នាយ​ជីវ៉ាន់ស៊ុយ ទទួល​មរណភាពដោយ​​សារ​​ជំងឺ​មហារីក​​ថ្លើម

នាយជី វ៉ាន់ស៊ុយ មានឈ្មោះពិតថា រុន សារ៉េន ​បានស្លាប់ ក្រោយពី​ទើបតែ​ត្រឡប់​​មកស្រុក​កំណើត ឯខេត្ត​បន្ទាយមានជ័យ បានរយៈបីថ្ងៃប៉ុណ្ណោះ ក្រោយ​ពី​ព្យាបាល​នៅក្នុង​មន្ទីរ​ពេទ្យ​ព្រះកេតុមាលា អស់រយៈពេល ៦ ទៅ៧​ខែមក ។

អ្នកស្រីហ៊ុន សាវន អាយុ៥១ ឆ្នាំ ត្រូវជា​ភរិយាលោកជី វ៉ាន់ស៊ុយ បានរៀបរាប់ ទាំងសោកសង្រេងថា មុនពេល​ដែល​លោកប្តី​បានលាចាកលោកនេះ គឺគាត់​នៅតែមានកង្វល់​ក្នុងចិត្តនៅឡើយ ​ព្រោះ​តែ​នៅ​អាល័យ​​​ប្រពន្ធកូនចៅនៅឡើយ។ ហើយដង្ហើមចុងក្រោយនេះ មានតែកូនចិញ្ចឹមប៉ុណ្ណោះ! ដែលនៅថែរក្សាដិតដល់ ខណៈកូនៗបង្កើត កំពុងជាប់​រវល់​​ប្រកប​របរ​រក​ស៊ីរៀង​ៗខ្លួន ​ខ្លះនៅភ្នំពេញប្រកបរបរ​ជាអ្នកសិល្បៈចម្រៀងកំប្លែង ​និងខ្លះទៀត ក៏ចេញទៅស៊ីឈ្នួលនៅទឹកដីថៃ។

ភរិយានាយជី វ៉ាន់ស៊ុយ បានបន្តទៀតថា លោកគ្រូពេទ្យ​ ក៏បានឲ្យយក​រូបគាត់មកកាន់ស្រុកកំណើតវិញ ព្រោះស្ថានការណ៍ជំងឺនេះ បានឈាន​ដល់​ដំណាក់​ការ​ចុង​ក្រោយ​ហើយ​។

អ្នកស្រីហ៊ុន សាវន បានរំលឹកថា កាលពីឆ្នាំ១៩៧៩ អ្នកស្រី និងលោកជី វ៉ាន់ស៊ុយ ក៏បានរៀបការនឹងគ្នា ដោយមានចាស់ទុំទាំងសងខាងផ្សំផ្គុំ ​ទៅតាមប្រពៃណី និងបានទទួល​បានកូន ៥ នាក់ ប្រុស៣ ស្រី២ ជាចំណង​ដៃអាពាហ៍ពិពាហ៍។ ​នាខណៈនោះ ស្វាមីអ្នកស្រី ប្រកបរបរច្រៀងភ្លេងការ ​ចិញ្ចឹមជីវិត​។​ កាលណោះ ជីវភាពក្រុម​គ្រួសារ​គាត់ មាន​ការលំបាកណាស់ ​ផ្លាស់​ប្តូរ​ទៅលំនៅពីកន្លែងមួយ ទៅ​កន្លែងមួយ​ ដែលអាច​និយាយបានថា​រកមួយពេល សម្រាប់មួយពេល​ប៉ុណ្ណោះ​។ រហូត​មកដល់ឆ្នាំ១៩៩៥ ស្រាប់​តែមាន​ខាង​ទូរទស្សន៍ប៉ុស្តិ៍លេខ៩ ​បានអញ្ជើញលោកជី វ៉ាន់ស៊ុយ ទៅសម្តែង​ និងបានទទួល​កេរ្តិ៍​ឈ្មោះល្បីល្បាញ​ រហូត​ដល់មហាជន​ស្គាល់​ទូទាំង​ប្រទេសតែម្តង។ ក្រៅពី​អាជីពជា​សិល្បៈ ចម្រៀងកំប្លែង ស្វាមីអ្នកស្រី ក៏​ជាសន្តិសុខ​នៅរដ្ឋសភា​ និងជា​មន្ត្រី​យោធា នៅទីបញ្ជជាការដ្ឋាន​​កង​អង្គរក្ស​ផងដែរ។

សព នឹងត្រូវបូជា តាមប្រពៃណី នៅថ្ងៃទី៥ វិច្ឆិកា ២០១២ នៅវត្តពោធិ៍រង្សី៕