តុលាការខេត្តសៀមរាប និងប៉ូលីសប៉ុស្តិ៍ពីរនាក់បានចុះ អនុវត្តសាលដីការ រឹបអូសដី និងផ្ទះមួយកន្លែងស្ថិតនៅក្នុងភូមិតាវៀន សង្កាត់សាលាកំរើក ក្រុងសៀមរាប នៅវេលាម៉ោង៨និង៣០នាទីព្រឹកថ្ងៃទី២៦ ខែមាសា ឆ្នាំ២០១៧ជាលើកទីពីរមិនបានសម្រេចទៅតាមផ្លូវច្បាប់ដែលបានកំណត់។
យោងទៅតាមសាលដីការសម្រេច ម្ចាស់ដីនិងផ្ទះឈ្មោះលោក ធីវលី និងភរិយាឈ្មោះ ហូប៉ោះ បានជំពាក់បំណុលលោកស្រី ហ៊ឹមសុកុល គ្មានលទ្ធភាពសង អស់រយៈពេលជាច្រើនឆ្នាំ បើគិតទៅតាំងតែពីឆ្នាំ២០១០ រហូតដល់ឆ្នាំ២០១៧នេះ ទើបតុលាការសម្រេចយកដីនិងផ្ទះរបស់កូនបំណុលទៅលក់អោយអ្នកដ៏ទៃ ទៅតាមតំលៃទីផ្សា។
យោងតាមសម្តីលោកស្រី ហ៊ឹបសុកុលជាម្ចាស់បំណុលបានទុកឱកាសអោយកូនបំណុលរកលុយសងជាច្រើនឆ្នាំតែមិនមានលុយសង ទើបសម្រេចចិត្តដាក់ពាក្យប្តីទៅតុលាការ រហូតតុលាការសម្រេចយកផ្ទះនិងដីនេះលក់ទៅតាមតំលៃទីផ្សា អោយទៅឈ្មោះ ឡៅសុម៉េង ទៅតាមផ្លូវច្បាប់ ដែលក្នុងការលក់នេះមានការចុះវាយតម្លៃពីស្ថាប័ណ្ណពាក់ព័ន្ធគ្រប់លំដាប់ថ្នាក់ ហើយកាលនោះម្ចាស់ផ្ទះក៏មិនបានធ្វើការបដិសេធន៍ដែរ។
សូមរំលឹកផងដែរថា កាលពីថ្ងៃទី២៩ ខែមិនា ឆ្នាំ២០១៧តុលាការ និងសមត្ថកិច្ចចំរុះបានចុះអនុវត្តសាលដីការលើកទី១ម្តងហើយ តែមិនបានសម្រេច ដោយម្ចាស់ផ្ទះមិនព្រមចាកចេញ ហើយនៅព្រឹកថ្ងៃទី២៦ ខែមេសា ឆ្នាំ២០១៧នេះ ព្រះរាជអាជ្ញារងសាលាដំបូងខេត្តសៀមរាបលោក រៀម ចន្ទន្នី និងក្រឡាបញ្ជីម្នាក់ ព្រមទាំងប៉ូលីសប៉ុស្តិ៍សង្កាត់សាលាកំរើកពីរនាក់បានចុះអនុវត្តសាលដីការជាលើកទីពីរ តែមិនទទួលបានជោគជ័យដដែល ព្រោះម្ចាស់ផ្ទះមិនព្រមចាកចេញដដែល ហើយកូនម្ចាស់ផ្ទះបានទាញដំបងបម្រុងសំពងក្បាលក្រុមកម្មករដែលត្រូវបានតុលាការបញ្ជាអោយជួយរើឥវ៉ាន់ចេញពីផ្ទះ ដើម្បីចាក់សោប្រគល់អោយម្ចាស់ថ្មីដែលជាអ្នកចំណាយលុយ $41210 (បួនម៉ឺនមួយពាន់ពីររយដប់ដុល្លារអាមេរីកកាំង) ក្នុងការផ្ទះនិងដីនេះពីតុលាការខេត្តសៀមរាប។
លោក ឡៅ សុម៉េង បានប្រាប់អ្នកយកព័ត៌មានយើងថា លោកបានទិញដីនិងផ្ទះពីលោក ធីវលី និងអ្នកស្រី ហូប៉ោះ ដែលតុលាការបានសម្រេច លក់ឡាយឡុង ព្រោះជំពាក់បំណុលគេគ្មានប្រាក់សង ហើយដីនោះមានលេខវិញ្ញាបនបត្រ ១៧១០០៤០៦ចុះថ្ងៃទី២៤ ខែតុលា ឆ្នាំ២០០៨ ដែលមានដី និងផ្ទះចំនួនពីរ។ លោក ឡៅសុម៉េង បានបន្តថា៖ ដំបូងឡើយលោក សុំទិញតែដីទេ តែតុលាការសុំអោយ ទិញទាំងផ្ទះផង ព្រោះផ្ទះបើរើទៅវាបាក់បែកខូចខាត ទើបលោក សម្រេចចិត្តទិញ ទាំងផ្ទះពីការឡាយឡុងរបស់តុលាការ ដែលមានតំលៃសរុប $៤១២១០ (បួនម៉ឺនមួយពាន់ពីររយដប់ដុល្លារ) ម្យ៉ាងទៀតលោក ធីវលី និងលោកស្រី ហូប៉ោះ ក៏បានយល់ព្រម ផ្ទេរប្លង់កម្មសិទ្ធស្រមច្បាប់ អោយមកលោក ដោយគ្មានការបង្ខិតបង្ខំនោះទេ តែដល់ពេល លោក ត្រូវការយកដីយកផ្ទះ ដែលជាកម្មសិទ្ធរបស់លោក បានទិញ បែរជាឡាំប៉ា មិនព្រមប្រគល់អោយ ។ លោកថាតាមពិតទៅ លោកមិនត្រូវទិញដីផ្ទះ ដែលមានរឿងក្តីក្តាំនោះទេ តែកាលនោះវាគ្មានអ្នកទិញ ហើយម្យ៉ាងទៀត ម្ចាស់បំណុល(ណុបស៊ីថា)គេគំរាមប្តឹងអ្នកធានា(ហ៊ឹមសុកុល)ដែលជាភរិយារបស់លោក ទើបលោកសម្រេចចិត្តជួយទិញ ដីនិងផ្ទះខាងលើនេះ។
ក្រុមគ្រួសារលោកស្រី ហូប៉ោះ មិនព្រមចុះចេញពីផ្ទះនោះទេ ដោយគាត់បានលើកឡើងថា ពួកគាត់ ជំពាក់លុយ២៥០០០ដុល្លា (ពីរម៉ឺនប្រាំពាន់ដុល្លា) គាត់ត្រូវសងលុយ គ្មានហេតុផលអ្វី ត្រូវអោយដីអោយផ្ទះនោះទេ គាត់បានជួលមេធាវីដើម្បីធ្វើការតវ៉ាចំពោះមុខច្បាប់ ដាច់ខាតមិនចុះចេញ មិនខ្លាចអ្នកណាទាំងអស់ ។
មតិមហាជនឈរមើលហេតុការណ៍ ការចុះអនុវត្តសាលដីការខាងលើនេះ និយាយផ្សេងៗគ្នា ដោយអ្នកខ្លះមានការអាណិតអាសូរដល់ម្ចាស់ផ្ទះ អ្នកខ្លះថាគ្រាន់តែជំពាក់លុយប៉ុណ្ណឹងចាំបាច់រឹបអូសផ្ទះ អ្នកខ្លះយល់ដឹងពីផ្លូវច្បាប់បាននិយាយថា បើជំពាក់គេអត់លទ្ធភាពសងគេហើយមេចមិនអោយគេតាមផ្លូវច្បាប់ទៅព្រោះកាលគេអោយខ្ចីវាស្រួលដល់ពេលគេទាវាយ៉ាប់ បើយ៉ាប់ចឹងលើលោកនេះគេលែងហ៊ានអោយលុយខ្ចីហើយ អ្នកខ្លះថា តុលាការដែលចុះមកអនុវត្តច្បាប់នេះហាក់មានការចន្លោះប្រហោង ដោយប្រើកម្លាំងនគរបាលយុត្តិធម៌ តែពីរនាក់អោយឈរមើល ហើយបែរទៅជាបញ្ជាអោយក្រុមកម្មករទៅប្រទាញប្រទង់ រើឥវ៉ាន់ជាមួយម្ចាស់ផ្ទះវិញ ដូចមិនដែលដឹងទេអីថា មិនដែលមានម្ចាស់ផ្ទះម្ចាស់ដីឯណាគេអោយលោកទៅរឹបអូសយកទ្រព្យគេដោយស្រួសនោះទេ បើតុលាការមានចេតនាទៅរឹបអូសផ្ទះ រឹបអូសដីតាមសាលដីការមែន មិនគួរប្រើកម្លាំងកម្មករ គួរប្រើកម្លាំងប្រដាប់អាវុធ ព្រោះម្ចាស់ផ្ទះមិនខ្លាចកម្មករទេ ហើយអាចប្រើហឹង្សាលើកម្មករទៀតផង។
លោក ឡៅ សុម៉េង អ្នកទិញផ្ទះទិញដីខាងលើ សូមអោយលោក កើត វណ្ណរ៉េត ព្រះរាជអាជ្ញាសាលាដំបូងខេត្តសៀមរាប មេត្តាពន្លឿនការអនុវត្តសាលដីការលើកទី៣អោយបានឆាប់ ហើយសុំអោយបានសម្រេចទៅតាមផ្លូវច្បាប់ផង ព្រោះរឿងក្តីនេះវាជិត១០ឆ្នាំហើយ ម្យ៉ាងទៀតលោកទិញដីទិញផ្ទះខាងលើនេះពីតុលាការ ចេញដីការសម្រេចលក់ មិនមែនទិញពីម្ចាស់ផ្ទះដោយខ្លូនឯងនោះទេ៕ ដោយ៖ ផ្លុងរ៉េត
.jpg)
.jpg)
.jpg)
.png)
.jpg)
.jpg)
.jpg)
