ប្រជាជនខ្មែរមួយចំនួនតែងមានជំនឿថា បើថ្ងៃខែឆ្នាំណាគេរកស៊ីមានបានទ្រព្យធនហូរចូល ឡើងបុណ្យឡើងសក្តិ ឡើងប្រាក់ខែ នោះគេតែងនិយាយថា ថ្ងៃខែឆ្នាំនេះរាសីឡើងខ្ពស់ ឬយីអ៊ុនឡើង តែបើគេរកស៊ីខាតបង់ ធ្លាក់បុណ្យធ្លាក់សក្តិ ធ្លាក់ប្រាក់ខែ ឬបាត់បង់កិត្តិយស បាត់បង់ប្រជាប្រិយភាពនោះគេតែងពោលថា ថ្ងៃខែឆ្នាំនេះរាសីស្រុតចុះ ឬយីអ៊ុនដាក់ហ្នឹងហើយ។
ពលរដ្ឋកម្ពុជាភាគច្រើនគោរពព្រះពុទ្ធសាសនា ហើយមួយចំនួនតូចគោរពព្រហ្មញ្ញសាសនា និងសាសនានានាជាដើម។ល។ អ្នកខ្លះចូលចិត្តយកទៀនធូបទៅគោរពបូរជាព្រះពុទ្ធបដិមា ដើម្បីសុំសេចក្តីសុខសប្បាយ អ្នកខ្លះចូលចិត្តរកគ្រូម៉ស្រោចទឹករំដោះគ្រោះលើករាសីដែលជាជំនឿតាមបែបព្រហ្មញ្ញសាសានាជាដើម។
ថ្ងៃទី២៧ កក្កដា ឆ្នាំ២០១៣ ជាថ្ងៃបោះឆ្នោតអាណត្តិទី៥ជ្រើសតាំងតំណាងរាស្រ្តនៅកម្ពុជា គេសង្កេតឃើញថា គណបក្សប្រជាជនកម្ពុជាដែលជាកណបក្សកាន់អំណាចដែលមានលោក ហ៊ុនសែន ជាស៊ីម ហេងសំរិន ជាអ្នកដឹកនាំនោះ បានបាត់បង់ប្រជាប្រិយភាព បាត់បង់កៅ អីនៅក្នុងរដ្ឋសភាជាច្រើន ហើយគណបក្សសង្គ្រោះជាតិដែលមានលោក សមរង្ស៊ី និងលោក គឹមសុខា ជាអ្នកដឹកនាំបានកើនកៅអីនៅក្នុងរដ្ឋសភាហួសពីការស្មាន។
នៅខែកក្កដា ឆ្នាំ២០១៥នេះលោក ហ៊ុនសែន បានប្រកាសអោយលោកឧកញ្ញា សុខប៊ុន ដែលជាអ្នកមានលុយរាប់រយលានដុល្លារ និងជាកូនប្រសារបស់លោក កែវជុតតិម៉ា អតីតអភិបាលក្រុងភ្នំពេញ អោយចូលខ្លួនមកដោះស្រាយតាមផ្លូវច្បាប់ បន្ទាប់ពីលោក សុខប៊ុន បានប្រើអំពើរហឹង្សាទៅលើកញ្ញា សាសា រួចបានរតគេចខ្លួនទៅក្រៅប្រទេសកម្ពុជា។ ការប្រកាសរបស់លោក ហ៊ុនសែន នេះធ្វើឡើងស្របពេលដែលប្រជាពលរដ្ឋកម្ពុជាកំពុងតែខឹងសម្បាចំពោះការប្រើហឹង្សារបស់លោកសុខប៊ុនដែលជាជនមានលុយមានអំណាចទៅលើស្ត្រីភេទទន់ខ្សោយ ហើយអោយមេធាវីរបស់ខ្លួនទៅចចារបញ្ចប់រឿងដោយប្រើទឹកប្រាក់។ ការប្រកាសរបស់លោក នាយករដ្ឋមន្ត្រី ហ៊ុនសែន នេះហាក់ធ្វើឡើងដោយយុទ្ធសាស្រ្តរុញទូកបណ្តោយទឹក ដើម្បីទាក់ទាញប្រជាប្រិយភាពពីពលរដ្ឋកម្ពុជា ជាពិសេសស្ត្រីភេទដែលគេចាត់ទុកថា ជាមាតាពិភពលោក។
