ដោយឃើញតារាផ្សេងជាច្រើនមានរបរបើកភោជនីយដ្ឋាន សម្អាងការ ហាងលក់សម្លៀកបំពាក់ ហាងកាត់សក់ នៅពីក្រោយខ្នងក្រៅពីអាជីពជាសិល្បនោះ នាំអោយអ្នកចំរៀង ពៅ សុជាតា មានអារម្ភចង់បើកហាង១ផងដែរ តែមិនមានលទ្ធភាពគ្រប់គ្រាន់ ទើបនាងបានបង្ហើបអោយដឹងថា នាងមានបំណងទៅលក់សំលេងនៅអាមេរីក ដើម្បីយកមកបើកហាងឱ្យបាន នៅដើមឆ្នាំ២០១៣ នេះ។
កាលពីប៉ុន្មានឆ្នាំមុននាងពៅ សុជាតា ក៏ជាតារាចម្រៀងបែបមនោសញ្ចេតនាមួយរូបរបស់ផលិតកម្មឆ្លងដែន ហើយក៏ជាដៃគូចម្រៀងដ៏ស័ក្តិសមជាមួយតារាចម្រៀងប្រុសដ៏ល្បីល្បាញគឺលោក ឯក ស៊ីដេ ទៀតផង។ការទទួលបានភាពល្បីល្បាញនៅឯនាយសមុទ្ររបស់អ្នកចម្រៀងពៅ សុជាតា នេះហើយទើបធ្វើឱ្យនាងមានឱកាសបានចេញទៅច្រៀងនៅឯនាយសមុទ្រ ជាបន្តបន្ទាប់ នាពេលកន្លងទៅ។ ប៉ុន្តែមួយរយៈចុងក្រោយនេះគេមិនសូវឃើញនាងបង្ហាញខ្លូនទេ យូរៗគេឃើញ សុជាតា ឡើងច្រៀងនៅតាមកញ្ចក់ទូរទស្សន៍ម្តងម្កាលប៉ុណ្ណោះ។ សូម្បីតែឱកាសចេញទៅច្រៀងនៅឯក្រៅប្រទេស ដូចមុនក៏ពុំសូវមានដែរ ដែលជាហេតុធ្វើអោយអ្នកធ្លាប់គាំទ្រទៅលើរូបនាង មានការសង្ស័យថា ប្រហែលជានាងមានបញ្ហាអ្វីម្យ៉ាង។
កាលពីចុងខែកញ្ញា ២០១២ ពៅសុជាតា បានប្រាប់ “តារា” នៅ CTN ថា សព្វថ្ងៃនេះឃើញគេមានមុខរបររកស៊ីបន្ថែមលើអាជីពសិល្បៈ នាងក៏ចង់បើកហាងមួយដូចគេដែរ ព្រោះគិតថា អាជីពចម្រៀងវាមិនឋិតថេរចេរកាលអស់មួយជីវិតនោះទេ កាលណាមានវ័យជ្រេបន្តិច សំលេងក៏ធ្លាក់ចុះ សម្រស់ក៏ជ្រៀវជ្រួញ កំលាំងក៏ទន់ខ្សោយនោះ គឺវាចប់បាត់ទៅហើយ ណាមួយសព្វថ្ងៃ តារាវ័យក្មេងសំឡេងពីរោះរីកដូចផ្សិតឥតឈប់ឈរ។ ហេតុដូច្នេះហើយ នាងត្រូវតែចាប់ឱ្យបាននូវមុខរបររកស៊ីមួយឱ្យច្បាស់លាស់ ទើបមិនមានការព្រួយបារម្ភទៅថ្ងៃអនាគត។
សុជាតា បានប្តេជ្ញាថា “ខ្ញុំមានបំណងមិនគ្រប់គ្រាន់ ប៉ុន្តែនៅដើមឆ្នាំ២០១៣ ខាងមុខនេះខ្ញុំនឹងបើកហាងកាត់សក់ ឱ្យបានចេញជារូបរាង បើទោះបីជាតូចឬធំក៏ដោយ”។
