ក្រុម​អាជ្ញាធរអប្សរា៤នាក់ចុះជីកដាំបង្គោលរបងបិតមុខដីពលរដ្ឋ​មិន​បានសម្រេច

ព្រឹកថ្ងៃ​ទី០៥ ខែកុម្ភ: ឆ្នាំ២០២០ អាជ្ញាធរ​អប្សរា​ និងជាងចំនួន៤នាក់បាន​ចុះ​ជីក​ដី​បំរ៉ុង​ដាំបង្គោល​របង​បិទ​ពីមុខ​ដី​របស់ពលរដ្ឋ​ស្ថិន​ក្នុង​ភូមិ​ ថ្លុកអណ្តូង សង្កាត់​ស្លក្រាម ក្រុងសៀមរាប នៅ​ចំណុច​ខាង​ត្បូង​ផ្លូវ​៦០ម៉ែត្រ។

សកម្មភាពជីកដីបំរ៉ុងដាំបង្គោលរបង​របស់ក្រុម​អាជ្ញាធរ​អប្សរា​ខាង​លើ​នេះ គឺគ្មាន​សេច​ក្តីជូន​ដំណឹង គ្មាន​លិខិត​ស្នាម​អ្វីទាំង​អស់ ហើយ​ម្យ៉ាង​វិញ​ទៀត ពួកគាត់​បាន​ប្រាប់​អ្នក​កាសែតថា ពួកគាត់​ធ្វើ​ការ​តាម​បញ្ជារបស់​ថ្នាក់​លើតែប៉ុណ្ណោះ ដល់​ពេល​អ្នក​កាសែត សួររក​ឈ្មោះថ្នាក់​លើ​របស់​គាត់​ តែគាត់​បែរជាមិន​ប្រាប់​ទៅវិញ ហើយ​ក៍នាំគ្នាចាកចេញ​ទៅ​អស់តែម្តង។

លោកជំទាវបណ្ឌិត លី អ៊ុំអេង ដែល​ជាម្ចាស់​ដី​ខាង​លើនេះបាន​មាន​ប្រសាសន៍ប្រាប់​អ្នក​កាសែត​ជាច្រើន​នាក់ថា “ ដីដែលក្រុម​អាជ្ញាធរ​អប្សរា​បំរ៉ុង​បោះ​បង្គោល​បិត​ពី​មុខ​នេះ ជាដី​របស់​គាត់ ដី​នេះលោក​ជំទាវ​បាន​ទិញ​ពី​ពលរដ្ឋ​តាំង​ពីឆ្នាំ១៩៩៤ មកម្លេះ ដែល​មាន​ប្លង់​រឹង​ជា​កម្ម​​​សិទ្ធិស្រប​ច្បាប់។ លុះ​ដល់ថ្ងៃទី២៥ ខែកក្កដា ឆ្នាំ២០១៦ អនុក្រិត្យ លេខ ១៥៨ របស់​រាជ​រដ្ឋា​ភិបាល​​កម្ពុជា​បាន​កាត់​ដី​នេះជូន​គាត់​ហើយ។ លោកជំទាវបណ្ឌិតបានបន្តថា អាជ្ញាធរ​អប្សរាចេះតែមក​ធ្វើ​ទុក្ខ​​បុកម្នេញគាត់​មិន​ចេះចប់​មិន​ចេះហើយ ដោយ​យក​លេស​ថា ដី​នេះ​ជាដីរបស់​អាជ្ញាធរ​អប្សរាផង ជាដី​របស់​រដ្ឋផង និង​មានគោល​បំណងចង់​លេប​ត្របាក់​យក​ដីរបស់​លោក​ជំទាវ​ឆៅៗតែម្តង បន្ទាប់​មក​លោកជំទាវ បាន​ដាក់​ពាក្យ​បណ្តឹងទៅ​តុលាការ​ខេត្ត​សៀម​រាប ហើយតុលាការ​បាន​ចេញ​ដី​កា​កោះ​ហៅ​ខាង​អាជ្ញា​ធរ​អប្សរាពីរលើករួច​មក​​ហើយ​តែ​ខាង​អប្សរា មិន​ចូល​ខ្លូន​ទៅ​បំភ្លឺទេ។ ដី​ការបស់​តុលាការលើកទីបីនេះ តម្រូវ​អោយ​ខាង​អាជ្ញាធរ​អប្សរាចូល​​ខ្លួន​បំភ្លឺនៅថ្ងៃទី១២ ខែគុម្ភ: ឆ្នាំ២០២០ ខាងមុខ​នេះម្តងទៀត តែខាង​អប្សរា​​គេចូល​ឬមិន​ចូល​នោះ​មិន​ទាន់ដឹងនៅឡើយទេ “។

