ពលរដ្ឋកម្ពុជា និងសហព័ន្ធនិស្សិតស្នើឲ្យដកលោក ហោណាំហុង ចេញពីតំណែង

ប្រជាពល​រដ្ឋ​កម្ពុជា និង​សហព័ន្ធនិស្សិតបញ្ញវន្តកម្ពុជា ស្នើ​សុំ​ម​អោយ​លោក នាយក​រដ្ឋ​មន្ត្រី​ ហ៊ុន​សែន ដក​​លោក ហោណាំហុង រដ្ឋ​មន្ត្រី​ក្រសួង​ការ​បរទេស​ចេញ​ពីដំណែង​ បន្ទាប់​ពីមាន​ប្រតិកម្ម​ខ្លាំងៗ​ ចំ​ពោះ​​​សាលិខិត​ ​របស់​លោក ហោណាំហុង ដែល​ផ្ញើ​ទៅ​រដ្ឋ​សភា​កាល​ពី​ថ្ងៃ​អង្គារថា មូលហេតុដែលឲ្យនាំជនជាតិវៀតណាមបាញ់ថ្នាំពុលបំផ្លាញដំណាំកសិករខ្មែរនៅខេត្តត្បូងឃ្មុំ គឺមកពីប្រជាពលរដ្ឋខ្មែរទាំងនោះបានដាំដំណាំលើទឹកដីវៀតណាមទៅ​វិញ ។

លិខិតរបស់ស ហព័ន្ធនិស្សិតបញ្ញវន្តកម្ពុជា បានសរសេរថា “សហព័ន្ធនិស្សិតបញ្ញវន្តកម្ពុជា យល់ឃើញថា លោក ហោ ណាំហុង ប្រមុខការទូតរបស់កម្ពុជា បានធ្វើផ្ទុយពីច្បាប់រដ្ឋធម្មនុញ្ញយ៉ាងធ្ងន់ធ្ងរ ត្រង់មាត្រា៥២ ដែលចែងថា រដ្ឋាភិបាលកម្ពុជាត្រូវរក្សាការពារឯករាជភាព អធិបតេយ្យភាព បូរណភាពទឹកដី និងរដ្ឋាភិបាលត្រូវរក្សាការពារនីត្យានុកោលភាព និងយកចិត្តទុកដាក់ជាអាទិភាពចំពោះជីវភាពរស់នៅ និងសុខមាលភាពរបស់ពលរដ្ឋ” ។

កន្លង​ទៅ​ថ្មីៗនេះ​គេ​សង្កេត​ឃើញថា តំណាងរាស្ត្រមក​ពី​បក្សប្រឆាំង បានផ្ញើលិខិតទៅប្រធានរដ្ឋសភា ឲ្យចេញកិច្ចអន្តរាគមន៍ទៅក្រសួងការបទេស ក្រោយពីបានចុះពិនិត្យផ្ទាល់នៅកន្លែងកើតហេតុ​ដោយ​រក​ឃើញថា ដំណាំ១០ហិកតា របស់កសិករខ្មែរចំនួន​៩គ្រួសារនៅខេត្តត្បូងឃ្មុំ ត្រូវបានបំផ្លាញដោយជន​ជាតិ​ យួន​ (វៀតណាម) ។ តំណាងរាស្ត្រទាំងនោះបានចាត់ទុកករណីនេះថា កងកម្លាំងសមត្ថកិច្ចយួន បានរំលោភបំពានមាក់ងាយមកលើប្រជាពលរដ្ឋខ្មែរយ៉ាង​ធ្ងន់ធ្ងរ និងអធិបតេយ្យរបស់កម្ពុជា  ប៉ុន្តែលោក ហោ ណាំហុង បែ​ជា​អះអាងទាំង​ទទឹងទិស​ថា ដីនោះជារបស់វៀតណាមទៅវិញ។

