លោកម៉ៅ​ពៅ ដកតំណែងពីស្នងការខេត្តព្រះវិហារជាផ្លូវការ

លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ​បាន​មានប្រសាសន៍ឲ្យដឹងកាលពីព្រលប់ថ្ងៃទី១៩ ខែតុលា ឆ្នាំ២០១២ថា ​លោក​ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី១៩ ខែតុលា បានចុះហត្ថ​លេខាសម្រេចផ្លាស់លោក ម៉ៅ ពៅ ស្នងការនគរបាលខេត្តព្រះវិហារ មក​នៅ​នាយកដ្ឋានបុគ្គលិក រង់ចាំទទួលភារកិច្ចថ្មី។

លោកឧត្តមសេនីយ៍ឯក ខៀវ សុភ័គ បានបន្តថា ចំណែកលោក ​ស៊ី គីរី​ស្នងការរងខេត្តពោធិ៍សាត់ ត្រូវបានផ្លាស់ឲ្យទៅកាន់តំណែងជាស្នងការ​នគរ​បាលខេត្តព្រះវិហារ ជំនួសលោកម៉ៅ ពៅ ។

ប៉ុន្ដែការផ្លាស់ប្ដូរ ខាងលើនេះ ត្រូវបាន ប្រភពព័ត៌មានផ្សេងទៀត សំដៅទៅនឹង ហេតុការណ៍ផ្ទុះអាវុធ ដែលបង្កឡើង ដោយ លោកឧត្ដមសេនីយ៍ ម៉ៅ ពៅ នៅក្នុង សណ្ឋាគារមួយក្នុង​ក្រុងសៀមរាប ខេត្ដសៀមរាប ខណៈដែល ស្នងការនគរបាលរូបនេះ បានចេញមកអះអាងថា ការផ្ទុះអាវុធ ទាំងយប់នោះ គឺដើម្បីការពារខ្លួន ខណៈដែល មានមនុស្សមួយចំនួន ដែលមានមុខងារ ជាឧកញ៉ា និងមន្ដ្រីនគរបាល ជាន់ខ្ពស់ដែរនោះ មកគំរាម កំហែង និងធាក់ទ្វារ បន្ទប់របស់លោក។

សូមរំលឹកផងដែរថា លោក​ ម៉ៅ​-ពៅ​ ស្នង​ការ​ខេត្ត​ព្រះ​វិ​ហារ​បាន​ប្រើ​កាំ​ភ្លើង​បាញ់​បោះ​ នៅ​ម៉ោង​១១​យប់​ កាល​ពី​ថ្ងៃទី​៣០ ខែ​កញ្ញា ឆ្នាំ​២០១២ ជា​ច្រើន​គ្រាប់​នៅ​ក្នុង​ សណ្ឋាគារ​​ម៉ែនប៉ូរ៉ា ដែល​ស្ថិត​ក្នុង​សង្កត់​ស្ល​ក្រាម​ ក្រុង​-ខេត្ត​សៀម​រាប​ ដោយ​គ្មាន​មូល​ហេតុ​ត្រឹម​ត្រូវ​ ហើយ​ការ​ផ្ទុះ​អា​វុធ​នេះ​គឺ​ហាក់​ដូច​ជា​ផ្គើន​និង​ប្រ​សាសន៍​លោក​នាយក​រដ្ឋ​មន្រ្តី​ ហ៊ុន-សែន ដែល​ទើប​ប្រ​មាន​ថ្មីៗ​ថា អោយ​សមត្ថ​កិច្ច​បង្ក្រាប​ពួក​ក្រុម​បាញ់​បោះ​តាម​ទី​សា​ធា​រ​ណ​និង​​តំ​​បន់​​ភ្លៀវ​​ទេស​ចរណ៍ជាតិ​អន្តរ​ជាតិ​ទោះ​ជា​កូន​អ្នក​ធំ ឬអ្នក​ធំ​ក៏ដោយ៕