បន្ទាប់ពីលោក នាយករដ្ឋមន្ត្រី ហ៊ុនសែន ប្រកាសអោយលោក សុខប៊ុន ចូលខ្លួនមកដោះស្រាយរឿងវិវាទជាមួយកញ្ញាសាសានោះ ប្រជាពលរដ្ឋកម្ពុជា សង្គមសីវិល ជាពិសេសអ្នកលេងបណ្តាញសង្គម (Facebook) បានធ្វើការវាយប្រហា រិះគន់ យ៉ាងចាស់ដៃទៅលើលោក ហ៊ុនសែន ថា ហាក់មានភាពលំអៀង និងជ្រៀតជ្រែករឿងតុលាការ ដោយគេយកករណីរឿងលោក ឈូកបណ្ឌិត អតីតអភិបាលក្រុងបាវិត ដែលបានបាញ់កម្មការីនីបីនាក់អោយរងរបួសស្ទើតែបាត់បង់ជីវិតទៅហើយនោះ ហើយសមត្ថកិច្ច តុលាការ មិនអាចចាប់ខ្លួនលោកឈូកបណ្ឌិតបានអស់រយៈពេលជាច្រើនឆ្នាំរហូតទល់ពេលបច្ចុប្បន្ននេះ។
អ្នកណាក៏គេដឹងដែរថា លោកឈូកបណ្ឌិត ជាក្មួយរបស់លោកជុំទាវ ម៉ែនសំអន ហើយលោកទំទាវម៉ែនសំអន ជាឧប្បនាយករដ្ឋមន្ត្រី ដែលអាចហៅបានថា ជាមន្ត្រីជាន់ខ្ពស់របស់រដ្ឋាភិបាលលោក ហ៊ុនសែន។
ពាក្យចាស់មួយឃ្លាបានពោលថា ˝បើវៃឆ្កែអោយមើលម្ចាស់˝ ប្រហែលជាដោយសារលោក ឈូកបណ្ឌិត ជាក្មួយរបស់លោក ជុំទាវ ម៉ែនសំអន នេះហើយ បានជាកន្លងមកលោកនាយករដ្ឋមន្ត្រី ហ៊ុនសែន មិនដាច់ចិត្តប្រកាសអោយគេចាប់ខ្លួនលោកឈូកបណ្ឌិតមកផ្តន្ទាទោសតាមផ្លូវច្បាប់ តែចុងក្រោយលោក ហ៊ុនសែន នៅតែប្រកាសអោយលោក ឈូកបណ្ឌិត ចូលខ្លួនមកទទួលទោសតាមផ្លូវច្បាប់ដដែល ទៅតាមការសំនូមពររបស់កម្មការីនី រោងចក្រដែលជាដើមបណ្តឹង និងតាមការសំនូមពររបស់ប្រជាពលរដ្ឋកម្ពុជា។ ករណីនេះដែលគេសង្គេតឃើញថា លោកនាយករដ្ឋមន្ត្រី ហ៊ុនសែន ហាក់ត្រូវបានគេកាត់កន្ទុយញាត់មាត់ ដែលមិនអាចនិយាយបាន ដូចពាក្យចាស់ពោលថា ˝ហាទៅវាស្លាក់ ខ្ជាក់ទៅវាស្លែង ស្តោះទៅវាត្រូវតែទ្រូងឯង˝។
កាលពីថ្ងៃទី០៣ ខែសីហា ឆ្នាំ២០១៥នេះ លោកនាយករដ្ឋមន្ត្រី ហ៊ុនសែន បានប្រើពាក្យសម្តីមិនសមរម្យទៅលើស្រ្តីភេទខណៈពេលដែលលោក ហ៊ុនសែន ទៅសម្ពោធស្ពានមិត្តភាព ចិន-កម្ពុជ តាខ្មៅ។ ពាក្យសម្តីប៉ុន្មានម៉ាត់ដែលលោក ហ៊ុនសែន បាននិយាយជាសាធារណៈនោះគឺ ˝មី មីស្រី មីស្រីមួយហ្នឹង ឬមីស្រីមីញី˝ ដោយលោកផ្តោតទៅលើ ឬអះអាងថា ស្រ្តីបឹងកកម្នាក់នោះ ដែលតែងតែប្រើហឹង្សាទៅលើសមត្ថកិច្ច និងក្រុមសន្តិសុខ ដោយប្រើជើងទាត់ធាក់ ដូចប្រុសៗអញ្ចឹង។
គេពុំដឹងថា ការប្រើពាក្យ ˝មី មីស្រី មីស្រីមួយហ្នឹង ឬមីស្រីមីញី˝ សម្តីប៉ុន្មានម៉ាត់របស់លោកផ្កាយ៥ផុតលេខរូបនេះ កើតចេញដោយចេតនា ឬដោយអចេតនានោះទេ? តែទោះជាយ៉ាងណាក៏ដោយ ក៏ត្រូវបានប្រជាពលរដ្ឋខ្មែរ សង្គមស៊ីវិល អ្នកលេងបណ្តាញសង្គម គេបានរិះគន់យ៉ាងខ្លាំងផងដែរ ដោយគេចោទថា លោកនាយករដ្ឋមន្ត្រី ហ៊ុនសែន មើលងាយស្រ្តីភេទ ហើយអ្នកខ្លះបានសរសេរចោទសួរថា ˝ហេតុអ្វីលោកហ៊ុនសែន ធ្វើដល់ទៅជានាយករដ្ឋមន្ត្រីទៅហើយ បែជាប្រើភាសា មិនសមរម្យ មើលងាយស្រ្តី ជាសាធារណបែបនេះ? ចុះម្តាយរបស់លោក ក៏ជាស្រ្តី ភរិយារបស់លោកក៏ជាស្រ្តីផងដែរ ហេតុអ្វីលោកមិនអោយតំលៃស្ត្រី ដែលជាមាតាពិភពលោកដូច្នេះ?˝
