អ្នកកាសែត២រូបដែលជាប់ពន្ធនាគារចូលខ្លួនស្តាប់ការប្រកាសសាលក្រម

អ្នកកាសែតក្នុងស្រុក២រូបត្រូវបានតុលាការចាប់ដាក់ពន្ធនាគារ តាំងតែពីថ្ងៃទី២៧ ខែមេសា ឆ្នាំ២០១២ នៅចំណុច ឃុំកណ្តែក ស្រុកប្រាសាទបាគង ខេត្តសៀមរាបពីបទកំហែងទាប្រាក់ពីឈ្មួញដឹកឈើខុសច្បាប់ឈ្មោះផាត់ថាណា ភេទស្រី ដែលជាប្អូនថ្លៃរបស់លោកមិន-ចន្ថាអធិការស្រុកប្រាសាទពាគង ត្រូវបានចៅក្រមសាលាដំបូងខេត្តសៀមរាបធ្វើការប្រកាសសាលក្រមនៅ វេលាម៉ោង៨និង៣០នាទីព្រឹក ថ្ងៃទី២២ ខែសីហា ឆ្នាំ២០១២នេះ បន្ទាប់ពីបានចូលខ្លួនសវនាការកាលពីថ្ងៃទី១៣ ខែសីហា ឆ្នាំ២០១២សប្តាហ៍មុន។

អ្នកកាសែត២រូបខាងលើត្រូវបានគេស្គាល់ថាឈ្មោះប្រាក់-សុខឡេងភេទប្រុស អាយុ៤៥ឆ្នាំ និងឈ្មោះប្រន-ស៊ានភេទ ប្រុសអាយុ៣៦ឆ្នាំជាអ្នក យកព័ត៌មានឲ្យកាសែតការពិតប្រចាំខេត្តសៀមរាបដែលត្រូវបានលោកហេង ផេងព្រះរាជអាជ្ញារងតំណាងអយ្យការសាលាដំបូងខេត្តសៀមរាប បញ្ជាអោយនគរបាល នាំខ្លួនយកទៅសាកសួរ នៅអធិការដ្ឋានស្រុកប្រាសាទបាគងបន្ទាប់ពីមានការចោទប្រកាន់ថា ពួកគេបានស្ទាក់ឃាត់ឡានធួរីសដឹកឈើខុសច្បាប់មួយគ្រឿង ជារបស់ប្អូនថ្លៃលោកមិន ចន្ថា ហើយគំរាមទារប្រាក់ចំនួន១០០ដុល្លាអាមេរិក។

តាមការប្រកាសសាលក្រមលេខ ៨៣ឃ ចុះថ្ងៃទី២២ ខែសីហា ឆ្នាំ២០១២ របស់ចៅក្រមសាលាដំបូងខេត្តសៀមរាបនាព្រឹកនេះបានអោយដឹងថា លោក ប្រន-ស៊ាន និង លោក ប្រាក់-សុខឡេង ត្រូវបានតុលាការផ្តន្ធាទោសអោយជាប់ពន្ធនាគារចំនួន២ឆ្នាំ តែដាក់ពន្ធនាគារចំនួន៤ខែចាប់ពីថ្ងៃជាប់ពន្ធនាគារដំបូង ហើយសល់ប៉ុន្មានគឺព្យួរទោសអោយនៅក្រៅឃុំ។

