លោកប្រាក់ចាន់ធឿន នាយរងកងរាជអាវុធហត្ថមួយរូបក្នុងជួរកងរាជអាវុធហត្ថខេត្តសៀមរាប បានដឹកឈើយកមកធ្វើផ្ទះ ដោយប្រើរថយន្តធំៗអស់រយៈពេលជិត១ឆ្នាំហើយ នៅតែធ្វើផ្ទះមួយខ្នងមិនគ្រប់ ដែលធ្វើអោយសមត្ថកិច្ចពាក់ព័ន្ធសង្ស័យថា ប្រហែលជាលោកអាចចល័តឈើលក់ចេញក្រៅបន្ត ឬអាចមានឈ្មួញរកស៊ីដឹកឈើនៅពីក្រោយខ្នងសុំខ្ចីឈ្មោះរបស់លោកប្រើ និងខ្ចីផ្ទះដាក់ឈើបណ្តោះអាសន្តសិនជៀសវាងសមត្ថកិច្ចតាមប្រមាញ់។
បើតាមការអង្កេតរយៈពេលជិត១ឆ្នាំកន្លងទៅនេះ លោកប្រាក់ចាន់ធឿន បានប្រើឈ្មោះជាប៉េអឹមចូលនិវត្សន៍ ហើយសុំសមត្ថកិច្ចតាមដងផ្លូវដឹកឈើយកមកធ្វើផ្ទះនៅចំណុចភូមិសណ្តាន់ សង្កាត់ទឹកវិល ក្រុងសៀមរាប ខេត្តសៀមរាប ជាហូរហែមួយរថយន្តហើយ១រថយន្តទៀត មិនចេះអស់ មិនចេះគ្រប់សោះ។
ជាក់ស្តែងកាលពីយប់ថ្ងៃទី១៣ខែតុលាឆ្នាំ២០១២ មានរថយន្តម៉ាកកូរ៉េ៥តោន១គ្រឿងដឹកឈើពីស្រុកអន្លង់វែង ខេត្តឧត្តរមានជ័យសំដៅមកក្រុងសៀមរាប ដែលរថយន្តនេះត្រូវបានគេស្គាល់ថា សំបករថយន្តជារបស់លោក យិនថាវ ថៅកែរកស៊ីដឹកឈើដ៏ធំជាងគេមួយក្នុងខេត្តសៀមរាប។
ពាក់ព័ន្ធនិងរថយន្តដឹកឈើខាងលើនេះ លោកប៉េអឹមសក្តិ៍៣មួយរូបឈ្មោះ សៅសុខា ដែលជាអ្នកបើករថយន្តសារ៉ែនបិតស្លាកកងរាជអាវុធហត្ថខេត្តសៀមរាប ដែលជាអ្នកតាមជូនដំណើររថយន្តដឹកឈើខាងលើ បានអះអាងថា រថយន្តដឹកឈើខាងលើនេះជារបស់ លោកប្រាក់ចាន់ធឿន ដឹកឈើយកទៅធ្វើផ្ទះ។
លោក ប្រាក់ចាន់ធឿន បានប្រាប់កម្ពុជាសុវណ្ណភូមិ នៅរសៀលថ្ងៃទី១៤ខែតុលាថា ឈើដែលដឹកកាលពីយប់ថ្ងែទី១៣ឈានចូលទី១៤នោះ ជាឈើដែលលោកបានដើរសុំគេតាមក្រុមហ៊ុនពីខេត្តព្រះវិហារ យកទៅធ្វើផ្ទះពិតប្រកដមែន។
ឯកឧត្តម ម៉នសាម៉ុន មេប៉េអឹមខេត្តសៀមរាប បានប្រាប់តាមទូរស័ព្ទនៅរសៀលដដែលថា លោកប្រាក់ចាន់ធឿនពិតជាដឹកឈើយកទៅធ្វើផ្ទះមែន ព្រោះគាត់ចាស់ហើយ ដល់អាយុចូលនិវត្សន៍ គ្មានលុយឯណាទៅទិញឈើអីធំដុំទេ គឺគាត់សុំឈើគេយកទៅធ្វើផ្ទះមែន។
នៅរសៀលថ្ងៃទី២៥ខែតុលាម្សិលមិញមានប្រភពព័ត៌មានរាយការណ៍ថា មានរថយន្តម៉ាកកូរ៉េ៥តោនពណ៍ខៀវ បានកំពុងប្រមូលលើកឈើតាមផ្ទះប្រជាពលរដ្ឋជាច្រើនកន្លែង ពីចំណុច ភូមិត្រពាំងក្រសាំង ស្រុកវារិន ខេត្តសៀមរាប ដែលជាតំបន់គូលេនព្រហ្មទេព តំបន់ហាមឃាត់។ ប្រភពបន្តថា កន្លែងដែលរថយន្តកំពុងលើកឈើនេះ ជាកន្លែងដែលលោក យិនថាវ ធ្លាប់បានទៅប្រមូលទិញឈើអស់រយៈពេលជាយូឆ្នាំណាស់មកហើយ តែរថយន្តខាងលើនេះគេមិនច្បាស់ថាជារបស់អ្នកណានោះទេ។
