ប៉េអឹមខេត្តសៀមរាបម្នាក់ផឹកស៊ីស្រវឹងបាញ់បោះសេរីទាំងកណ្តាលអាធ្យាត្យ

ប៉េអឹមខេត្តម្នាក់ឈ្មោះ អាង សែន (ហៅចិត្ត) មានតួនាទីជា នាយការិយាល័យ​ប្រ​ឆាំង​ការ​ជួញ​ដូរមនុស្ស និង​ការពារអនីតិជន នៃកងរាជអាវុធហត្ថខេត្តសៀមរាប ផឹកស៊ី​ស្រវឹង​ដក​កាំភ្លើងខ្លីបាញ់មួយគ្រាប់នៅវេលាម៉ោង១១យប់ ថ្ងៃទី១ ខែវិច្ចកា ឆ្នាំ២០២១ នៅចំណុចការរាសសាំងសូរិយាស្ថិតក្នុងភូមិតាវៀន សង្កាត់សាលាកំរើក ក្រុងសៀមរាប បណ្តាល​ជនរងគ្រោះឈ្មោះ ផាត សុភា ​ភេទប្រុស អាយុ៣៧ឆ្នាំ រង​របួសពេញមុខ។

ប្រភពបានបង្ហើបអោយដឹងថាឈ្មោះ អាង សែន ផឹកស៊ីស្រវឹង​ប្រកែកគ្នាជាមួយឈ្មោះ ផាត សុភា ឡើងតឹងសសៃក ទើបលោក ផាត សុភា ខលហៅ​លោក នួន សារុន នាយការិយាល័យអន្តរាគមន៍នៃស្នងការដ្ឋាននគរបាល​ខេត្តសៀមរាបមក​ជួយដោះស្រាយ ស្រាប់តែភ្លាមៗធ្វើ​អោយលោក អាង សែន កាន់តែខឹង ហើយដក់កាំភ្លើងបាញ់មួយគ្រាប់ទៅលើសាបមុខផ្ទះបណ្តាលអោយថ្មបែខ្ទាតត្រូវមុខលោក ផាត សុភា ដាច់ចេញឈាមស្រក់ពេញដី។ ប្រភពបានបន្តទៀតថា ឈ្មោះ ផាត សុភា ជាថៅកែបុរីសុខហេងវីឡាស្ថិតក្នុងភូមិគោគត្នោត នៅឃុំកណ្តែក ស្រុកប្រាសាទបាគង ខេត្តសៀមរាប។

នៅព្រឹក​ថ្ងៃទី២ ខែវិច្ឆកា ឆ្នាំ២០២១នេះ កាសែកម្ពុជាសុវណ្ណភូមិ បានព្យាយាមសុំការពន្យល់ពីជនរងគ្រោះឈ្មោះ ផាត សុភា ខាងលើនេះតែគាត់​មិន​លើក​ទូរស័ព្ទ លុះប្រហែលមួយម៉ោងក្រោយមកទើប​ប្អូន​ប្រុស​លោកភាបាន​ខលទូរស័ព្ទ​បកមក​វិញហើយប្រាប់ថា ខ្ញុំជាប្អូនរបស់លោកភា ខ្ញុំពុំអាចបកស្រាយបានទេ ចាំសួរទៅខាងបងខ្ញុំសិន ហើយក៏បិតទូរស័ព្ទបាត់ទៅ។

ចំណែកឯលោក អាង សែន ហៅចិត្ត ប៉េអឹមខេត្តរូបនេះ ដែលផឹកស៊ីស្រវឹងបាញ់បោះសេរីកាលពីមប់មិញនោះពុំទាន់អាចសុំការបកស្រាយបានទេ ព្រោះគ្មានលេខទូរស័ព្ទសម្រាប់ធ្វើការ​ទំនាក់ទំនង។

រីឯលោកអនុសេនីយ៍ឯក សៀក សោភា នាយការិយាល័យប្រឆាំងបទល្មើស​ព្រហ្មទណ្ឌនៃកងរាជអាវុធហត្ថខេត្តសៀមរាបក៏ពុំអាចសុំការពន្យល់បានដែរ ព្រោះទូរស័ព្ទចូល​ពុំមានអ្នក​លើក​ទទួលនៅប្រឹកថ្ងៃទី២ខែវិច្ឆកាឆ្នាំ២០២១នេះ។ ដោយ៖ ផ្លុងរ៉េត