ប៉េអឹមខេត្តសៀមរាប ចាប់រថយន្តដឹកឈើប្រគល់អោយ លោកមេព្រៃ

កម្លាំងអាវុធហត្ថ ខេត្តសៀមរាប បានធ្វើការ បង្ក្រាបរថយន្ត ដឹកឈើ១គ្រឿង ម៉ាកកូរ៉េ ១តោនកន្លះ តាមបទបញ្ជារបស់លោកឧត្តមសេនីយ៍ត្រីប៉ោ វណ្ណនិតមេបញ្ជាការ កងរាជអាវុធហត្ថ ខេត្តសៀមរាប។ មន្ត្រីអាវុធហត្ថ ខេត្តសៀមរាប បានឲ្យដឹងថាការ បង្ក្រាប​នេះធ្វើឡើងនៅ ម៉ោង៣និង៣០នាទី ទៀបភ្លឺថ្ងៃទី៩មិនាឆ្នាំ២០១៦ ស្ថិតនៅផ្លូវសម្ដេច ជាស៊ីម ក្នុងភូមិខ្នារថ្មី សង្កាត់ជ្រាវ ក្រុងសៀមរាប។ មន្ត្រីអាវុធហត្ថបន្ថែមថា រថយន្តដឹកឈើ ដែលកម្លាំងអាវុធហត្ថ បង្ក្រាបនេះ ត្រូវបាននាំយកទៅ កាន់ទីបញ្ជាការ កងរាជអាវុធហត្ថ ក្រុងសៀមរាប ថ្មីដែលមាន ទីតាំងនៅខាងកើត អង្គរឃ្យុយូ ស្ថិតនៅ ភូមិព្រៃគុយ សង្កាត់អំពិល ក្រុងសៀមរាប។ នៅព្រឹកមិញនេះត្រូវបាន ប្រគល់ឲ្យ ទៅជំនាញ រដ្ឋបាលព្រៃឈើរួចហើយ។ មន្ត្រីរដ្ឋបាលព្រៃឈើបន្ទាយស្រីបានឲ្យដឹងថា រថយន្តដឹកឈើ ដែលកម្លាំងអាវុធហត្ថ ចាប់ប្រគល់ឲ្យនេះ ចំណុះ១តោនកន្លះ មានឈើផ្ដៀក ផ្ទុកប្រមាណជាង៥ម៉ែត្រគូប ត្រូវបាននាំយកទៅ រក្សាទុកនៅ ផ្នែករដ្ឋបាល ព្រៃឈើបន្ទាយស្រី ស្ថិតនៅឃុំព្រះដាក់ ស្រុកបន្ទាយស្រី ខេត្តសៀមរាប៕