ដំណើររឿងៈ 

តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលមានការឃាត់ខ្លួននេះ មានឡានដឹកឈើប្រភេទធួរីស ១៥កៅអី ពណ៌ទឹកសមុទ្រមួយគ្រឿងពាក់ស្លាកលេខ ភព2-1963 បានធ្វើសកម្មភាពដឹកឈើពីច្រកឃុំខ្វាវ ស្រុកជីក្រែង ចូលមកក្នុងក្រុងសៀមរាប តាមបណ្តោយផ្លូវជាតិលេខ៦។ លុះមកដល់ចំណុចកើតហេតុក៏ស្រាប់តែមានឡានអ្នកកាសែតពីរគ្រឿងបានបើក ពាំងផ្លូវហើយក្នុងពេលនោះស្ត្រីម្ចាស់ឈើខុសច្បាប់ ដែលគេស្គាល់យ៉ាងច្បាស់ថាឈ្មោះផាត់-ថាណាជាឈ្មួញដឹកឈើដ៏ចាស់ វស្សាប្រចាំខេត្តសៀមរាប និងត្រូវជាប្អូនថ្លៃរបស់លោកមិន-ចន្ថា អធិការនគរបាលស្រុកប្រាសាទបាគង ខេត្តសៀមរាប បានចេញមកចចារឲ្យលុយអ្នកកាសែតទាំងពីរនាក់ចំនួន២០ដុល្លារតែ ពួកគេមិនព្រមទទួល ហើយថែមទាំងបានទូរស័ព្ទទៅលោកយឹម-ស៊ីវន នាយសង្កាត់រដ្ឋបាលព្រៃឈើស្រុកប្រាសាទបាគង តែលោកមិនទទួលទូរស័ព្ទ ហើយពួកគេក៏បានទូរស័ព្ទទៅអ្នកកាសែតផ្សេងទៀត និងទូរស័ព្ទទៅលោកចន្ទីហៅម៉ៅជាគ្រលាបញ្ជីអោយជួយអន្តរាគមទៅលោកព្រះ រាជអាជ្ញា និងសមត្ថកិច្ចមន្រ្តីជំនាញអោយមកចាប់រថយន្តដឹកឈើ ខាងលើតែគ្មានអ្នកណាគេទៅចាប់ឈើនោះទេ។

ចុងចោទ២រូបនេះបាននិយាយដូចគ្នាថា លោកមិនបានហាមាត់ទារលុយពីឈ្មួញឈើនេះទេ តែអ្នកស្រីផាត់ថាណាម្ចាស់ឈើបានយកលុយ២០ដុល្លារមកអោយពួកគាត់ តែពួកគាត់មិនព្រមយកទើបម្ចាស់ឈើភ័យខ្លាចគេចាប់ឈើក៏ប្តឹងសមត្ថ កិច្ចថាពួកគាត់ទៅកំហែងទាប្រាប់១០០ដុល្លារទៅវិញ។

ចំណែកឈ្មួញរកស៊ីដឹកឈើខុសច្បាប់ផាត់-ថាណាធ្លាប់បាននិយាយ អះអាងថា អ្នកកាសែតទាំង២នាក់ពិតជាបានទារលុយចំនួន១០០ដុល្លាអាមេរិកពី គាត់តែគាត់គ្មានលុយឲ្យទេគឺអោយ២០ដុល្លារតែពួកគេមិនយក។ នៅថ្ងៃកើតហេតុស្ត្រីឈ្មួញឈើខាងលើបន្តថា រឿងនេះគាត់មិនបានប្តឹងផ្តល់ទៅសមត្ថកិច្ចនោះទេ មិនដឹងជាអ្នកណាគេជាអ្នកប្តឹង។

ប្រជាពលរដ្ឋខេត្តសៀមរាបឆ្ងល់ថា តុលាការកាត់ទោសអោយអ្នកកាសែតកំហែងទាប្រាក់ជាប់ពន្ធនាគាររហូត ដល់ទៅ២ឆ្នាំទាំងទោសព្យួរ ចុះចំណែកឯលោកស្រី ផាត់-ថាណា វិញតើច្បាប់គេអនុវត្តទៅលើលោកស្រីយ៉ាងណាដែរ? ក្នុងនាមលោកស្រីជាឈ្មួញរកស៊ីដឹកឈើប្រណិតគ្មានច្បាប់ ដែលមានភស្តុតាងជាក់ស្តែងនៅតំកល់ទុកទាំងឡានទាំងឈើ នៅឯរដ្ឋបាលព្រៃឈើខេត្តសៀមរាបរហូតដល់ថ្ងៃនេះនៅឡើយ។ ពួកគាត់បន្តថា គួរតែច្បាប់ដាក់ទោសលោកស្រីផាត់ថាណាផង ព្រោះគាត់ជាអ្នករកស៊ីដឹកឈើខុសច្បាប់ ២នាក់ចុងចោទជាអ្នកទាលុយគេខុសច្បាប់ សរុបសេចក្តីទៅវាខុសដូចតែគ្នាតែបែជាឈ្មួញរូបនេះនៅបន្តការរក ស៊ីសើចក្អាកក្អាយលើគំនរទុក្ខអ្នកជាប់គុគ៤ខែបែបនេះទៅវិញ៕