លោក ប៉ាតសុខ ភេទប្រុស អាយុ៤៤ឆ្នាំ រស់នៅភូមិវាល សង្កាត់ជ្រាវ ក្រុងសៀមរាប ខេត្តសៀមរាប ត្រូវបានលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តសៀមរាប ចេញដីការកោះហៅអោយចូលបំភ្លឺនៅថ្ងៃទី១៩ ខែឧសភា ឆ្នាំ២០១៥ វេលាម៉ោង៨ព្រឹក ក្នុងសំណុំព្រហ្មទណ្ឌលេខ៨៨៩ ចុះថ្ងៃទី១៤ ខែតុលា ឆ្នាំ២០១៤ ពីបទបរិហាកេរ្តិ៍ តាមសារព័ត៌មាន ដែលប្រព្រឹត្តិទៅនៅខេត្តសៀមរាបកាលពីថ្ងៃទី០៦ ខែតុលា ឆ្នាំ២០១៤។
លោក ប៉ាតសុខ បានប្រាប់ កម្ពុជាសុវណ្ណភូមិ នៅព្រឹកថ្ងៃទី០៦ ខែឧសភា ឆ្នាំ២០១៥នេះថា លោកមិនទាន់បានដឹងច្បាស់នៅឡើយទេថា អ្នកណាជាអ្នកប្តឹងរូបលោក តែលោកធ្លាប់មានមិត្តភ័ក្រប្រាប់ថា ប្រហែលជាក្រុមសមត្ថកិច្ចនៅភូមិមាត់ខ្លា ស្រុកជីក្រែង ខេត្តសៀមរាប ជាអ្នកប្តឹងរូបលោក ទាក់ទងនិងការបោះពុម្ភផ្សាយកាសែត ព្រះច័ន្ទកម្ពុជា ឆ្នាំទី០៣ លេខ០៨ ចេញផ្សាយថ្ងៃទី២៩ ខែកញ្ញា ដល់ថ្ងៃទី ០៨ ខែតុលា ឆ្នាំ២០១៤ ក្នុងអត្ថបទមួយដែលមានចំណងជើងថា (លោក ឈាង លាងពៅ និងលោក ថនឃេ ជាប៉ូលីសដៃម្ខាងរកស៊ីបទល្មើសដៃម្ខាង បង្ក្រាបបទល្មើសយកលុយដាក់ហោប៉ៅ)។
លោក ប៉ាតសុខ បានប្រាប់អោយដឹងទៀតថា លោកមិនមានការព្រួយបារម្ភណ៍ចំពោះបណ្តឹងដែលចោទប្រកាន់លោកពីបទបរិហាកេរ្តិ៍ខាងលើនេះទេ ព្រោះអត្ថបទដែលលោកបានចុះផ្សាយគឺសរសេរឡើងដោយមានក្រមសីលធម៌ និងវិជ្ជាជីវៈច្បាស់លាស់។ លោក ប៉ាតសុខ បានបន្ថែមថា អត្ថបទដែលលោកបានចុះផ្សាយគឺមានប្រភពច្បាស់លាស់ ពីប្រជាពលរដ្ឋដែលរងគ្រោះដោយក្រុមសមត្ថកិច្ចមួយក្តាប់តូចជំរិតទាប្រាក់ជាថ្នូរនិងការដោះលែងមនុស្ស និងមិនចាប់ចងអ្នកប្រកបរបរនេសាទទាំងស្របច្បាប់និងមិនស្របច្បាប់នៅក្នុងខេត្តសៀមរាប តាមមាត់បឹងទន្លេសាបនៅរដូវបិតនេសាទ ឬរដូវត្រីពងកូន។
លោក សុខ សុវណ្ណ ប្រធានក្រុមប្រឹក្សាសារព័ត៌មានកម្ពុជា បានមានប្រាសាសន៍តាមទូរស័ព្ទនៅព្រឹកថ្ងៃទី០៥នេះថា បើយោងតាមច្បាប់របស់អ្នកសារព័ត៌មាន អ្នកដែលត្រូវគេសរសេរចុះផ្សាយ ត្រូវសរសេរលិខិតស្នើសុំអោយចាងហ្វាង ឬនិពន្ធនាយកកាសែតនោះ ចុះផ្សាយបកស្រាយសាឡើងវិញក្នុងរយៈពេលមួយសប្តាហ៍ បើអ្នកដែលត្រូវបានគេចុះផ្សាយ យល់ឃើញថា ការសរសេរចុះផ្សាយនោះវាមិនត្រឹមត្រូវខុសពីការពិត ហើយសាមីខ្លួនមិនបានប្រព្រឹត្តិដូចការចោទប្រកាន់ មុនទៅដាក់ពាក្យបណ្តឹងតាមផ្លូវច្បាប់។ លោក សុខសុវណ្ណ បានបន្តថា តុលាការត្រូវតែយកច្បាប់របបសារព័ត៌មានមកអនុវត្តចំពោះអ្នកសារព័ត៌មាន។ លោក សុខសុវណ្ណ បានបន្ថែមថា តុលាការមិនគួរធ្វើការចោទប្រកាន់ទៅលើអ្នកសារព័ត៌មានអំពីបទបរិហាកេរ្តិ៍នោះទេ ព្រោះអ្នកសារព័ត៌មានជាកញ្ចក់ឆ្លុះបញ្ចាំងពីសង្គមទូទៅ ហើយជាអ្នកនាំសារពីប្រជារាស្រ្តទៅរដ្ឋាភិបាល ឬពីរដ្ឋាភិបាលមករាស្រ្តវិញ។
