ឈ្មួញរកស៊ីដឹកឈើប្រណិតវ័យក្មេងម្នាក់ឈ្មោះ ហាក់ កំពុងរកស៊ីដឹកឈើពីគ្រប់ច្រកល្ហកចូលមកលក់ចែកចាយនៅក្នុងក្រុងសៀមរាបគ្មានសមត្ថកិច្ចណាចេញមុខបង្ក្រាប មានតែសមត្ថកិច្ចបើកដៃ អោយរកស៊ី ដើម្បីយកលុយដាក់ហោប៉ៅតែប៉ុណ្ណោះ។
ប្រភពព័ត៌មានបានអោយដឹងថាឈ្មោះ ហាក់ មានវ័យប្រហែលជាង៣០ឆ្នាំ មានស្រុកកំណើតនៅស្រុកសូត្រនិគម ខេត្តសៀមរាប បច្ចុប្បន្នស្នាក់នៅភូមិជន្លង់ សង្កាត់សាលាកំរើក ក្រុងសៀមរាប។
ប្រភពបានបន្តទៀតថាឈ្មោះ ហាក់ នេះធ្លាប់បានប៉ុនប៉ងសំស្លាប់អ្នកកាសែតម្នាក់ឈ្មោះ ទុំម៉ោង កាលពីបីបួនឆ្នាំមុននៅឯស្រុកសូត្រនិគម ដោយយកពូថៅទៅលួចកាប់ក្បាលអ្នកកាសែតខណៈអ្នកកាសែតរូបនោះកំពុងដេកនៅក្នុងអង្រឹងដោយការគុំគួនព្រោះអ្នកកាសែតធ្លាប់បានចុះផ្សាយការរកស៊ីដឹកឈើរបស់ខ្លួន ហើយលោក ទុំម៉ោង អ្នកកាសែតរងគ្រោះបានដាក់ពាក្យប្តឹងទៅតុលាការខេត្តសៀមរាប ប៉ុន្តែមិនទទួលបានភាពយុត្តិធម៌ទេ រហូតមកដល់ខែមេសាឆ្នាំ២០១៦នេះលោក ទុំម៉ោង បានស្លាប់បាត់បង់ជីវិតដោយភាពអយុត្តិធម៌បាត់ទៅ។
ជាក់ស្តែងនៅល្ងាចថ្ងៃទី២៤ ខែឧសភា ឆ្នាំ២០១៦ម្សិលមិញនេះ រថយន្តម៉ាកកាមរីហើមពណ៍សមួយគ្រឿងរបស់លោក ហាក់ បានដឹកឈើប្រណិតពេញព្រៀពបើកបរពីស្រុកស្វាយលើ មកក្រុងសៀមរាបលុះដល់ចំណុចភូមិស្វាយធំ ឃុំកណ្តែក ស្រុកប្រាសាទបាគង ក៏បុករថយន្តប្រជាពលរដ្ឋអ្នកធ្វើដំណើរ២គ្រឿងផ្សេងទៀត ហើយតៃកុងឡានរបស់លោកហាក់បានរតចោលឡានបាត់ទៅ។
អ្នកយកព័ត៌មានយើងបានអោយដឹងថា នៅពេលប៉ូលីសចរាចរណ៍ស្រុកប្រាសាទបាគងទៅដល់កន្លែងកើតហេតុ លោកហាក់ជាម្ចាស់រថយន្តដឹកឈើក៏ទៅដល់ព្រមគ្នាដែរ ដើម្បីធ្វើការចចារជាមួយភាគីខាងរថយន្តរងគ្រោះ២គ្រឿងទៀតដើម្បីបញ្ចប់រឿង តែដោយចចារតំលៃគ្នាមិនត្រូវទើបសមត្ថកិច្ចនាំយករថយន្តទាំងនោះទៅអធិការស្រុកប្រាសាទបាគង រួមទាំងរថយន្តដឹកឈើខាងលើរបស់លោកហាក់ផង។ អ្នកយកព័ត៌មានយើងបានបន្ថែមថា គាត់បានរាយការណ៍ទៅលោក យឹមស៊ីវន នាយសង្កាត់រដ្ឋបាលព្រៃឈើដែរ ហើយលោកយឹមស៊ីវនបានប្រាប់ថា ចាំអោយកូនចៅទៅមើល តែបាត់ស្រម៉ោលឈឹងមិនឃើញមេព្រៃណាទៅមើលទេ មានតែប៉ូលីសចរាចរណ៍និងអ្នកកាសែត២រូបតែប៉ុណ្ណោះ។