លុះម៉ោងប្រហែល១០យប់ថ្ងៃទី២៥ដដែលនេះ មានអ្នកកាសែត១រូបនៅឃុំស្រែណូយបានអោយដឹងថា លោកប៉េអឹមសៅសុខា បានប្រាប់ពួកគាត់ថា យប់នេះនិងមានរថយន្តដឹកឈើរបស់លោក ប្រាក់ចាន់ធឿន ដឹកឈើយកទៅធ្វើផ្ទះ១រថយន្តទៀត។
រថយន្តដឹកឈើ១គ្រឿងក្រោយនេះបានធ្វើដំណើរដោយរលួនដោយមានរថយន្តប៉េអឹមតាមជូនផ្លូវតាំងពីកន្លែងលើកឈើរហូតដល់ផ្ទះលោកប្រាក់ចាន់ធឿននៅម៉ោង៧ព្រឹកថ្ងៃទី២៦ ហើយរថយន្តនេះដឹកឈើវែង ច្រងេងច្រងាង ស្ទះចរាចរណ៍ពេញផ្លូវជាតិលេខ៦ទាំងព្រឹក។
កម្ពុជាសុវណ្ណភូមិ បានព្យាយាមរាយការណ៍ និងសុំការបំភ្លឺពីលោក ទាគឹមសុទ្ធនាយខណ្ឌរដ្ឋបាលព្រៃឈើខេត្តសៀមរាបនៅព្រឹកដដែលនេះ តែលោកមិនលើកទូរស័ព្ទពេលទូរស័ព្ទខលចូល។
ប្រភពប្រជាពលរដ្ឋនៅក្នុងភូមិសណ្តាន់ បានលូចខ្សឹមប្រាប់ថា ពួកគាត់តែងតែឃើញមានរថយន្តធំៗមកដឹកឈើចេញពីផ្ទះរបស់លោក ប្រាក់ចាន់ធឿន រូចបើកទៅទិសខាងលិច តែរហូតបន្ទាប់ពីរថយន្តដឹកឈើដឹកដាក់ផ្ទះគាត់បាន២-៣ថ្ងៃ ដែលធ្វើអោយពួកគាត់សង្ស័យថា យកលេសដឹកឈើមកធ្វើផ្ទះខ្លះ លួចដឹកចេញទៅលក់ខ្លះ។
ពាក់ព័ន្ធទៅនិងការសង្ស័យរបស់ពលរដ្ឋថា លោកប្រាក់ចាន់ធឿន ដឹកឈើដែលយកមកធ្វើផ្ទះយកទៅលក់ចែកចាយបន្តនោះ លោកប្រាក់ចាន់ធឿន បានអះអាងប្រាប់កម្ពុជាសុវណ្ណភូមិ នាព្រឹកថ្ងៃទី២៦ដដែលនេះថា លោកបានដឹកចេញមែន ព្រោះលោកជំពាក់ឈើគេកាលពីរដូវវស្សា ឥឡូវត្រូវដឹកយកទៅសងគេខ្លះៗជាបន្តបន្ទាប់ មិនមែនដឹកយកទៅលក់ទេ។
បើទោះបីជាលោកប្រាក់ចាន់ធឿនបានបដិសេធពីការពាក់ព័ន្ធជាមួយឈ្មួញរកស៊ីដឹកឈើ ឬបដិសេធថា មិនបានដឹកឈើយកទៅលក់បន្តយ៉ាងណាក៏ដោយ ក៏មជ្ឈដ្ឋានប្រជាពលរដ្ឋ និងស្ថាប័ណពាក់ព័ន្ធមួយចំនួនបានរិះគន់ថា ពូកគាត់មិនជឿសម្តីដោះសារបស់លោក ចាន់ធឿនទេ។ ពលរដ្ឋរិះគន់ទៀតថា បើអ្នកក្រគ្មានអំណាចដឹក អុស ដឹកធ្យូង ដឹកឈើតិចទូច យកមកធ្វើលំនៅដ្ឋាន សមត្ថកិច្ចតាមដងផ្លូវ ចោមរោមចាប់រឹបអូសទាំងមធ្យោបានដឹងជញ្ជូនយកទៅទុកនៅខណ្ឌរដ្ឋបាលព្រៃឈើរហូតពុករលួយអស់ តែអ្នកធំមានអំណាច មានបក្ស មានពួកចង់ដឹក១លានឡានក៏គ្មានអ្នកណាគេអើពើអីដែរ។ ពូកគាត់បន្ថែមថា បើអ្នកធ្វើការមន្រ្តីរាជការជាអ្នកកាន់ច្បាប់មិនដែលគោរពច្បាប់ផង តើអោយរាស្រ្តណាគេគោរពច្បាប់ទៅ៕
.jpg)
.jpg)
.jpg)
.png)
.jpg)
.jpg)
.JPG)
.jpg)
