សាលាក្តីខ្មែរក្រហមនឹងបើកសវនាការលើបណ្តឹងសារទុក្ខប្រឆាំងការដោះលែង អៀងធីរិទ្ធ

អង្គជំនុំជម្រះតុលាការកំពូល នៃ​សាលា​ក្តី​ខ្មែរ​ក្រ​ហម​នឹង​បើក​សវ​នា​ការ​ដើម្បី​ស្តាប់ការ​វែក​ញែក​ដោយ​ផ្ទាល់​មាត់​ទាក់​ទិន​នឹង​បណ្តឹង​សារ​ទុក្ខ​របស់​សហ​ព្រះ​រាជ​អាជ្ញា​ពាក់​ព័ន្ធ​នឹង​លក្ខខណ្ឌ ​នៃ​ការ​ដោះ​លែង​ អៀង​ ធីរិទ្ធ អតីត​រដ្ឋ​មន្រ្តី​ក្រសួង​សង្គម​កិច្ច ​នៃ​របប​ខ្មែរ​ក្រ​ហម ​នា​ថ្ងៃ​អង្គារ​ ទី​១៣ ​ខែវិច្ឆិកា​ ឆ្នាំ២០១២​ ខាង​មុខ​ ចាប់ពីម៉ោង​៩ និង​៣០​នាទី​ព្រឹក​ត​ទៅ។ ​

អ្នកស្រី អៀង ធីរិទ្ធ ត្រូវបានអង្គជំនុំជម្រះសាលាដំបូង នៃសាលាក្តីខ្មែរក្រហម សម្រេចធ្វើការដោះលែងឲ្យនៅក្រៅឃុំ កាលពីថ្ងៃទី១៣ ខែកញ្ញា ឆ្នាំ២០១២ ព្រោះតែលោកស្រីពុំមានកាយសម្បទា និងបញ្ញាស្មារតីគ្រប់គ្រាន់ ដើម្បីចូលរួមការជំនុំជម្រះក្តីបាន ដោយសារគាត់មានជំងឺវង្វេងវង្វាន់ដែលទំនងជាជំងឺបាត់បង់ការចងចាំ។

ប៉ុន្តែទោះជាយ៉ាងណាក៏ដោយការដោះលែងអ្នកស្រី អៀង ធីរិទ្ធ នេះ ត្រូវបានភ្ជាប់ជាមួយលក្ខខណ្ឌបណ្តោះអាសន្នមួយចំនួនដូចជា ៖ ១) ជនជាប់ចោទត្រូវតែផ្តល់អាស័យដ្ឋានដែលគាត់រស់នៅ និងសុំការអនុញ្ញាតពីតុលាការមុននឹងផ្លាស់ទីលំនៅ។ ២) ជនជាប់ចោទមិនត្រូវចាកចេញពីប្រទេសកម្ពុជា និងត្រូវប្រគល់លិខិតឆ្លងដែនរបស់គាត់ដល់តុលាការ។ ៣) ជនជាប់ចោទត្រូវតែចូលខ្លួនប្រសិនបើមានការកោះហៅពីតុលាការ។ ជាងនេះទៅទៀត អៀង ធីរិទ្ធ ត្រូវបានហាមឃាត់មិនឲ្យជ្រៀតជ្រែកចូលក្នុងកិច្ចការរដ្ឋបាលរបស់តុលាការឡើយ៕