អស់រយៈពេលជាយូរឆ្នាំណាស់មកហើយជំងឺអសកម្ម និងភាពកំសោយរបស់អាជ្ញាធរខេត្តសៀមរាប និងរដ្ឋបាលជលផល ដែលជាមន្រ្តីជំនាញ នៅតែកើតមានឡើងតាំងពីអាណត្តិរបស់លោក ស៊ូ-ភិរិន រហូតមកដល់លោក ឃឹម-ប៊ុនសុង ធ្វើជាចៅហ្វាយខេត្ត ពីលោកទឹម-សាវុធ រហូតដល់លោក ព្រិន-សាវិន ធ្វើជានាយខណ្ឌជលផល គេសង្កេតឃើញថា ការចិញ្ចឹមត្រីឆ្តោរខុសច្បាប់របស់ជនជាតិយួននៅតែបន្តដោយរលូនពីមួយឆ្នាំទៅមួយឆ្នាំដោយមិនមានអស់លោកអ្នកធំណាមានសមត្ថភាពបង្ក្រាបអោយបានជោគជ័យនទាល់តែសោះ។
បើយោងតាមប្រភពពីប្រជារាស្រ្តនៅខេត្តសៀមរាបបានអោយដឹងថា ការចិញ្ចឹមត្រីឆ្តោរកំពុងតែពេញនិយមនៅខេត្តសៀមរាប ដោយថៅកែចិញ្ចឹមត្រីទាំងអស់នោះកំពុងតែបំផ្លាញកូនត្រីតូចៗរាប់រយតោនក្នុងមួយថ្ងៃៗដើម្បីយកទៅធ្វើជាចំណីត្រីឆ្តោររបស់ពួកគេ នៅរដូវបិតឡូល៍នេសាទក្នុងរដូវត្រីពងកូន។ ប្រភពបានបន្តថា ជនជាតិយួនដែលចិញ្ចឹមត្រីឆ្តោរទាំងនោះសុទ្ធតែមានខ្នងបង្អែកមានខ្សែស្រឡាយ មិនតែប៉ុណ្ណោះពលរដ្ឋសង្ស័យថា ប្រហែលជាមានការសូកប៉ាន់លុយក្រោមតុអោយមន្រ្តីជំនាញពីសំណាក់ថៅកែចិញ្ចឹមត្រី ទើបបទល្មើសមួយនេះនៅតែកើតឡើងជាហូរហែរ ហើយដោយរលូនគ្មានការរំខានអ្វីទាល់តែសោះ។
ពលរដ្ឋបានលួចបង្ហើបពីល្បិចរបស់ថៅកែចិញ្ចឹមត្រីឆ្តោរ និងមន្រ្តីជំនាញថា ប្រសិនបើមានពលរដ្ឋណារាយការណ៍អោយសមត្ថកិច្ចទៅបង្ក្រាបទីតាំងចិញ្ចឹមត្រីឆ្តោរទាំងនោះគឺ សមត្ថកិច្ចយកលេសអោយម្ចាស់ត្រីធ្វើកិច្ចសន្យាឈប់ចិញ្ចឹមត្រីឆ្តោរទៀតនៅឆ្នាំក្រោយ ហើយត្រីដែលនៅក្នុងបែ ឬក្នុងស្រះដែលកំពុងចិញ្ចឹមនោះ ត្រូវធ្វើកិច្ចសន្យាទុករហូតដល់ធំត្រូវចាប់លក់អោយអស់ ក្នុងកំលុងពេល៣ទៅ៦ខែជាដើម។ ឆ្នាំក្រោយចូលមកដល់ ថៅកែចាស់ឈប់ចិញ្ចឹមមែន តែគេរកបងប្អូនសាញ់ញាតិចេញមុខចំនួសវិញម្តង។ ពលរដ្ឋហៅថា ទង្វើទាំងអស់នេះដូចការវែកចកក្នុងបឹងអញ្ចឹង ហើយល្បិចបែបនេះកូនក្មេងថ្នាក់ទី៣ក៏វាដឹងដែរ ចាស់ៗតែងហៅថា ជាល្បិចតាស៊ីក្លូបោកបានតែក្មេងបៀមដៃតែប៉ុណ្ណោះ។
