លោក ហាប់ ដា នៅតែប្រកាន់ជំហរប្តឹងលោក សាន្ត រដ្ឋស៊ីង

ខេត្តសៀមរាប: នៅរសៀលម៉ោង៣និង៤០នាទី ថ្ងៃទី៧ ខែកុម្ភៈឆ្នាំ២០២២ នេះ លោក ហាប់ ដា ប្រធានសហគមន៍នេសាទចុងឃ្នៀស បានប្រាប់កាសែតកម្ពុជាសុវណ្ណភូមិតាមទូរស័ព្ទថា លោកពិតជាត្រូវបានលោក សាន្ត រដ្ឋស៊ីង ទះកំភ្លៀងពីដៃមែន កាលពីថ្ងៃទី៣ ខែកុម្ភៈ ឆ្នាំ២០២២ វេលាម៉ោង៤ និង២០ នាទីរសៀល នៅចំណុចកុងត្រូលផ្លូវចុះទៅបឹងពារាំង ស្ថិតក្នុងសង្កាត់ជ្រាវ ក្រុងសៀមរាប ខេត្តសៀមរាប។

លោក ហាប់ ដា បានបន្តទៀតថា លោកបានដាក់ពាក្យបណ្ដឹងចូលប៉ុស្តិ៍រដ្ឋបាលសង្កាត់ជ្រាវហើយតែពុំទាន់ឃើញហៅបំភ្លឺ ចំណែកឯភាគីខាងលោក សាន្ត រដ្ឋស៊ី ក៏ពុំទាន់មានការចរចាជាមួយលោកដែរ។ លោក ហាប់ ដា ប្រធានសហគមន៍នេសាទចុងឃ្នៀដបានបន្ថែមថា ពេលលោក សាន្ត រដ្ឋស៊ីង ជិះឡានទៅដល់កន្លែងកើតហេតុចុះពីឡានភ្លាមបានទះកំផ្លៀងលោកពីរដៃ នៅពេលដែលលោកហើយនិងអ្នកជុំវិញពុំបានដឹងខ្លួនទាន់ ដូច្នេះពុំមានអ្នកណាថតរូបភាពទាន់ឡើយ។

នៅរសៀលដដែលនេះផងដែរ កាសែតកម្ពុជាសុវណ្ណភូមិ ព្យាយាមសុំការបំភ្លឺបន្ថែមពីលោក សាន្ត រដ្ឋស៊ីង តែទូរស័ព្ទចូលពុំមានអ្នកលើកទទួល។

ប្រជាពលរដ្ឋនៅក្នុងសង្កាត់ជ្រាវនៅមានការងឿងឆ្ងល់ហើយសង្ស័យថា តើចំណូលពីការលក់អាចម៍ដីស្តាបឹងពារាំងខាងលើនេះ គេយកទៅណា ហើយចែកជាមួយអ្នកណា? ហេតុអ្វីក៏ស្ថាប័នពាក់ព័ន្ធ មិនបញ្ចេញរបាយការណ៍ទាំងនេះឲ្យពលរដ្ឋបានដឹងផង ឬមួយចែកគ្នាដាក់ហោប៉ៅរៀងៗខ្លួន? ដូចកាលពីស្ដារបារាយណ៍សប្បនិមិត្ត យកស្លឹកត្នោតខ្ចប់ស្ករត្នោត កាលពីប៉ុន្មានឆ្នាំមុនថ្មីៗនេះ។

លោក ក្អោប រ៉ន ចៅសង្កាត់ជ្រាវ បានប្រាប់កាសែតកម្ពុជាសុវណ្ណភូមិតាមទូរស័ព្ទកាលពីល្ងាចថ្ងៃ៦ ខែគុម្ភៈ ឆ្នាំ២០២២ម្សិលមិញថា ចំណូលដែលបានពីការជីកស្ដារលក់អាចម៍ដីបឹងពារាំង ខាងសង្កាត់មិនទទួលបានមួយកាក់មួយសេននោះទេ កិច្ចការទាំងនេះគឺពាក់ព័ន្ធជាមួយនឹងខាងខេត្តនិងខាងមន្ទីរតែប៉ុណ្ណោះ។ ចៅសង្កាត់រូបនេះបានបន្ថែមថា ទោះលោកមិនបានចំណូលក៏លោកមិនបានអន់ចិត្តអ្វីដែរ លោកប្រាថ្នាសុំឱ្យតែបាន បាទបឹងពារាំងជ្រៅសម្រាប់ត្រីរស់នៅបន្តពូជ ទុកសម្រាប់ឲ្យសត្វស៊ី និងសម្រាប់ប្រជាពលរដ្ឋនេសាទ នៅរដូវវស្សា។

សូមបញ្ជាក់ផងដែរថា បុរសដែលធាក់តុពីរជើងនៅក្នុងរូបវីដេអូនេះគឺឈ្មោះ សាន្ត រដ្ឋស៊ីង ដែលរងការចោទប្រកាន់ថាប្រើអំពើហិង្សាខាងលើ៕ ដោយ៖​ ផ្្លុង រ៉េត