កាល​ពី​ថ្ងៃពុធ​ម្សិលមិញ ក្រសួង​ការ​បរទេស​កម្ពុជាបាន ​បញ្ជាក់​ជាសា​ជា​ថ្មី​ថា ​ដីទំហំ​១០ហិកតា​ដែល​គណបក្ស​សង្រ្គោះជាតិ​បាន​អះ​អាង​​ថា ​ជាដី​របស់​កម្ពុជា​នោះ​ គឺ​ជាដី​​របស់​វៀតណាម​ដែល​រដ្ឋាភិបាល​កម្ពុជា និង​វៀតណាម​បាន​ឯក​ភាព​គ្នា​ឲ្យ​ប្រជា​​​ពលរដ្ឋខ្មែរ​​ដាំដំ​ណាំ  នេះ​បើ​យោង​តាម​ការ​បំភ្លឺរបស់លោក កុយ​ គួង អ្នកនាំពាក្យក្រសួងការបរទេស បន្ថែម​ទៅ​លើ​លិខិត​របស់​រដ្ឋមន្រ្តី​ក្រសួង​ការ​បរទេស​ លោក ​ហោ ណាំហុង ​ដែលបាន​​​ផ្ញើ​ទៅ ​​លោក ហេង សំរិន ​ប្រធាន​រដ្ឋ​សភា ​។

គូររំលឹកផង​ដែរថា កាលពីថ្ងៃ​ទី​១៩​ខែ​មេសា ឆ្នាំ​២០១៥កន្លងទៅថ្មីៗនេះ កម្លាំង​សមត្ថកិច្ច​វៀតណាមបាននាំ​ពលរដ្ឋ​ខ្លួន​ចុះធ្វើ​សកម្ម​ភាព​បាញ់​ថ្នាំពុល​​បំផ្លាញផល​ដំណាំរបស់កប្រ​ជា​ក​សិករខ្មែរ នៅ​ភូមិជើង ឃុំជាំ ស្រុកមេមត់ ខេត្តត្បូងឃ្មុំអស់​ចំនួន១០​ហិកតា។

ករណីសារលិខិត​របស់​លោក ហោណាំហុង និង​ការ​បក​ស្រាយ​បំភ្លឺ​របស់​លោក កុយ គួង ដែល​បាន​សរសេរ​ទៅកាន់​ប្រ​ធាន​​រដ្ឋ​សភានេះ យើង​ជា​ពលរដ្ឋ​ខ្មែរ ដែល​ជា​ម្ចាស់​ទឹក​ដី មិន​អាច​ទទួល​យក​បាន​ទេ ហើយ​ក៏​សូម​ធ្វើ​ការ​សំនូម​ពរ​យ៉ាង​ទទួច​ទៅ​ លោកនាយក​រដ្ឋ​មន្រ្តី ហ៊ុន សែន មេត្តា​ដក​លោក​ហោណាំហុង​ចេញ​ពី​តំ​ណែង​ជា​បន្ទាន់​ ជៀស​វាង​ធ្វើ​អោយ​រាស្រ្ត​ខ្មែរ​ និង​ប្រ​ទេស​លើ​សកល​លោកគេ​សើច​ចំ​អក​ថា រដ្ឋា​ភិបាល​កម្ពុជា​ យក​មនុស្ស​ដែល​គ្មាន​ឧត្តមគតិ​ស្នេហាជាតិ មក​ប្រើ​បែប​នេះទើប​ធ្វើ​អោយ​ប្រ​ទេសជាតិចេះតែហិន​ហោច បាត់​បង់​ទឹក​ដី និង​ធ្វើ​អោយ​ប្រទេស​ជិត​ខាង​កាន់តែបាន​ចិត្តពី​មួយថ្ងៃទៅ​មួយថ្ងៃក្នុង​ការ​ឈ្លានពានចង់​លេប​ត្រ​បាក់​យក​ទឹក​ដី​ខ្មែរដ៏កម្សត់​មួយនេះ៕ ដោយ៖ ផ្លុង-រ៉េត