បើយោងតាមក្រមព្រហ្មទណ្ឌថ្មីនៃមាត្រា ៣០៦ បានចែងថា អំពើបរិហារកេរ្តិ៍ តាមសារព័ត៌មាន ការបរិហាកេរ្តិ៍ដែលប្រព្រឹត្តតាមសារព័ត៌មាន ត្រូវស្ថិតនៅក្រោមបទបញ្ញត្តិនៃច្បាប់ស្តីពីរបបសារព័ត៌មាន។
មានត្រា ៤១ នៃរដ្ឋធម្មនុញ្ញបានចែងថា ប្រជាពលរដ្ឋខ្មែរមាន សេរីភាពក្នុងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ភផ្សាយ សេរីភាពខាងការប្រជុំ។
មាត្រា ១៩ នៃកតិកាសញ្ញាអន្តរជាតិបានចែងថា៖ ១-ជនគ្រប់រូបមានសិទ្ធិប្រកាន់យកមតិយោបល់ដោយគ្មានការជ្រៀតជ្រែក។ ២-ជនគ្រប់រូបមានសិទ្ធិសេរីភាពក្នុងការបញ្ចេញមតិ។ សិទ្ធិនេះត្រូវរាប់បញ្ចូលទាំងសេរីភាព ស្រាវជ្រាវព័ត៌មាន ទទួល និងផ្សព្វផ្សាយព័ត៌មាន និងគំនិតសព្វបែបយ៉ាងដោយមិនគិត ពីព្រំដែនដោយផ្ទាល់មាត់ សរសេរ ឬបោះពុម្ពតាមទម្រង់តាមសិល្បៈក្តី ឬដោយមធ្យបាយ ផ្សព្វផ្សាយដ៏ទៃក្តី តាមការជ្រើសរើសរបស់ខ្លួន។
មាត្រា ២០ នៃច្បាប់របបសារព័ត៌មាន៖ អំពើប្រព្រឹត្តរបស់និយោជន និពន្ធនាយក ឬអ្នកនិពន្ធអត្ថបទ ដែលរំលោភច្បាប់ព្រហ្មទណ្ឌ ត្រូវទទួលទោសតាមច្បាប់ព្រហ្មទណ្ឌ។ ប៉ុន្តែទោះជាយ៉ាងណាក៏ដោយ ក៏គ្មានជនណាម្នាក់ត្រូវចាប់ចង ឬដាក់ពន្ធនាគារ ដោយសារការបញ្ចេញមតិឡើយ។
ពាក់ព័ន្ធករណីខាងលើនេះ កម្ពុជាសុវណ្ណភូមិ មិនទាន់អាចសុំការពន្យល់ពីលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្តសៀមរាបបានទេ ថាអ្នកណាជាដើមបណ្តឹង ព្រោះថ្ងៃទី០៦នេះជាថ្ងៃដែលពលរដ្ឋកម្ពុជា និងមន្រ្តីរាជការសំរាកប្រារព្ធពិធីបុណ្យ ច្រត់ព្រះនង្គ័ល។
លោក ប៉ាតសុខ ចាងហ្វាងកាសែត ព្រះច័ន្ទកម្ពុជា សូមសំនូមពរទៅលោក សំរិទ្ទ សុខុន ព្រះរាជអាជ្ញារងអមសាលាដំបូងខេត្តសៀមរាប និង លោក កើត វណ្ណរ៉េត ព្រះរាជអាជ្ញាសាលាដំបូងខេត្តសៀមរាប មេត្តាកុំធ្វើការចោទប្រកាន់រូបលោក ពីបទបរិហាកេរ្តិ៍ខាងលើ ព្រោះដើមបណ្តឹងមិនបានសរសេរលិខិតមករូបលោក ឬនិពន្ធ នាយករបស់លោក អោយធ្វើការបកស្រាយបំភ្លឺនោះទេ៕ ដោយ៖ ផ្លុង-រ៉េត
.jpg)
.jpg)
.jpg)
.jpg)
.jpg)
.jpg)
.jpg)
.jpg)