ជុំវិញការរិះគន់លោក ហ៊ុនសែន ខាងលើនេះ ក៏មានសង្គមស៊ីវិល មួយចំនួនបានរិះគន់តាមវិទ្យុបរទេសថា បើទោះជាស្រ្តីបឹងកកនោះប្រព្រឹត្តិដូចការចោទប្រកាន់ក៏ដោយ ក៏លោក ហ៊ុនសែន មិនត្រូវប្រើពាក្យសម្តីមើលងាយនោះទេ សូម្បីតែអ្នកទោសក៏គេមានសេចក្តីថ្លៃថ្នូររបស់គេដែរ មិនអាចប្រើពាក្យសម្តីតិះដៀល មើលងាយមើថោកបែបនេះនោះទេ។
មានបណ្តាញសង្គមខ្លះសរសេរដោយចម្ងល់ថា ˝នៅទីសាធារណៈ លោកហ៊ុនសែនហ៊ានប្រើពាក្យសម្តីអសុរស់បែបនេះ ចុះនៅផ្ទះមិនដឹងជាជេរគេជេរឯងគុំរោះគុំរើយយ៉ាងណានោះទេ?˝
បើតាមការវិភាគ ការប្រើពាក្យសម្តីមិនសមរម្យ ទៅលើស្រ្តីបឹងកក់រូបនោះគឺប្រហែលជាលោក ហ៊ុនសែន ចង់លើកទឹកចិត្តក្រុមសមត្ថកិច្ច និងពពួកសន្តិសុខស៊ីឈ្នួល អោយមានទឹកចិត្តក្លាហានក្នុងការតតាំងជាមួយក្រុមបាតុករខ្មែរ ដែលគ្មានអាវុធ គ្មានដំបងឆកនៅក្នុងដៃនោះហើយមើលទៅ តែអ្វីដែលគួរអោយសោកស្តាយនោះ ការលើកទឹកចិត្តម្ខាង បែជាធ្វើអោយប៉ះបាល់ដល់ភាគីម្ខាងទៀត និងប៉ះពាល់ដល់ស្ត្រីលើពិភពលោកទៅវិញ។
បើយោងតាមការសង្កេតតាមដាន សរបញ្ជាក់អោយឃើញថា រយៈពេលប៉ុន្មានឆ្នាំចុងក្រោយនេះ លោក ហ៊ុនសែន បានបាត់បង់ប្រជាប្រិយភាព បាត់បង់ការគាំទ្រពីប្រជាពលរដ្ឋកម្ពុជា នេះបើប្រៀបធៀបកាលពីប៉ុន្មានឆ្នាំមុន មិនតែប៉ុណ្ណោះការនិយាយស្តីរបស់លោកនាយករដ្ឋមន្ត្រី ហ៊ុនសែន ហាក់ឆេវឆាវ ខឹងច្រឡោតតោតតូង រីឯផ្ទៃមុខហាក់មិនសប្បាយរីករាយ ម្យ៉ាងទៀតតាំងពីមានបណ្តាញសង្គម (facebook) ម៉ោ គេជេរដៀលត្មេះ អ្នកខ្លះកាត់រូបលោក ហ៊ុនសែន ទៅតជាមួយក្បាលឆ្កែ អ្នកខ្លះកាត់រូបយកជើងជាន់ក្បាល ជេរប្រមាត ដាក់ទំនាយជាច្រើនរាប់មិនអស់។
ប្រជាពលរដ្ឋខ្មែរតែងនិយាយតៗគ្នាថា ˝អោយតែរាសីស្រុតចុះ ឬយីអ៊ុនដាក់ រកអីក៏ខាត ធ្វើអីក៏ខុស ដើរទៅណាមកណាសូម្បីតែឆ្កែក៏វាមិនព្រុះដែរ បើរាសីឡើងវិញ អង្គុយនៅតែផ្ទះក៏មានគេហៅអោយលុយដែរ ការងាររតរកមនុស្ស ទៅណាក៏គេហៅ នៅឯណាក៏គេរលឹក˝។ ដូច្នេះកត្តាទាំងអស់ខាងលើនេះហើយ ដែលសរបញ្ជាក់អោយឃើញថា លោកនាយករដ្ឋមន្ត្រី ហ៊ុនសែន ប៉ុន្មានឆ្នាំចុងក្រោយនេះ រាសីស្រុតចុះ ឬយីអ៊ុនដាក់៕ ដោយ៖ ផ្លុង-រ៉េត
.jpg)
.jpg)
.jpg)
.jpg)
.jpg)
.jpg)
.jpg)
.jpg)