ជំទាវបណ្ឌិត លី អ៊ុំអេង ស្នើសុំ​ទៅ​ខាង​អាជ្ញាធរ​អប្សរា ដែល​មាន​ឯកឧត្តម ហង្ស ពៅ ជាប្រ​ធាន សុំ​អោយ​នៅ​អោយ​ស្ងៀមសិន រងចាំខាង​តុលាការ​ជំនុំជម្រះចេញ​សាលក្រម​ស្ថាពរសិន​ថា តើ​តុលាការ​សម្រេច​អោយ​ខាង​ណាជាអ្នក​ឈ្នះ។ លោកជំទាវបន្ថែមថា បើតុលាការកាត់​អោយគាត់ចាញ់ទាំង​អយុត្តិធម៌ នោះ​ខាង​អប្សរាយកដី​នេះ​​ចុះ តែបើតុលាការ​កាត់​អោយ​គាត់​ឈ្នះ សូម​អាជ្ញាធរ​អប្សរា​មេត្តា​កុំមក​​ជិះ​ជាន់​ គាប​សង្កត់​ គាត់បន្តទៅ​​ទៀត។ លោកជំទាវបណ្ឌិតបាន​បន្ថែមទៀតថា តំណាក់កាល​នេះ​ជាតំណាក់កាលតតាំង​ក្តី​នៅ​ឯតុលាការ​ខេត្តសៀមរាប​ ដូច្នេះខាងអាជ្ញាធរអប្សរាកុំ​មក​បំពាបំពាន​លើដី​របស់​គាត់​អញ្ចឹង​វាមិន​ស្របតាម​ផ្លូវ​​ច្បាប់ទេ។

សូមបញ្ជាក់ផងដែរថា នៅ​ខេត្តសៀមរាបនេះ ប្រជាពលរដ្ឋ​រង​ទុក្ខ​លំបាក ទឹក​ភ្នែកល្ហេក​ល្ហាម ស៊ីក្តាមស៊ីខ្យង ខ្លះ​ជំពាក់លុយធនាគារវាន់ក ដោយសាតែខាង​អាជ្ញាធរអប្សរា វាយ​កម្ទេច​ផ្ទះសំ​បែង​របស់ពួកគាត់​ជាងប្រាំពីរយ​ខ្នង បន្ទាប់​ពី​បោះឆ្នោត​អាណត្តិចុងក្រោយ​រួច​។ ពល​រដ្ឋ​ក្រីក្រ​យក​មេឃ​ធ្វើ​មុង ខ្លះ​រត់​ចោល​ស្រុក ទៅ​ធ្វើ​ការ​ស្រុក​គេ បែកបាក់ម៉ែឪ ព្រាត់​ប្រាស​ប្រពន្ធកូន ព្រោះ​​​ខ្ចីលុយធនាគារ មក​ធ្វើ​ផ្ទះកាលមុន​បោះ​ឆ្នោតរាប់​ម៉ឺនដុល្លារ តែបោះឆ្នោតរួច​ អាជ្ញា​ធរ​អប្សរា​ ឈូសឆាយកាយ​ផ្ទះរះរបងរបស់​ពួកគាត់​អស់ឡើយ​រាប​ដល់ដី។ តើនេះឬដែលហៅថា សន្តិភាព នោះ?

កាសែតកម្ពុជា សុវណ្ណភូមិ​ មិន​អាច​សុំ​ការ​បក​ស្រាយ​ពី​ខាងណា​បាន​ទេ ព្រោះ​ខាង​អាជ្ញាធរ​អប្សរា៤នាក់​ដែល​ចុះ​មក​ជីក​ដីបំរ៉ុង​ដាំ​បង្គោល​របង​ព្រឹក​មិញនេះ​ មិន​បាន​ប្រាប់​ថា ខាង​ស្ថាប័ណ​ណា​ជាអ្នក​បញ្ជាមក​ទេ គេ​គ្រាន់​តែ​ប្រាប់​ថា ធ្វើ​តាម​បញ្ជាថ្នាក់​លើ​តែប៉ុណ្ណោះ ម្យ៉ាង​ទៀត មិន​ដឹង​ជាខាង​អាជ្ញាធរ​អប្សរាមែន ឬក្លែងខ្លាយ ដូច​ពាក្យចាស់ពោលថា “ លា​ពាក់​ស្បែក​សឹង្ហ​​ផង​ក៏មិន​ដឹង“៕ ដោយ: ផ្លុងរ៉េត