ស្រះចិញ្ចឹមត្រីឆ្តោរជាង២រយកន្លែងលោក ព្រិនសាវិន នាយខណ្ឌជលផលមិនចុះបង្ក្រាប

យោង​តាម​សម្តី​របស់​មន្ត្រីនគរបាលជាន់ខ្ពស់​នៃស្នងការ​នគរបាល​ខេត្តសៀមរាប បានថ្លែងនៅព្រឹកថ្ងៃច័ន្ទទី២៥ ខែមករា ឆ្នាំ២០១៦​នេះថា នៅទូទាំងខេត្ត​សៀមរាប​មានកន្លែង​ចិញ្ចឹមត្រីឆ្ដោ​ជាង២រយស្រះ បើ​ទោះជា​រដ្ឋ​ និង​អាជ្ញាធរ​ខេត្ត​មិន​បាន​អនុញ្ញាតិ​អោយ​ចិញ្ចឹមត្រី​ខុស​ច្បាប់​ទាំង​នេះ​ក៏ដោយ។

មន្ត្រីនគរបាលខាង​លើ​បាន​បន្ថែមថា គ្រាន់តែស្រុកជីក្រែង និងស្រុកសូទ្រនិគម មានស្រះចិញ្ចឹម​ត្រី​ឆ្តោរ​ជាង២រយស្រះ ចំណែកក្រុងសៀមរាបវិញ​ ក៏មានជាង១០ស្រះផង​ដែរ។

បើ​យោ​ង​តាម​អ្នក​ជំ​នាញ​សិក្សា​ពី​ការ​ចិញ្ចឹម​ត្រី​ឆ្តោរនេះ​បាន​អោយ​ដឹង​ថា ការចិញ្ចឹមត្រីឆ្ដោក្នុង១ថ្ងៃៗត្រូវ ចំ​ណាយកូនត្រី តូចៗរាប់សិបតោន ដើម្បីជាចំណីរឲ្យ​ត្រីឆ្ដោស៊ី ហើយកូនត្រីទាំងនោះបានមកពីរ ការដាក់ឆ្នុក ដោយល្មើសច្បាប់ ដោយ​ប្រើ​អួន​ ឬស្បៃ​មង​ក្រឡាញឹក ដាក់​យក​ត្រី​នៅ​ក្នុង​បឹង​ទន្លេសាប។

មន្ត្រីនគរបាល​ដដែលបានបញ្ជាក់ថា យោង​តាមលិខិតរបស់​ក្រសួងកសិកម្មរុក្ខាប្រមាញ់ និងនេសាទ និងអាជ្ញាធរខេត្ត មិនឲ្យមាន​ការចិញ្ចឹមត្រីឆ្ដោ ត្រី​រ៉ស់ ដែល​ជា​ប្រ​ភេទ​ត្រី​ស៊ី​សាច់​ជា​អាហារនេះ​ជាដាច់ខាត បើទោះបីជា​ការចិញ្ចឹមត្រី​ទាំង​នេះ​ជាលក្ខណៈគ្រួសារក៍ដោយ។ 

ប្រជាពល​រដ្ឋនៅ​ខេត្ត​សៀមរាប​ភាគច្រើន​មានការ​សង្ស័យថា ជំនាញ​ជល​ផល​អាច​ជាអ្នកបើកភ្លើងខៀវ ឲ្យ​ចិញ្ចឹមត្រី​ខាង​លើ​នេះ ជា​ថ្នូរ​និង​ការ​សូក​ប៉ាន់​ក្រោម​តុក៏ថាបាន​ដែរ បាន​ជា​ងងឹត​ភ្នែក​មើល​មិន​ឃើញ​ការ​ចិញ្ចឹម​ត្រី​ខុស​ច្បាប់​យ៉ាង​សន្ធឹកសន្ធាប់​បែបនេះ។

គេសង្កេត​ឃើញ​ថា បន្ទាប់​ពី​លោក​ ទឹម​សាវុធ នាយ​ខណ្ឌជល​ផល​ចាស់​ដែល​អសមត្ថ​ភាព​ក្នុង​ការ​បង្ក្រាប​បទ​ល្មើសបាន​ប្តូរ​ចេញ​ទៅ លុះ​ដល់​វេនលោក ព្រិន​សាវិន ទទួល​បន្ទុក​ជា​នាយ​ខណ្ឌ​ជំ​នួស​វិញ​ម្តង បទ​ល្មើស​នេសាទ​មិន​បាន​កាត់​បន្ថយ​នៅ​ទេ តែ​ថែម​ទាំង​មិន​បង្ក្រាប​ទៀត​ផង។

ថ្នាក់ដឹក​នាំ​របស់​លោក​ ព្រិន​សាវិន ឬរាជរដ្ឋាភិបាល​ល្មម​ដះទឿន​ក្រើន​រំលឹកដល់​លោក នាយខណ្ឌ​ជល​ផល​ខេត្តសៀមរាប​ផង កុំ​អោយ​គាត់​ភ្លេច​ភ្លាំង​គាំង​ដៃគាំង​ជើង​បែបនេះបន្តទៅ​ទៀត៕