ក្រុមឈ្មួញបានឃុបឃិតគ្នាជាមួយសមត្ថកិច្ចតាមព្រំដែន នាំចូលម៉ូតូគេចពន្ធពីប្រទេសថៃចូលមកប្រទេសកម្ពុជា តាមច្រករបៀង ពីមួយថ្ងៃទៅមួយថ្ងៃ មានការនាំ ចូលម៉ូតូគេចពន្ធទាំងនោះ មិនតិចជាង១០០គ្រឿងឡើយ ក្នុងខេត្តបន្ទាយមានជ័យ ដែលមុខរបរនេះ មានភាពរលូន និងសុខសាន្តបានរាប់ឆ្នាំទៅហើយនោះ គឺដោយសារ ការបើកភ្លើងខៀវពីសមត្ថកិច្ច បើទោះបីជាពួកគេដឹងថា សកម្មភាពនេះវាបានធ្វើឲ្យបាត់ចំណូលជាតិក្នុងមួយឆ្នាំៗរាប់សិបលានដុល្លាក៏ដោយ ក៏អស់លោក សមត្ថកិច្ច តាមព្រំដែនគ្មានការបង្ក្រាបទាល់តែសោះ តែបែរជាលួចឃុបឃិតជាមួយក្រុមឈ្មួញទៅវិញ ព្រោះមុខរបរនេះវាជាឆ្នាំងបានរបស់សមត្ថកិច្ចទាំងនោះ។
យោងតាមសេចក្តីរាយការណ៍ពីប្រជាពលរដ្ឋកាលពីថ្ងៃទី៧ ខែតុលា ឆ្នាំ២០១៤បានអោយដឹងថា ម៉ូតូសេរីថ្មី ដូចជាប្រភេទអូតូស្គូបពី ឃ្លីក អ៊ែប្លែក អាយខន ស៊ូមឺអិច វេវ ស៊ីប៊ីអរ ជាច្រើនគ្រឿងត្រូវបានឈ្មួញឃុបឃិតជាមួយសមត្ថកិច្ច ឈរជើងតាមបន្ទាត់ព្រំដែន និង ប៉ូលិសសេដ្ឋកិច្ច ប៉េអឹម គយប្រចាំខេត្ត និងគយក្រសួង នាំឆ្លងព្រំដែន កម្ពុជា-ថៃ បានយ៉ាងរលូន ពីព្រំដែនរហូតដល់ទីរួមខេត្តបន្ទាយមានជ័យ និងបន្តដឹកតាមរថយន្ត ជាចំហរ និងលួចលាក់នាំទៅកាន់រាជធានីភ្នំពេញ ក្នុងមួយគ្រឿងត្រូវចំណាយយ៉ាងតិច១៥០ទៅ២០០ដុល្លារបង់ប្រាក់ក្រោមតុជូន សមត្ថកិច្ចខាងលើបន្ទាប់ពីម៉ូតូឆ្លងផុតព្រំដែន បើមិនស៊ីសស៊ុះជាមួយសមត្ថកិច្ចទាំងនេះ ច្បាស់ជាត្រូវគេ ដេញចាប់ប្រផាប់ប្រភីង ដូចដេញចាប់ចោរអីចឹង។
ការនាំចូលម៉ូតូគេចពន្ធ ទាំងនេះភាគច្រើន ត្រូវបានឈ្មួញនាំចូលតាមច្រករបៀង ក្នុងស្រុកម៉ាឡៃ ដែលគ្រប់គ្រងដោយទាហ៊ានសឹករង ប៉ូលិសការពារព្រំដែន៨១៥ និង៨៩១ និងច្រករបៀងជាច្រើន ដូចជា ច្រកអូរបីជាន់ ក្នុងស្រុកស្វាយចេក ច្រករបៀង ក្នុងស្រុកថ្មពួក ក្រោមការគ្រប់របស់កម្លាំងយោធាសឹករងខេត្ត និង កម្លាំងនគរបាលការពារព្រំដែនគោក៨០៧ ដែលមានលោក ប្រាក់ សាំ ជាមេបញ្ជាការ ។ក្នុងនោះគេបានឃើញនគរបាលប្រឆាំងបទល្មើសសេដ្ឋកិច្ចខេត្តកូនចៅលោក ចាប់ សុផារឹទ្ធ និងនគរ បាលប្រឆាំងបទល្មើសសេដ្ឋកិច្ចក្រសួង កូនចៅលោក ហុក ចិត្រាបានពង្រាយគ្នាដូចខ្យង និងក្រុមបើក រថយន្តប្រដេញលើផ្លូវជាតិ ចាំយកប្រាក់ពីឈ្មួញនាំចូលម៉ូតូគេចពន្ធផងដែរ។
