កដោយ លោក ទី សុគន្ធ អនុរដ្ឋលេខាធិការ​ក្រសួងកសិកម្ម​រុក្ខាប្រមាញ់ និង​នេសាទ​បណ្តាល​ឲ្យ​បុរស​ម្នាក់​រងរបួស​បាក់ជើង​ឆ្វេង​។ ហេតុការណ៍​នេះ បានកើត​ឡើង កាលពី​វេលា ម៉ោង​១​និង​២០​នាទី រសៀល​ថ្ងៃទី​២៤ កុម្ភៈ ឆ្នាំ​២០១៣ នៅតាម បណ្តោយ​ផ្លូវ អា​៩ កែង​ផ្លូវ​២១​បេ​ស្ថិតក្នុង ភូមិ​ព្រែក​សំរោង សង្កាត់​តាខ្មៅ ក្រុង​តាខ្មៅ ខេត្តកណ្តាល​។​

​បើតាម​ប្រភពព័ត៌មាន ពី​សមត្ថកិច្ច មូលដ្ឋាន បាន​ឲ្យ​ដឹងថា នៅវេលា​ម៉ោង កើតហេតុ លោក ទី សុគន្ធ បាន​បើករថយន្ត​ម៉ាក ឡង់​រ៉ូ​វែ ក្នុងទិសដៅ ពី​ជើង​ទៅ​ត្បូង តាម​បណ្តោយ ផ្លូវ​២១​បេ លុះ​មកដល់​ចំណុច កើតហេតុ ខណៈ​ជនរងគ្រោះ កំពុងតែ​បើក​ម៉ូតូ តាម​បណ្តោយ​ផ្លូវ អា​៩ ក្នុងទិសដៅ ពី​កើ​តទៅ​លិច ក៏​បុក​គ្នា មួយ​ទំហឹង បណ្តាល​ឲ្យ ជនរងគ្រោះ ដួល​ម៉ូតូ ហើយ​បាក់​ជើងឆ្វេង​តែម្តងទៅ​។ ក្រោយ​កើតហេតុ គេ​បានឃើញ សមត្ថកិច្ច មូលដ្ឋាន និង​មន្ត្រីនគរបាល ចរាចរណ៍​ជើងគោក ចុះទៅ​វាស់វែង នៅ​កន្លែងកើតហេតុ តែដោយសារ តែ​ឃើញ អ្នកបើករថយន្ត​ជា​មន្ត្រី​ថ្នាក់​ធំ​នៅ​ក្រសួងកសិកម្ម​នោះ​សមត្ថកិច្ច​បានត្រឹមតែ​ធ្វើការ​សម្របសម្រួល​ប៉ុណ្ណោះ​។​

​គេ​មិនទាន់​ដឹងថា ការចរចា​សម្របសម្រួល​នោះ លោក ទី សុគន្ធ ចេញ​លុយ​ថ្លៃ​ព្យាបាល ជូន​ជនរងគ្រោះ​ដែរ​ឬ​យ៉ាងណា​នោះទេ ។ ប៉ុន្តែ​សម្រាប់​ប្រជាពលរដ្ឋ មួយចំនួន ដែល​ឃើញ​ហេតុការណ៍ នេះ បាននាំគ្នា​និយាយថា បើសិនជា​ម្ចាស់​រថយន្ត ជា​អ្នក​គ្មាន បុណ្យស័ក្តិ និង​អំណាច នៅក្នុង​សង្គម​នោះ ច្បាស់​ជា​សមត្ថកិច្ច​កសាង​សំណុំរឿង​បញ្ជូន ទៅ​តុលាការ បាត់​ហើយ តែដោយសារ​តែ ម្ចាស់​រថយន្ត ជា​មន្ត្រីជាន់ខ្ពស់ បែបនេះ ទើប​សមត្ថកិច្ច គ្រាន់តែ​ធ្វើ របាយការណ៍​ទុក​ជូន​មេ និង​សម្របសម្រួល​តែប៉ុណ្ណោះ​៕​ប្រភពពី ខ្មែរ៧មករា