សហគមន៍ព្រៃឡង់បើកយុទ្ធនាការទ្រង់ទ្រាយធំ ទប់ស្កាត់បទល្មើសកាប់បំផ្លាញព្រៃឈើខុសច្បាប់

សហគមន៍ព្រៃឡង់ដែលមានអ្នកចូលរួមប្រមាណ៥០០នាក់បើកយុទ្ធនាការ ទ្រង់ទ្រាយធំដើម្បីទប់ស្កាត់បទល្មើសកាប់បំផ្លាញព្រៃឈើខុសច្បាប់ប្រឆាំងនឹងការរុករាន កាប់បំផ្លាញព្រៃឈើពីសំណាក់ជនខិលខូច។

យោងតាមប្រភពទទួលបាននៅ ថ្ងៃទី១៤ ខែកញ្ញា ឆ្នាំ២០១២ នេះបាន ឲ្យដឹងថា បណ្តាញសហគមន៍ ព្រៃឡង់ដែលមានអ្នកចូលរួម ប្រមាណ៥០០នាក់ មកពីខេត្ត ព្រះវិហារ កំពង់ធំ ស្ទឹងត្រែង និង ក្រចេះ នឹងបើកយុទ្ធនាការ ទប់ស្កាត់បទល្មើស ព្រៃឈើ ទ្រង់ទ្រាយធំមួយទៀត ចាប់ពីថ្ងៃទី១៤ ដល់ថ្ងៃទី១៧ ខែកញ្ញា ឆ្នាំ២០១២ ។ បច្ចុប្បន្ននេះ សកម្មភាពកាប់ព្រៃឈើ និងការរុករានកាប់ ព្រៃយកដីខុសច្បាប់ កំពុងកើតមានជា អនាធិបតេយ្យ យ៉ាងខ្លាំងក្លា នៅតំបន់ព្រៃឡង់ ទន្ទឹមគ្នានឹងក្រុមហ៊ុន ព្រៃសម្បទានសេដ្ឋកិច្ច ជាច្រើន ដែលកំពុងចូលលុកលុយ ក្នុងតំបន់ព្រៃឡង់ ផងដែរ ទោះបីជាបណ្តាញសហគមន៍ ព្រៃឡង់បានខិតខំធ្វើការតវ៉ា និងចុះទប់ស្កាត់ជាច្រើន លើកមក ហើយក្តី។

សូមជម្រាបថា ព្រៃឡង់ជាប្រភពនៃអនុផល ព្រៃឈើយ៉ាងសំខាន់ សម្រាប់ប្រជាពលរដ្ឋ ភាគច្រើន ជាជនជាតិ ភាគតិចប្រមាណ ជាង ៦០០០០គ្រួសារ ក្នុងភូមិជិត៤០០ភូមិ ដែលស្ថិតនៅក្នុង ខេត្តព្រះវិហារ កំពង់ធំ ស្ទឹងត្រែង និងក្រចេះដែលអ្នកខ្លះ ប្រកប របរបោចវល្លិ៍ រកជ័រ និងបេះផ្លែឈើលក់ ចិញ្ចឹមជីវិត ៕ ដោយ ជខ