មួយរយៈនេះ គេសង្គេតឃើញច្រករបៀងខុសច្បាប់ ដែលមានប្រជាប្រិយភាពនាំចូលម៉ូតូគេចពន្ធខ្លាំង ជាងគេគឺច្រករបៀងបឹងបេង ច្រករបៀងខ្លាំងាប់ ច្រករបៀងកោះស្នួល ដែលច្រកទាំងនេះស្ថិតក្រោមការ គ្រប់គ្រងរបស់កម្លាំងយោធាសឹករង ស្រុកម៉ាឡៃ មានលោក អ៊ុក ដារ៉ាន់ ជាមេបញ្ជា្កការ និងកម្លាំងនគរ បាលការពារព្រំដែនគោក៨១៥ មានលោក ឈិត លី ជាមេបញ្ជាការ។
គួរបញ្ជាក់ថា កាលពីថ្ងៃទី២ ខែតុលា ឆ្នាំ២០១៤ កន្លងទៅ លោកឧត្តមសេនីយ៍ ខេង សុមេត អគ្គស្នង ការរងនគរបាលជាតិ និងលោក គោស៊ុំ សារឿត អភិបាលខេត្តបន្ទាយមានជ័យ បានព្រមានយ៉ាងធ្ងន់ៗ ចំពោះសមត្ថកិច្ចនៅតាមព្រំដែន រួមមាន នគរបាល យោធា និងប៉េអឹម ត្រូវបញ្ឈប់ជាបន្ទាន់ចំពោះការ បើកឲ្យមានច្រករបៀងខុសច្បាប់ទាំងឡាយ រួចឃុបឃិតជាមួយឈ្មួញ នាំចូលឈើគ្រញូង ទំនិញគេចពន្ធ បទល្មើសឆ្លងដែនខុសច្បាប់ ពិសេសការនាំចូលម៉ូតូគេចពន្ធ និងរថយន្តចង្កូតស្តាំ ដែលបទល្មើស ទាំងនេះជាទូទៅកើតឡើងក្នុងជាយដែនស្រុកថ្មពួក និងជាយដែនស្រុកម៉ាឡៃ។
បើទោះបីជាមានការដាក់បញ្ជា យ៉ាងតឹងរឹងពីសំណាក់ថ្នាក់ដឹកនាំទាំងពីរក៏ដោយ ក៏មន្ត្រីនៅតាមគោលដៅនីមួយៗ ហាក់គ្មានអើរពើនិងញញើតច្បាប់ឡើយ សកម្មភាពល្មើសនៅតាមច្រករបៀងនីមួយៗខាងលើ កាន់តែកើនឡើងជាងមុនជាលំដាប់។ ចំពោះស្ថាប័នគយសាខាខេត្តបន្ទាយមានជ័យ ក្រោមការដឹក នាំរបស់លោក ថោង សុខាំភូ ហាក់គាំងត្រគៀកស្តូក ងងឹតភ្នែក ត្រចៀកថ្លង់ លែងដឹងលែងលឺអ្វីទាំងអស់ មានសកម្មភាពតែដំបូងក្រោយចូលកាន់តំណែង បន្ទាប់មកក៏ស្ងាត់ឈឹង គ្មានការបង្ក្រាបអ្វីឡើយ ឬមួយក៏អស់លោកគយទាំងនេះត្រូវបានឈ្មួញសែន ព្រេនប្រចាំខែអស់ហើយ?
ពលរដ្ឋខេត្តបន្ទាយមានជ័យស្នើសុំថ្នាក់ដឹកនាំធំៗនៅក្រសួងមេត្តាធ្វើការត្រួតពិនិត្យ ស្មើបអង្កេតសាឡើងវិញជុំវិញករណីសមត្ថកិច្ចឃុបឃិតជាមួយឈ្មួញរកស៊ីខុសច្បាប់ និងប្រព្រឹត្តិអំពើពុករលួយ ដែលទង្វើទាំងនេះហាក់កុំពុងផ្គើនបទបញ្ជារបស់រាជរដ្ឋាភិបាលកម្ពុជាដោយចំហគ្មានការខ្លាចក្រែងរអែងច្បាប់ទាល់តែសោះ៕
.jpg)
.jpg)
.jpg)
.png)
.jpg)
.jpg)
