ឃោសនា​យ៉ាង​ល្ងីល្ងើ​ជាការ​រួម​ចំណែក​ក្នុង​ការ​សម្លាប់​មនុស្ស និង​បំផ្លាញ​ថវិកា​ជាតិ

យោងតាមរបាយការណ៍រួមគ្នារវាងកម្មវិធីអភិវឌ្ឍន៍​អង្គការ​សហប្រជាជាតិ​ដែល​ហៅ​កាត់​ថា (UNDP)និងក្រសួងមហាផ្ទៃបានអះអាងថា ស្រាបៀរជាកត្តា​សំខាន់​ដែលបង្ក​អំពើ​ហិង្សា​ក្នុងគ្រួសារ​ហើយក៏ជាកត្តា ចម្បងទី ២ ដែលបង្កឱ្យមានគ្រោះ​ថ្នាក់ចរា​ចរណ៍នៅ​ក្នុង​ប្រទេស ។ ម៉្យាងវិញទៀតការទទួលទានស្រាបៀរលើស កម្រិតអាចបណ្តាល​ឱ្យមាន​បញ្ជាសុខភាពធ្ងន់ធ្ងរផងដែរនៅពេលអនាគត ។
ការអភិវឌ្ឍវិនិយោគលើវិស័យស្រាបៀរមិនមែនជាការអភិវឌ្ឍល្អលើសង្គមជាតិឡើយ ដោយវិស័យនេះមានការប៉ះពាល់យ៉ាងខ្លាំងទៅលើអ្នកប្រើប្រាស់ ។

ក.ក.ន ផ្តើមចេញគ្រោះថ្នាក់ចរាចរណ៍ចេះតែកើនឡើងក្នុងមួយឆ្នាំៗនេះ ការឃោសនាយ៉ាងល្ងីល្ងើតាមអេ ក្រង់ទូរ​ទស្សន៍​សារ​ព័ត៌មាន និងពិធីករមួយចំនួន កំពុងតែសហការគ្នាយ៉ាងសកម្មជាមួយក្រុមហ៊ុនគ្រឿងស្រវឹង បំផុសបំផុល​ពង្វក់ស្មារតី​ប្រជាពល​រដ្ឋឱ្យ​លង់ក្នុងការផឹកផលិតផលរបស់ខ្លួន រហូតឈានទៅដល់គ្រោះថ្នាក់ចរាចរណ៍ ស្លាប់ថែមទៀតផង ។ ទង្វើឃោសនា​បែប​អគតិ​នេះហើយកំពុងលើកទឹកចិត្តឱ្យប្រជាពលរដ្ឋចេះប្រើប្រាស់គ្រឿង ស្រវឹង និងបណ្តាលឱ្យប្រជាពលរដ្ឋទៅរកស្លាប់ និងចូល​រួម​ចំណែកក្នុងការបំផ្លាញថវិកាជាតិ ដែលក្នុងមួយឆ្នាំៗ រដ្ឋខាតបង់ទៅលើគ្រោះថ្នាក់ចរាចរណ៍គិតជាទឹកប្រាក់ ៣១០លានដុល្លារ ។

អ្នកផងគិតថា ក្រុមហ៊ុនគ្រឿងស្រវឹង និងបណ្តាស្ថានីយ៍ទូរទស្សន៍ និងសារព័ត៌មានមួយចំនួនត្រូវតែគោរព ច្បាប់ប្រទេស ព្រោះ​ប្រទេសមានច្បាប់អ្នកដែលមិនគោរពច្បាប់ស្មើនឹងការប្រមាថអ្នកដែលប្រមាថ គឺមានទោសទណ្ឌ ៕