ពលរដ្ឋខេត្តសៀមរាបយល់ឃើញថា នៅឋានព្រះច័ន្ទគេអាចទៅដល់ ចុះគ្រាន់តែត្រីឆ្តោរនៅក្នុងស្រះ ឬក្នុងបែចិញ្ចឹមហេតុអ្វីបង្ក្រាបមិនបាន គ្រាន់តែចាប់វាយកទៅចាក់ចោលនៅទន្លេសាបទាំងតូចទាំងធំអោយអស់ទៅវាស្រេចទៅបាត់ទៅហើយ នៅឆ្នាំក្រោយចិញ្ចឹមទៀតចាប់ចាក់ចោលទៀតនោះអ្នកចិញ្ចឹមអស់លុយរាងចាលឈប់ចិញ្ចឹមបាត់ទៅហើយ។
ពលរដ្ឋរិះគន់ថា អស់លោកមន្ត្រីក្រោមឱវាតរបស់រដ្ឋាភិបាល នាំគ្នាស៊ីប្រាក់ខែរដ្ឋមិនខំប្រឹងជួយស្តាប្រទេសជាតិ ជួយលុបបំបាត់អំពើពុករលួយ បែជានាំគ្នាលួចស៊ីសំណូកសូកប៉ាន់ក្រោមតុគ្រាក់ៗ បែបនេះទៅវិញ ដែលជាហេតុធ្វើអោយថ្នាក់ដឹកនាំ អាប់មុខអាប់មាត់ដោយសាតែមន្រ្តីក្រោមឱវាតមួយក្តាប់តូចនេះ។
ពលរដ្ឋខេត្តសៀមរាបចោទសួរថា ឬមួយគ្រាន់តែបង្រ្កាបបទល្មើសចិញ្ចឹមត្រីឆ្តោរខុសច្បាប់ប៉ុណ្ណឹង ចាំអោយលោកនាយករដ្ឋមន្ត្រី ហ៊ុន-សែន មកបង្ក្រាប ឬចាំអោយលោកនាយករដ្ឋមន្រ្តី ហ៊ុន-សែន ស្រែកតាមទូរទស្សន៍ទើបលោក ព្រិន-សាវិន នាយខណ្ឌរដ្ឋបាលជលផល និងលោក ឃឹម-ប៊ុនសុង អភិបាលខេត្តសៀមរាបចេញមុខបង្ក្រាប???
លោក ហ៊ុន-សែន នាយករដ្ឋមន្រ្តីនៃព្រះរាជាណាចក្រកម្ពុជាបានប្រកាសបិទឡូល៍នេសាទ ដើម្បីអោយត្រីសម្បូរទុកអោយរាស្រ្តខ្មែរប្រកបរបរនេសាទចិញ្ចឹមគ្រួសារ តែឥឡូវបិទឡូល៍នេសាទហើយត្រីនៅតែរលាយគ្មានសល់ដោយសាការនេសាទខុសច្បាប់ ទាំងខ្មែរ ទាំងយួន។ បើសង្ឃឹមទៅលើមន្ត្រីក្រោមឱ បែជាលួចពួនស៊ីក្រោមតុ បើតែបែបនេះទៅ តើប្រទេសជាតិនិងក្លាយទៅជាយ៉ាងណា??? មានបានតែពួកក្បត់ជាតិ មានតែពួករកស៊ីខុសច្បាប់ ឯរាស្រ្តខ្មែរស្លូតត្រង់ រកស៊ីល្លូតត្រង់នៅតែក្រដដែល។
ពលរដ្ឋខេត្តសៀមរាបក៏កំពុងតែរងចាំមើលផងដែរថា បន្ទាប់ពីគណបក្សសង្គ្រោះជាតិចូលសភារួចមកកន្លងទៅថ្មីៗនេះ តើគណបក្សសង្គ្រោះជាតិអាចធ្វើអ្វីបានខ្លះ? តើគណបក្សសង្គ្រោះជាតិខេត្តសៀមរាបដែលមានលោកស្រី កែវសូវណ្ណរត៍ ជាប្រធាន លោក សុខគឹមសេង ជាប្រធានក្រុមប្រឹក្សា អាចមានសមត្ថភាពក្នុងការចុះបង្រ្កាបការចិញ្ចឹមត្រីឆ្តោរខុសច្បាប់ទាំងនោះតាមការស្នើសុំរបស់ពលរដ្ឋក្នុងខេត្តនេះបានដែរឬទេ?៕ ដោយ៖ផ្លុង-រ៉េត
.jpg)
.jpg)
.jpg)
.jpg)
.jpg)
.jpg)
.jpg)
.jpg)
.jpg)
