មេខ្យល់បោកគេថានាំទៅធ្វើការនៅស្រុកថៃត្រូវ អ ហ ចាប់ដាក់ទ្រុង

បុរសម្នាក់អួតថានាំយុវជនប្រុស០៤នាក់ទៅធ្វើការនៅថៃ មកដល់ប៉ោយប៉ែតបោកគេយកលុយទៅលែងល្បែងអស់ត្រូវកងរាជអាវុធហត្ថ ចាប់ញាត់ទ្រុង កាលពីវេលាម៉ោង១១ព្រឹកថ្ងៃទី១៨ ខែកក្កដា ឆ្នាំ២០១២ នេះខណះមេខ្យល់និងកូនខ្យល់កំពុងឈ្លោះទាស់ទែងគ្នា នៅចំនុចរង្វង់មូល ក្រុងប៉ោយប៉ែត ខេត្តបន្ទាយមានជ័យ។

លោក ហម-ម៉ុត មេបញ្ជាការ អ ហ ក្រុងប៉ោយប៉ែតបានឲ្យដឹងថា មេខ្យល់បោកប្រាស់គេដែលកម្លាំង អ ហ ឃាត់ខ្លួនមានឈ្មោះ ម៉ឺ-សេងហ៊ួ ភេទប្រុស អាយុ៤៦ឆ្នាំ រស់នៅភូមិលេខ៧ សង្កាត់លេខ៧ រាជធានីភ្នំពេញ ជាមុខសញ្ញានាំមនុស្សឆ្លងដែនទៅថៃ។ រីឯជនរងគ្រោះ០៤នាក់បងប្អូនរួមមាន១-ឈ្មោះ អ៊ុត-ថន ភេទស្រី អាយុ៣០ឆ្នាំ ២-ឈ្មោះអ៊ុត-ប៉យ ភេទស្រី អាយុ២១ឆ្នាំ ៣-ឈ្មោះ អ៊ុត-ម៉ុយ ភេទស្រី អាយុ២៦ឆ្នាំ និង៤-ឈ្មោះ ផន-សូវៀត ភេទប្រុស អាយុ៣៥ឆ្នាំ ជនទាំងនេះគឺជាបងប្អូននឹងគ្នា មានស្រុកកំណើតនៅ ភូមិក្រសាំង ឃុំចំប៉ី ស្រុកអង្គរជ័យ ខេត្តកំពត។

លោក ហម-ម៉ុត បានបន្តទៀតថា មុនធ្វើការឃាត់ខ្លួនជនសង្ស័យឈ្មោះ ម៉ឺ-សេងហ៊ួ នេះបាននាំពួជនរងគ្រោះពីខេត្តកំពតមកជាយដែនប៉ោយប៉ែត ក្នុងគោលបំណងនាំឆ្លងដែនទៅធ្វើការរោងចក្រនៅប្រទេសថៃ ដោយក្នុងម្នាក់ត្រូវបង់ថ្លៃជូនផ្លូវឲ្យជនសង្ស័យមុន១៥០០បាត និង២០ដុល្លារ ដើម្បីធ្វើបណ្ណ័ឆ្លងដែន។ លុះដេកនៅក្រុងប៉ោយប៉ែតបានមួយយប់ព្រឹកមិញនេស្រាប់តែជនសង្ស័យយក ប្រាក់ទៅលេងល្បែងនៅកាស៊ីណូអស់ ហើយត្រលប់មកទារប្រាក់ពីពួកជនរងគ្រោះបន្ថែមដោយគ្មានឃើញយកឯក សារអ្វីមកឲ្យ ពួកជនរងគ្រោះមានការសង្ស័យដឹងថាពួកខ្លួនកំពុងចាញ់បោកគេ ជនរងគ្រោះទាំងនោះបានទារលុយវិញស្រាប់តែពេលនោះមក៏មានការប្រ កែកគ្នានិងមានជម្លោះរហូតដក់តឹងសរសៃកដាក់គ្នា នៅលើរង្វង់មូលប៉ោយប៉ែត ភ្លាមនោះជនរងគ្រោះម្នាក់បានប្តឹងឲ្យកម្លាំង អ ហ ប្រចាំការក្បែរនោះជួយអន្តរាគមន៍ទើបឈានដល់ការចាប់ខ្លួនជន សង្ស័យមេខ្យល់បានតែម្តង។

បច្ចុប្បន្នទាំងជនសង្ស័យ និងជនរងគ្រោះកំពុងស្ថិតក្រោមការសួរនាំរបស់សមត្ថកិច្ចនៅមូល ដ្ឋាន អ ហ ក្រុងប៉ោយប៉ែត ដើម្បីចាត់ការតាមច្បាប់៕