កាត់ទោស​ក្រឡាបញ្ជី​បន្ទាយមានជ័យ​ម្នាក់ និង​ពាណិជ្ជករ​២​នាក់ ពីបទ​ប្រព្រឹត្ត​អំពើពុករលួយ​

អតីត​ក្រឡាបញ្ជី​តុលាការខេត្ត​បន្ទាយមានជ័យ​ម្នាក់ និង​អតីត​ពាណិជ្ជករ​២​នាក់ ត្រូវបាន​សាលាដំបូង​រាជធានី​ភ្នំពេញ កាលពី​ថ្ងៃទី​១៨ ខែមីនា ឆ្នាំ​២០១៤ លើកយក​សំណុំរឿង ប្រព្រឹត្ត​អំពើពុករលួយ​មក​បើកសវនាការ​ជំនុំជម្រះ​។ ប៉ុន្តែ​ក្រោយ​ការសួរដេញដោល​រហូត​ដល់​ម៉ោង​ជិត​៧​យប់ តុលាការ​បាន​លើក​ពេល​ប្រកាស​សាលក្រម​សំណុំ​រឿងនេះ​ទៅ​ថ្ងៃទី​២៦ ខែមីនា​ខាងមុខនេះ​វិញ​។​

ជនជាប់ចោទ​មានឈ្មោះ សួង សុខ​ហេង ភេទ​ប្រុស អាយុ​២៨​ឆ្នាំ ជា​អតីត​ក្រឡាបញ្ជី​តុលាការ ខេត្តបន្ទាយមានជ័យ ឈ្មោះ សេម សុខា ភេទ​ស្រី អាយុ​៤២​ឆ្នាំ ជា​អ្នកលក់​រថយន្ត និង​ឈ្មោះ អ៊ួ​យ សុភាព ភេទ​ប្រុស អាយុ​៦៩​ឆ្នាំ ជា​ពាណិជ្ជករ​។ ជនសង្ស័យ​ទាំង ៣​នាក់​នេះ ត្រូវបាន​អង្គភាព​ប្រឆាំង​ពុករលួយ​ឃាត់ខ្លួន​កាលពី​ខែតុលា ឆ្នាំ​២០១៣ យោងតាម​ពាក្យបណ្តឹង​របស់​ជនរ​ង​គ្រោះ​។​

ជនជាប់ចោទ​ត្រូវបាន​តុលាការ​ចោទប្រកាន់​តាម​មាត្រា​៥៩៤ នៃ​ក្រមព្រហ្មទណ្ឌ និង​មាត្រា​៣៥ នៃ​ច្បាប់​ស្តីពី​ការប្រឆាំង​អំពើពុករលួយ ដែល​អាច​ប្រឈមមុខ​នឹង​ការជាប់​ពន្ធនាគារ​ពី​៧​ឆ្នាំ ទៅ​១៥​ឆ្នាំ​។​ ជាការ​កត់សម្គាល់ សវនាការ​នៅ​ថ្ងៃទី​១៨ ខែមីនា គឺមាន​ការចូលរួម​ពី​លោក សួស សំអាត ជា​ប្រធាន​ក្រុមប្រឹក្សា​ជំនុំជម្រះ​សាក្សី​មួយចំនួន ព្រមទាំង​មន្ត្រី​អង្គភាព​ប្រឆាំង​អំពើពុករលួយ​២​នាក់​ផងដែរ​។

ទោះបីយ៉ាងណា ក្រោយ​ការសួរដេញដោល តុលាការ​បាន​លើក​ពេល​ប្រកាស​សាលក្រម​ទៅ​ថ្ងៃទី​២៦ ខែមីនា ឆ្នាំ​២០១៤​ខាងមុខនេះ​វិញ​។ ពាក់ព័ន្ធ​សំណុំ​រឿងនេះ ពុំមាន​ប្រភព​ណាមួយ​បានបញ្ជាក់​ឲ្យ​ដឹង​ជា​ផ្លូវការ​នោះទេ​។​ មជ្ឈដ្ឋាន​មួយចំនួន​កំពុង​ទន្ទឹងរង់ចាំ​មើល​ថា តើ​ជោគវាសនា​របស់​ជនជាប់ចោទ​ទាំង ៣​នាក់ ដែល​បាន​ប្រព្រឹត្ត​អំពើពុករលួយ​នេះ នឹង​ទៅជា​យ៉ាងណា​នៅ​ថ្ងៃ​ប្រកាស​សាលក្រម​ខាងមុខនេះ​៕​ ប្រភពពីអង្គរថែម