សូមរំលឹកផងដែរថា កាលពីថ្ងៃទី១១ ខែឧសភា ឆ្នាំ២០១៦ថ្មីៗនេះ រថយន្តម៉ាកកាមរីហើម១គ្រឿងរបស់លោកហាក់ដឹកឈើប្រណិតពេញព្រៀពដូចគ្នាបានបែកកង់នៅចំណុចភូមិស្វាយធំខាងលើដូចគ្នាដែរ ហើយខណៈនោះមានសមត្ថកិច្ច៣ស្ថាប័ណទៅអូសយករថយន្តដឹកឈើនោះមកកន្លែងស្ងាត់ ហើយចចារយកលុយអស់៣រយដុល្លារជាថ្នូរនិងការដោះលែងរថយន្តដឹកឈើនោះទៅវិញ នេះបើយោងតាមប្រភពព័ត៌មានសូមមិនបញ្ចេញឈ្មោះ។ អ្នកយកព័ត៌មានយើងបានព្យាយាមសាកសួរសមត្ថកិច្ច៣ស្ថាប័ណនោះដែរនៅថ្ងៃកើតហេតុ តែអ្នកខ្លះមិនលើកទូរស័ព្ទ ឯអ្នកខ្លះទៀតឆ្លើយថា មិនបានយកលុយទេ ដែលជាហេតុធ្វើអោយពលរដ្ឋឆ្ងល់ថា បើមិនបានយកលុយមេចមិនចាប់ឡានដឹកឈើក្នុងនាមខ្លួនជាអ្នកធ្វើការបង្ក្រាបបទល្មើសព្រៃឈើ?
នៅព្រឹកម៉ោង១១ថ្ងៃទី២៥នេះ លោក យឹមស៊ីវន នាយសង្កាត់រដ្ឋបាលព្រៃឈើក្រុងសៀមរាបបានប្រាប់តាមទូរស័ព្ទថា រថយន្តដឹកឈើរបស់លោក ហាក់ ទុកនៅអធិការស្រុកបា្រសាទបាគងព្រោះពាក់ព័ន្ធនិងបង្ករគ្រោះថ្នាក់ចរាចរណ៍ ឯឈើប្រភេទផ្ចឹកដែលមានមុខកាត់ធំ (ជាឈើប្រភេទលេខ១) ដែលជាវត្ថុតាងបានយកទៅរក្សាទុកនៅផ្នែករដ្ឋបាលព្រៃឈើស្រុកបន្ទាយស្រី ហើយខាងមន្ត្រីរដ្ឋបាលព្រៃឈើកំពុងតែវ៉ាស់វែងពុំទាន់ដឹងថា មានចំនួនប៉ុន្មាននៅឡើយទេ។
ពលរដ្ឋខេត្តសៀមរាបបានរិះគន់ថា លោក ទាគឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាប និងមន្ត្រីរដ្ឋបាលព្រៃឈើក្រោមឱវាទរបស់លោក គួរតែរឹតបន្តឹងបន្ថែមនូវរាល់បទល្មើសព្រៃឈើដែលដឹកចូល ឬឆ្លងកាត់ខេត្តសៀមរាប ព្រោះនេះជាតួនាទីរបស់ខ្លួនដែលត្រូវធ្វើ៕ ដោយ៖ ផ្លុងរ៉េត
.jpg)
.jpg)
.jpg)
.png)
.jpg)
.jpg)
.jpg)
