ចាងហ្វាងកាសែតម្នាក់ត្រូវបានតុលាការចេញដីកាកោះឱ្យចូលបំភ្លឺ

លោក ផ្លុង រ៉េត អាយុ៤១ឆ្នាំ បច្ចុប្បន្នរស់នៅភូមិ​ជ្រាវ សង្គាត់​ជ្រាវ ក្រុងសៀមរាប មាន​មុខរបរជា​ ចាងហ្វាងកាសែតកម្ពុជាសុវណ្ណភូមិ ដែល​មានស្នាក់ការនៅក្នុង​ក្រុងសៀមរាប ត្រូវបាន​តំណាងអយ្យការអមសាលាដំបូងខេត្តសៀមរាបចេញដីកាកោះអោយ​ចូល​​បំភ្លឺនៅ​ថ្ងៃទី៣០ ខែវិច្ឆកា ឆ្នាំ២០២១ វេលាម៉ោង០២និង៣០នាទីរសៀល ដើម្បីបំភ្លឺពីដំណើររឿង បរិហាគេត្តិ៍ជាសាធារណៈ និងញុះញង់ឱ្យមានការរើសអើង (តាមប្រព័ន្ធហ្វេសប៊ុគ) ប្រព្រឹត្តទៅនៅក្រុងសៀមរាប កាលពីថ្ងៃទី០៤ ខែវិច្ឆកា ឆ្នាំ២០២១។

លោក ផ្លុង រ៉េត បានប្រាប់អ្នក​យក​ព័ត៌មានយើងថា លោកនឹងចូល​បំភ្លឺតាម​ពេល​វេលា​កំណត់ទៅតាម​ដីកកោះរបស់​តុលាការខេត្តសៀមរាប។ លោកផ្លុងរ៉េតបាន​បន្តថា រហូតមក​ដល់ពេល​នេះ​លោក​ពុំទាន់​ដឹក​ថាអ្នក​ណាជាដើម​បណ្តឹង​ដែល​ប្តឹងលោក​នៅឡើយទេ តែគ្រាន់​តែដាក់ការ​សង្ស័យ​ទៅលើ​សំណេរមួយនៅលើអាខោនហ្វេសប៊ុគរបស់លោកកាល​ពីថ្ងៃទី០៤ ខែវិច្ឆា ឆ្នាំ២០២១ ដែលលោកសុំលាក់ទុកសិនព្រោះ​វាមិន​ទាន់ដឹងច្បាស់។

បើយោងតាមច្បាប់ស្តីពីរបបសារពត៌មាន បុគ្គលដែល​ត្រូវ​បាន​គេសរសេររិះគន់ត្រូវ​សុំអោយធ្វើ​ការ​បកស្រាយ​បំភ្លឺឡើងវិញ​ក្នុងរយៈពេល​មួយសប្តាហ៍ មុន​ដាក់​ពាក្យ​ប្តឹងទៅតុលាការ ឬសមត្ថកិច្ចពាក់ព័ន្ធ ប្រសិន​បើក​យល់ឃើញថា សំណេរ ឬអត្ថបទនោះ​វាខុសពីការពិត។

គេសង្កេតឃើញថា អាជីពជាអ្នក​សារពត៌មាន ហាក់នៅផុយស្រួយនៅឡើយ ក្នុង​ការ​បញ្ចេញ​មតិរិះ​គន់ក្នុងន័យស្ថាបនា។ នៅក្នុងសង្គម​បច្ចុប្បន្ន​មានបុគ្គលមួយចំនួន​មិន​ទាន់យល់ដឹងពីផ្លូវ​ច្បាប់ចូល​ចិត្ត​ធ្វើ​ទង្វើរំលោភបំពានទៅលើអ្នក​ដ៏ទៃ ហើយ​បើគេបិទមាត់មិន​និយាយស្តី នោះទើបបានសុខ តែបើគេបញ្ចេញមតិពីទង្វើអាក្រក់របស់ខ្លួន នោះនាំគ្នាប្តឹងប្តល់ថាគេបរិហាកេរ្តិ៍ គេញុះញង់ឱ្យមានការរើសអើងជាដើម។

ក្នុងនាមយើង​ជាអ្នក​សារពត៌មាន ស្នើសុំទៅស្ថាប័នឯករាជ អ្នក​ច្បាប់ និងអង្គការសិទ្ធិមនុស្ស ជួយតាមដានករណីខាងលើនេះផង ជាពិសេសស្នើសុំទៅតំណាងអយ្យការអមសាលាដំបូងខេត្តសៀមរាប មេត្តាលើកលែងការចោទប្រកាន់ចំពោះលោក ផ្លុង រ៉េត ចាងហ្វាកាសែតកម្ពុជាសុវណ្ណភូមិខាងលើនេះ (ភាគ០១)៕ ដោយ៖ សៀ វិចិត្រ