កងរាជអាវុធហត្ថ បង្ក្រាបបានកញ្ឆាស្រស់ និងក្រៀមមួយចំនួន និងឃាត់ខ្លួនម្ចាស់បញ្ជូនទៅតុលាការ

យោង​តាម​សេច​ក្តី​រាយ​ការណ៍​បាន​អោយ​ដឹង​ថា ចំការ​កញ្ឆា​ដ៏​ធំ ដែល​ត្រូវបាន​គេ​ដឹងថា​មាន​មនុស្ស​លួច​ដាំ​ ដើម្បី​លក់​ចែកចាយ ដែល​មាន​ទីតាំងស្ថិត​នៅក្នុង​ភូមិ​និម្មិត​១ សង្កាត់​និម្មិត ក្រុង​ប៉ោយប៉ែត ខេត្ត​បន្ទាយ​មាន​ជ័យ ត្រូវបាន​​កម្លាំង កង​រាជ​អា​វុធហត្ថ​ក្រុង​ប៉ោយប៉ែត និង​ស្រុក​អូរជ្រៅ បើក​ប្រតិបត្តិការ​ចុះ​បង្ក្រាប ដកហូត​បាន​កញ្ឆា​ស្រស់ និង​ក្រៀម ជា​ច្រើន​ដើម ហើយក៏ បាន​ឃាត់ខ្លួន​ម្ចាស់​ចំការ​ កសាង​សំណុំរឿង​បញ្ជូនទៅ​តុលាការ​​​តាមច្បាប់​ផង​ដែរ កាល​ពី​ថ្ងៃ​ទី​១០ ខែ​មករា ឆ្នាំ​២០១៥​។​

​ប្រតិបត្តិការ​នោះ​សមត្ថកិច្ច ដកហូត​បាន​កញ្ឆា​ស្រស់​ដើម​ធំ​បែក​គុម្ព​ចំនួន​៣៨​ដើម កញ្ឆា​ស្រស់ ដើម​តូច​២៨​ដើម កញ្ឆា​ក្រៀម​ចំនួន​៤​គីឡូក្រាម និង​ផើង​បណ្តុះ​កូន​កញ្ឆា​ចំនួន​៤​ផើង ក្រៅពី​នេះ​សមត្ថ កិច្ច​បាន​ឃាត់ខ្លួន​ម្ចាស់​ទីតាំង​ម្នាក់​ឈ្មោះ ហ៊ី យុន ភេទ​ប្រុស អាយុ​៧១​ឆ្នាំ រស់នៅ​ក្នុង​ភូមិ​ឃុំ​កើតហេតុ ខាងលើ គ្មាន​មុខរបរ​ពិតប្រាកដ​។​

​ជុំវិញ​ករណី​នេះ​មេបញ្ជាការ អ ហ ខេត្ត​បន្ទាយមានជ័យ បានអោយ​ដឹង​តាម​ទូរ​សព្ទ័​កាលពី រសៀល​ថ្ងៃ​ទី​១១ ខែ​មករា ឆ្នាំ​២០១៥​នេះ​ថា ក្រោយពី​សមត្ថកិច្ច​សួរនាំ លោកតា ហ៊ី យុន ម្ចាស់​ចំការ សមត្ថកិច្ច​រកឃើញ​ថា ទ្រង់ទ្រាយ​នេះ​មិនមែន​ជា​ការដាំ​ទុក​ប្រើប្រាស់​ជា​លក្ខណះ​គ្រួសារ​នោះ​ទេ គឺ​ជន សង្ស័យ​មាន​ចេតនា​ដាំ​ទុក​លក់​ចែកចាយ ព្រោះ​មាន​ឈ្មួញ​ទុច្ចចរិត​កម្មង់ និង​មួយចំនួន​មក​ទិញ​ដល់ កន្លែង​ទៀត​ផង​។​

​បច្ចុប្បន្ន​ជនសង្ស័យ​ត្រូវបាន តុលាការ​សម្រេច​ឃុំខ្លួន​បណ្តោះអាសន្ន​នៅ​ពន្ធនាគារ ខេត្ត​បន្ទាយ មានជ័យ ក្រោយ​ពី​សួរនាំ​រួច​កាលពី​ថ្ងៃ​ម្សិលមិញ​៕