សំនួរសួរថា ហេតុអ្វីបានជាពេលនេះនាងបានប្តេជ្ញា នៅក្នុងចិត្តហាក់ដូចជាជឿជាក់ និងមានសង្ឃឹមម៉្លេះ? សុជាតា សើចបន្តិច រួចឆ្លើយតបយ៉ាងរហ័សថា “ខ្ញុំប្តេជ្ញា បែបនេះដោយសារតែខ្ញុំកំពុងតែត្រៀមទៅសម្តែងនៅអាមេរិកកាំងរយៈពេលរហូតដល់ទៅជិត៣ខែឯណោះ។ ដូច្នេះហើយទើបខ្ញុំសង្ឃឹមថា អាចសន្សំប្រាក់នៅអាមេរិក នោះយកមកបើកហាងរបស់ខ្ញុំ។ ខ្ញុំមានការជឿជាក់ថានឹងទទួលបានជោគជ័យច្រើន ព្រោះខ្ញុំទៅលើកនេះគឺបានចាប់ដៃគូច្រៀងជាមួយដៃគូចាស់របស់ខ្ញុំ គឺបង ឯកស៊ីដេ ដែលបានបែកគ្នាជាច្រើនឆ្នាំមកហើយនោះ”។
បើនិយាយពីរឿងស្នេហា គេនៅចាំបានថា កន្លងមក សុជាតា ធ្លាប់លេចឮថា មានសម្ព័ន្ធស្នេហាជាមួយលោក លីឧត្តម កាលនៅធ្វើជាពិធីករ និងពិធីការិនីជាមួយគ្នានៅស្ថានីយទូរទស្សន៍អប្សរា។ ក្រោយមកទៀត បន្ទាប់ពីនាងចាប់ផ្តើមល្បីឈ្មោះនៅក្នុងផលិតកម្មឆ្លងដែន ហើយបានចេញទៅច្រៀងនៅឯក្រៅស្រុក ជាបន្តបន្ទាប់នោះ សុជាតា ក៏ជួបបុរសនៅកាណាដា ធ្វើជាសង្សារាប់ឆ្នាំ ហើយនាងក៏សង្ឃឹមថា នឹងបានរៀបការជាមួយគ្នា តែទីបំផុត ត្រូវបែកគ្នាវិញហើយរហូតមកដល់សព្វថ្ងៃនេះ គ្មានអ្នកណាដឹងថា ពៅសុជាតា បេះដូងនៅទំនេរ ឬក៏មានម្ចាស់គ្រប់គ្រងថ្មីហើយឬយ៉ាងណានោះទេ។
សុជាតា បានបដិសេធថា សព្វថ្ងៃនាងគ្មាសង្សាទេ សូម្បីបុរសនៅក្នុង ឬក្រៅប្រទេសក៏ដោយ តែទោះជានាងមានឬគ្មានក៏ដោយ វាជារឿងរបស់នាងតែប៉ុណ្ណោះ ប៉ុន្តែការស្រលាញ់ពេញចិត្តពីសំណាក់បុរសជាច្រើនទៅលើរូបនាងក៏មានមិនតិចនោះទេ។ ជាពិសេសបុរស់នៅឯនាយសមុទ្រ តែងតែប្រាថ្នាចង់បានរូបនាងជាគូស្នេហ៍ បើទោះជាពួកគេបានឃ្លាតចាកទឹកដីកម្ពុជាក៏ដោយ ក៏ពួកគេនៅតែស្រលាញ់ទឹកដីកំណើត នៅតែស្រលាញ់ស្រ្តីខ្មែរជានិច្ច ព្រោះស្រ្តីខ្មែរភាគច្រើនប្រកបដោយ ចរិតគ្រប់លក្ខណ៍ សុភាពរាបសា គោរពប្រពៃណី វប្បធម៌បានល្អខ្ជាប់ខ្ជួនជានិច្ច៕
.jpg)
.jpg)
.jpg)
.png)
.jpg)
.jpg)
