កសិករចាប់ផ្ដើមការងារបង្កបង្កើនផល ជាបណ្ដើរៗតែមានភូមិខ្លះកំពង់ខ្វះទឹក

កំពង់ស្ពឺ៖ដើមរដូវវស្សាឆ្នាំ២០១២ចូលមកដល់អាកាសធាតុមានអំណោយផលល្អ ខ្លះសម្រាប់ខេត្តកំពង់ស្ពឺស្រុក១ចំនួនក៏មានភ្លៀងធ្លាក់គ្រប់គ្រាន់ធ្វើឱ្យប្រជាកសិករបាននាំគ្នារួតរះចុះបង្កបង្កើនផលភ្ជួររាស់ធ្វើស្រែចំការ ហើយដីស្រែមួយចំនួននៅតាមបណ្តាស្រុកដែលមានទឹកភ្លៀងច្រើនកសិករបានឆ្លៀតស្ទូងតែម្ដងដើម្បីនឹងប្រមូលផលស្រូវស្ដុកទុកហូបប្រចាំថ្ងៃ និងផលនៅសល់ពួកគាត់ធ្វើការលក់ដោះដូរយកប្រាក់ដើម្បីកសាងជីវភាពគ្រួសារអោយមានការរីកចម្រើន។ បច្ចុប្បន្ននេះជីវភាពប្រជាជនរស់នៅខេត្តកំពង់ស្ពឺភាគច្រើន បានពឹងផ្អែកលើមុខរបរធ្វើស្រែចំការជាអាជីព។

មន្ត្រីមន្ទីរកសិកម្មខេត្តកំពង់ស្ពឺ បានប្រាប់អ្នកយកព័ត៌មានយើងថាគិតមកដល់ថ្ងៃទី២៥ខែមិថុនា ឆ្នាំ២០១២នេះប្រជាកសិករបានចាប់ផ្ដើមភ្ជួររាស់ដីស្រែនិងធ្វើ ថ្នាលសំណាបជាបណ្ដើរៗដើម្បីចុះស្ទូងបង្កបង្កើនផលនាពេលខាងមុខនេះ។ក្នុងនោះផងដែរក៏មានភូមិមួយចំនួនកំពង់តែខ្វះទឹកដែលប្រជាកសិករអំពាវនាវដល់ខាងមន្ទីធនធានទឹកសុំចុះសិក្សារស្រាវជ្រាវធ្វើការបូមទឹកជួយសង្រ្គោះសំណាបដល់ពួកគាត់ផងដែរដូចជាភូមិតាំងក្រសាំង ភូមិត្រពាំងមាន់ ស្ថិតនៅ ឃុំព្នាយ ស្រុកសំរោងទង ជាដើម។ក្រុមកសិករបានបន្តថាពួកគាត់ ចូលចិត្តធ្វើស្រូវចំរុះមាន បន្លាផ្តៅ នាងខុន នាងម៉ិញ អ៊ីអ៊ែរ ឆ្មាល្អិតនិងស្រូវផ្កាម្លិះ។ ស្រូវផ្កាម្លិះត្រូវចាត់ទុកថាជាស្រូវប្រភេទលេខ១ព្រោះមានតំលៃខ្ពស់នៅលើទីផ្សារ។

បច្ចុប្បន្នពលរដ្ឋបានបង្កបង្កើនផលស្រូវបាន២៥ភាគរយដើមរដូវវស្សាឆ្នាំនេះ។ហើយប្រជាពលរដ្ឋហាក់យល់ដឹងច្រើនអំពីការប្រើប្រាសជីដោយពលរដ្ឋភាគច្រើនបាប្រើប្រាស់ជីដែលធ្វើពីលាមកគោ និងលាមកមាន់និង មាន១ចំនួនដែលពួកគាត់ក៏បានប្រើជីគីមីផងដែរ។ក្រៅពីការប្រកបមុខរបរធ្វើស្រែក៏មានពលរដ្ឋស្រុកខ្លះគាត់ដាំបន្លែ ស្រុកខ្លះទៀតធ្វើចំការ និងចិញ្ចឹម មាន់ ទា ជ្រូកទៅតាមចំណង់ចំណូលចិត្តក្រុមគ្រួសាររបស់ពួកគាត់និមួយៗ។

តាមរបាយការណ៏ព័ត៌មានមន្ទីពាណិជកម្មខេត្ត ផ្ទៃដីបង្កបង្កើតផលមានចំនួន ១១០,០០០ ហ.ត បរិមាណផលស្រូវ ២៥៦,៨៥០ តោន/ឆ្នាំ (ទិន្នផលមធ្យម ២.៣៣៥ តោន/ហ.ត)។ ខេត្តកំពង់ស្ពឺមាននៅសល់អង្គរចំនួន ៣៣,០០០ តោនសំរាប់នាំចញ។

ទាក់ទងនិងការសុំណូមពររបស់ប្រជាពលរដ្ឋបូមទឹកដាក់ស្រែលោកអៀពិសិដ្ឋប្រធានមន្ទីធនធានទឹកនិងឧតុនិយមខេត្តកំពង់ស្ពឺមិនអាចសុំការបំភ្លឺបានទេដោយលោកឆ្លើយតាមទូរស័ព្ទថាជាប់រវល់៕