ខ្សែរភ្លើងឆក់សន្តិសុខកាស៊ីណូGrand Diamon Cityស្លាប់ ក្រុមហ៊ុនបិទបាំងព័ត៌មាន

បុគ្គលិកសន្តិសុខកាស៊ីណូ Grand Diamon City ម្នាក់ ឃើញ ខ្សែភ្លើងដាច់ធ្លាក់លើដីមានបំណងល្អទៅលើកខ្សែភ្លើងនោះចេញ ព្រោះខ្លាចឆ្លងចរន្តឆក់បុគ្គលិកដទៃបែរជាឆក់ខ្លួនឯងស្លាប់ទៅវិញ។

ក្រោយកើតហេតុ ខាងក្រុមហ៊ុនបានបញ្ជូនសពទៅស្រុកកំណើតទាំងយប់។ ប្រភពព័ត៌មានពីសមត្ថកិច្ច ក្រុងប៉ោយប៉ែតបានឲ្យដឹងថា ជនរងគ្រោះត្រូវបានគេស្គាល់ឈ្មោះ អ៊ួន សីហា ហៅ កក្កដា ភេទប្រុស អាយុ ២៣ឆ្នាំ មានស្រុកកំណើត នៅ ភូមិថ្មី ឃុំគោកឃ្មុំ ស្រុកថ្មគោល ខេត្តបាត់ដំបងបច្ចុប្បន្នមានមុខរបរជាបុគ្គលិកសន្តិសុខកាស៊ីណូ Grand Diamon City នៅក្រុងប៉ោយប៉ែត ។

នៅវេលាម៉ោង៣ទៀបភ្លឺ ព្រឹកថ្ងៃទី១៩ ខែកញ្ញា ឆ្នាំ ២០១២ ខណៈដែលជនរងគ្រោះកំពុង យាមបានឃើញទឹកជំនន់ឡើងដល់បរិវេណក្បែរអគារជនរងគ្រោះបានទៅលើកខ្សែភ្លើង ដែលដាច់ធ្លាក់ក្បែរនោះចេញ ព្រោះក្រែងបណ្តាលឲ្យឆក់អ្នកដទៃជា អកុសល ខ្សែភ្លើងបែរជាឆក់ជនរងគ្រោះ ស្លាប់មួយរំពេចទៅវិញ។

លោក អ៊ុំ សុផល អធិការនគរបាល ក្រុងប៉ោយប៉ែតបានឲ្យដឹងថាលោកពុំបានទទួលព័ត៌មាននេះទេពេលចាត់កម្លាំងទៅសួរនាំ ខាងក្រុមហ៊ុនមិនសហការដែរលោកនឹងស្រាវជ្រាវពីករណីនេះ៕