ផ្លូវមួយចំនួនលោកអភិបាលក្រុងភ្នំពេញសម្ប ទានឲ្យប្រធានផ្សារដើមគដើរយកលុយផាស៊ីស្រេចតែចិត្ត

ប្រធានផ្សារដើមគ​លោក កែតស៊ីវិនី បានយកផ្លូវសារធារណៈជុំវិញផ្សារដាក់ឲ្យអាជីវករ​លក់ដូរ​តាម​កញ្ច្រែង ហើយប្រើឲ្យក្រុមសន្តិសុខដើរប្រមូលប្រាក់ពីអាជីវករក្នុង១​នាក់ ៥​ពាន់រៀល ដោយអះ​អាង​ថា​ជា​ ថ្ងៃបុណ្យមាន​ការលក់ដូរដាច់ច្រើន ដែលថ្ងៃធម្មតាត្រូវបង់តែ ៥០០ ទៅ ១០០០ រៀល។

ប្រភពព័ត៌មានបានឱ្យដឹងទៀតថា ប្រសិនបើអ្នកលក់ដូរពុំព្រមបង់ប្រាក់ឱ្យ ទៅតាមការទាមទារ របស់ ក្រុមសន្តិសុខផ្សារដើមគនេះទេ គឺត្រូវបានក្រុម សន្តិសុខនោះទាត់កញ្ច្រែង ​ធ្វើឱ្យបន្លែត្រីសាច់ខ្ទាត រាយប៉ាយ ពេញផ្លូវមិនខានឡើយ គឺមានឥរិយាបថដូចៗគ្នាស្ទើរតែទាំងអស់ គឺមិនមានសីលធម៌ជា សន្តិសុខការពារពលរដ្ឋនោះឡើយ សូម្បីតែការប្រើប្រាស់ ពាក្យសំដីវិញក៏លំបាកស្តាប់ផងដែរ ជា​ពិសេសប្រធានសន្តិសុខឈ្មោះ បេ វណ្ណា ។

ប្រភពដដែលបានឱ្យដឹងទៀតថា ចំណែកឯលោក កែត​ស៊ីវិនី វិញនោះគ្មានប្រតិកម្មណាមួយចំពោះ ក្រុមសន្តិសុខដែលដើរទារលុយ លើសការកំណត់នោះទេ បែរជានៅស្ងៀមព្រោះ លោក កែត ស៊ីវិនី ប្រធានផ្សារដើមគជាមនុស្ស ដែលលើកបន្តុបដោយអភិបាល ក្រុងភ្នំពេញលោក កែប ជុតិមា ។

ព័ត៌មានបានបន្តទៀតថាបច្ចុប្បន្នលោក កែត  ស៊ីវិនី ក៏មិនរណបជាមួយលោក  សេង រតនៈ អភិបាល​ខណ្ឌ ទួលគោក ដែរដោយសំអាងថា រូបលោកត្រូវបានលោកអភិបាលរាជធានីភ្នំពេញ ចាត់តាំងឱ្យ​ធ្វើជា ប្រធានផ្សារ និងយកផ្លូវសាធារណៈធ្វើអាជីវកម្មរបស់ខ្លួន ។

ទាក់ទងនឹងបញ្ហាខាងលើប្រធានផ្សារដើមគលោក កែត ស៊ីវិនី មិនអាចសុំការបំភ្លឺបានទេ​ដោយលោក​បាន​ប្រាប់អ្នកយកព័ត៌មាន យើងតាមទូរស័ព្ទថា ជាប់រវល់ប្រជុំហើយក៏បិទទូរស័ព្ទ​មិនឃើញ​ឆ្លើយ​តបរហូត​មក​ដល់ពេលនេះ។

មតិសាធារណៈ​ជន​បានរិះគន់ថា បើគ្មានការបើដៃពីអាជ្ងាធក្រុង ពិសេសលោក កែប ជុតិមា ក៏ប្រធាន​ ផ្សារ​រូបនេះមិនហានយកផ្លូវសាធារណៈរបស់រដ្ឋទៅធ្វើអាជីវកម្មមិនគិតពីសណ្តាប់ធ្នាប់សាធារណៈ​និងសុវត្ថិភាពអ្នកធ្វើដំណើរ៕ដោយ៖ធនជ័យ