គណបក្ស​ប្រជាជន​កម្ពុជា​ប្រារព្ធ​ខួប​ជ័យ​ជម្នះ ៧មករា

គណបក្ស​ប្រជាជន​កម្ពុជា ដែល​ជា​គណបក្ស​កាន់​អំណាច បាន​ប្រារព្ធ​មី​ទ្ទិញ​រំឭក​ខួប​លើក​ទី​៣៤ នៃ​ទិវា​ជ័យ​ជម្នះ ថ្ងៃ​៧​មករា​ដែល​បាន​រំដោះ​ប្រទេស​កម្ពុជា​ចេញ​ពី​របប​ប្រល័យ​ពូជសាសន៍​ប៉ុល ​ពត នា​ព្រឹក​ថ្ងៃ​ចន្ទ ទី​៧ ខែ​មករានេះ និងបាន​លើក​បង្ហាញ​ពី​សមិទ្ធផល​ផ្សេងៗ ដែល​គណបក្ស​ខ្លួន​បាន​ដឹក​នាំ​កន្លង​មក។

លោក ហេង សំរិន ប្រធានកិត្តិយស​នៃ​គណបក្ស​ប្រជាជន​កម្ពុជា​និង​ជា ប្រធាន​រដ្ឋសភាជាតិ បាន​លើក​ឡើង​ថា ជ័យ​ជម្នះ៧​មករា បាន​នាំមក​នូវ​សិទ្ធិ​ជា​សារ​វន្ត​បំផុត​របស់​មនុស្ស​មក​ជូន​ប្រជាជន គឺ​សិទ្ធិ​មានជីវិត​រស់នៅ ហើយ​ផ្តើម​ចេ​ញពី​សិទ្ធិ​ជា​សារវន្ត​នេះហើយ ដែល​មាន​សិទ្ធិ​ទទួលបាន​ចំណីអាហារ ទទួលបាន​ការអប់រំ ទទួលបាន​ការព្យាបាល សិទ្ធិ​បញ្ចេ​ញ​មតិ សិទ្ធិ​បង្កើត​គណបក្ស បង្កើត​អង្គការ និង​សមាគម​នានា​៘

លោកបាន​បន្ថែមថា គណបក្ស​ប្រជាជន​កម្ពុជា បន្ត​ជំរុញ​រាល់​សកម្មភាព​ដើម្បី​ការពារ លើក​កម្ពស់​លទ្ធិ​ប្រជាធិប​តេយ្យ និង​ការគោរព​សិទ្ធិមនុស្ស​នៅក្នុង​បរិការណ៍នៃ​កម្ពុជា​ឱ្យបាន​កាន់តែ​ប្រសើរ ​ឡើង​ជានិច្ច។

លោក ហេង សំរិន បាន​គូសបញ្ជាក់ថា « ជាមួយនឹង​ ភាពអនុគ្រោះ​ទាំងនេះ ក្នុង​រយៈពេល ៥​ឆ្នាំ​ចុង​ក្រោយ​នេះ កម្ពុជា​បាន​ធ្វើឱ្យ​សម្រេច​ជោគជ័យ​លើ​គ្រប់​វិស័យ​ទាំង​ខាង​នយោបាយ សេដ្ឋកិច្ច សង្គមកិច្ច វប្បធម៌ និង​ការបរទេស​នៅក្នុង​ដំណើរ​អភិវឌ្ឍន៍​របស់​ខ្លួន​។ កម្ពុជា​រក្សាបាន​នូវ​ស្ថិរភាព​នយោបាយ ស្ថិរភាព​សង្គម ស្ថិរភាព​ម៉ាក្រូសេដ្ឋកិច្ច ស្ថិរភាព​ហិរញ្ញវត្ថុ ការពារ​បាន​រឹងមាំ​នូវ​អធិបតេយ្យ បូរណភាព​ទឹកដី សន្តិសុខ និង​សុវត្ថិភាព​សង្គម នៅក្នុងពេល និង​ក្រោយពេល មាន​វិបត្តិ​សេដ្ឋកិច្ច និង​ហិរញ្ញវត្ថុ​សកលលោក ព្រមទាំង​វិបត្តិ​ព្រំដែន​កម្ពុជា​-​ថៃ និង​គ្រោះ​ទឹកជំនន់»៕