លោក ឃឹមប៊ុនសុង គួរតែពិនិត្យមើលបាឡុងហោះផង ជៀសវាងគ្រោះថ្នាក់ដល់ភ្លៀវទេសចរណ៍ ព្រោះធ្លាក់ញឹកញាប់ណាស់

បាឡុងហោះ​របស់​ក្រុម​ហ៊ុន​ឯកជន​មួយនៅ​ក្នុង​ក្រុង​សៀមរាប បាន​ធ្លាក់ចុះមកដល់ដី នៅ​ចំនុច​ភូមិ​ទឹក​ថ្លា សង្កាត់​ទឹកវិល ក្រុង​សៀមរាប នៅ​វេលាម៉ោង​៦និង​៣០នាទីព្រឹក​​ថ្ងៃទី០៣ ខែមិនា ឆ្នាំ២០១៧នេះ បណ្តាល​អោយ​ភ្ញៀវទេសចរណ៍បរទេស និង​អ្នក​បញ្ជាបាឡុងចនួន០៩នាក់ ភ័យព្រលឹងចុងសក់។

ប្រភព​ព័ត៌មាន​បាន​អោយដឹងថា បាឡុង​ហោះ​ខាង​លើ​នេះបាន​ហោះ​​ចេញពីចំនុច ភូមិសាស្ត្រ ស្រុកប្រាសាទបាគង ខេត្តសៀមរាប ដើម្បីមើលទេសភាព ស្រាប់តែមកដល់ ចំណុចកើត​ហេតុ​ខាងលើ​​ក៏ស្រាប់​តែ​ធ្លាក់ចុះក្រោម​ដល់ដី​ដោយមិនដឹងពី​មូលហេតុអ្វី​នោះ​ទេ តែសំណាងល្អ មិនមានភ្ញៀវ ទេសចរណាម្នាក់ រងរបួសនោះឡើយ។

លោកវរសេនីយ៍ឯក ទិត្យ ណារ៉ុង អធិការនគរបាល ក្រុងសៀមរាប បានឲ្យដឹងថា នៅក្នុងបាឡុងនោះ មានដឹកភ្ញៀវទេសចរ និងអ្នកបញ្ជារ បាឡុងសរុបចំនួន០៩នាក់ ជនជាតិ កូរ៉េ ៤នាក់ អឺរ៉ុប ៤នាក់ និង​ខ្មែរ១នាក់ជាអ្នក​បញ្ជាបាឡុងហោះខាង​លើ​នេះ។ លោអធិការ​បានបន្ថែមថា ក្នុង​ហេតុការ​ធ្លាក់​បាឡុងហោះ​ខាងលើ​នេះ​មិន​បណ្តាល​អោយ​នរណាម្នាក់​រង​របួស​ឡើយ។

អ្នក​ដែល​ឃើញ​ហេតុការណ៍ខាង​លើ​នេះ​បាន​សន្និដ្ឋានថា បាឡុងដែល​ធ្លាក់​នេះ​អាច​បណ្តាល​មក​ពី​ខ្វះ​បច្ចេក​ទេស ឬអាច​បណ្តាល​មក​ពី​អស់​ហ្គាស។

សូម​រំលឹក​ផង​ដែរ​ថា កាល​ពី​សម័យ​លោក ស៊ូ-ភិរិន្ទ នៅ​កាន់​ជា​អភិបាល​ខេត្តសៀមរាប លោក​ធ្លាប់​បាន​ផ្អាក​ការ​ហោះហើរ​បាឡុង​ហោះខាង​លើនេះ​អស់​ជាច្រើន​ខែ ព្រោះ​បាឡុង​បាន​ធ្លាក់​ជាញឹក​ញាប់​ណាស់​ពេក ហើយគ្រាមួយនោះមានជនជាតិជប៉ុនម្នាក់បានស្លាប់បាត់បង់ជីវិត ក្នុង​ចំណោមភ្ញៀវទេសចរណ៍ជាច្រើននាក់ ក្នុងហេតុការណ៍ធ្លាក់បាឡុងហោះរបស់​ក្រុម​ហ៊ុន​ដដែលនេះ។

ពល​រដ្ឋ​ខេត្តសៀមរាប​រិះគន់ថា បើ​បាឡុងនេះធ្លាក់​ញឹក​យ៉ាង​នេះ គង់​តែថ្ងៃណាមួយធ្វើ​អន្តរាយដល់​ជីវិត​ភ្លៀងទេសចរណ៍មិន​ខាន ដូច្នេះលោក ឃឹម ប៊ុនសុង អភិបាល​ខេត្តសៀមរាប និង​មន្ទីរទេសចរណ៍ខេត្តឈរ​អោបដៃមើល​ដល់​ណាទៀត មេចមិន​បិតចោលទៅ។

កម្ពុជាសុវណ្ណភូមិ​មិន​អាច​សុំ​ការ​ពន្យល់ពី​ម្ចាស់​ក្រុម​ហ៊ុន​ បាឡុង​ហោះ​ខាងលើ​នេះ​បាន​ទេ ព្រោះ​គ្មាន​លេ​ខទូរស័ព្ទ​សំរាប់​ទាក់​ទង៕ ដោយ៖ ផ្លុងរ៉េត