ព្រះបរមសព ព្រះមហាវីរក្សត្រ បានដង្ហែ មកដល់បរមរាជ្យវាំងហើយ

នៅ​ម៉ោង ៥ និង ៣៥ នាទី​ល្ងាច​ថ្ងៃ​ទី​១៧ ខែ​តុលា​នេះ ព្រះ​បរមសព​ព្រះករុណា ព្រះមហាវីរក្សត្រ ព្រះបាទ​សម្តេចព្រះ នរោត្តម សីហនុ បាន​ដង្ហែ​តាម​ព្រះទីនាំង មកដល់​បរមរាជ្យវាំង ក្រោម​ការទទួល ដោយ​ពលរដ្ឋ​យ៉ាង​ណែនណាន់​តាន់តាប់ ប្រកបដោយ​ទឹកចិត្ត​ក្តុកក្តួល និង​សោកសង្រេង​ក្រៃលែង​។​
​​ខណៈ​ដែល​ព្រះទីនាំង រថយន្ត ដែល​រចនា​ជា​រូប​ហង្ស ដង្ហែ​ព្រះ​បរម​សព​ព្រះមហាវីរក្សត្រ បាន​មក​ដល់​បរមរាជវាំង​នោះ សំឡេង​សោកសង្រេង បាន​លាន់​ឡើង​ពី​ពលរដ្ឋ ដែល​ឈរ​អម​សងខាង​ផ្លូវ​យ៉ាង​ពាក់​ពពូន​នោះ​។​

នាទី​នោះ ក៏​មាន​វត្តមាន​ព្រះសង្ឃ​ជាច្រើន​រយ​អង្គ ចូលរួម ដើម្បី​បង្សុកូល​។ ចំនួន​អ្នក​មក​ចូលរួម​បាន​កាន់​ច្រើនឡើងៗ នៅក្នុង​អំឡុង​ម៉ោងជាង​បួន​។​
នៅ​មុន​ក្បួន​មក​ដល់​សមត្ថកិច្ច បាន​រៀបចំ​ឲ្យ​អ្នកចូលរួ​មនៅ​ផ្នែក​ខាង​មុខ អង្គុយ​ចុះ និង​អ្នក​នៅ​ខាងក្រោយ​អាច​ឈរ​បាន​។ ការរៀបចំ​បែបនេះ ដើម្បី​ឲ្យ​អ្នកចូលរួម អាច​មើលឃើញ​ទាំងអស់គ្នា​។ ប៉ុន្តែ​នៅពេល​ក្បួន​ព្រះទីនាំង មក​ដល់​គេ​ពុំ​អាច​ឃាត់​ឃាំង បាន​នូវ​ចំនួន​មនុស្ស​ដ៏​កកកុញ ដែល​ចង់​ឃើញ​ព្រះ​ភក្ត្រ​ព្រះមហាវីរក្សត្រ​ជា​ចុងក្រោយ​នោះ​ឡើយ​។ 

ចំនួន​មនុស្ស ដែល​ក្រោកឈរ​ស្រុះគ្នា បាន​កើតឡើង នៅពេល ដែល​ក្បួន​ព្រះទីនាំង​មកដល់​។ ​    ​នៅ​មុន​ក្បួន​ព្រះទីនាំង​មកដល់ គេ​សង្កេតឃើញ​វត្តមាន​លោក​ឧត្តមសេនីយ៍ ជួន សុវណ្ណ ស្នងការ​នគរបាល​រាជធានី​ភ្នំពេញ បានបង្ហាញ​វត្តមាន​នៅ​ទីនោះ​ដែរ ដើម្បី​បញ្ជា​ដល់​សមត្ថកិច្ច​របស់​លោក​ក្នុង​ការរៀបចំ​សណ្តាប់ធ្នាប់ និង​ការពារ​សុវត្ថិភាព​ជូន​មហាជន ដែល​ចូលរួម​៕​    ​