លោក កែវវ័យ ប្រធានមន្ទីរធនធានទឹកខេត្តពោធិ៍សាត់ព្យាយាមបិទបាំងអំពើពុករលួយរបស់ខ្លួនបើទោះជាមន្រ្តីថ្នាក់ក្រោមចោទប្រកាន់ក៏ដោយ

ការ​ប្រ​ព្រឹត្តិអំពើពុករលួយ​របស់​លោក កែវ វ័យ ប្រធាន​មន្ទីរ​ធនធានទឹក​និង​ឧតុនិយម​ខេត្តពោធិ៍សាត់​ត្រូវបាន​មន្ត្រីក្រោមឱវាទ​លាតត្រដាង​ជា​សាធារណៈ ហើយ​ជំរុញ​ឲ្យ​ក្រសួង​ធនធានទឹក ​និង​អង្គភាព​ប្រឆាំង​អំពើពុករលួយ​ចាត់វិធានការ​ទប់ស្កាត់​ជា​បន្ទាន់​ ជាស​វៀង​យប់​យូរសុបិន្ត​ច្រើន​។

ក្រោយពេល​ទទួលរង​នូវ​ការរិះគន់​យ៉ាងខ្លាំង​ក្លា​រួចមក​លោក កែវ វ័យ បាន​ព្យាយាម​បដិសេធ​ដោយ​អះអាងថា​ខ្លួន​មិនបាន​ឃុបឃិត​គ្នា​ប្រព្រឹត្ត​អំពើពុករលួយ​កេងប្រវ័ញ្ច​ថវិកាជាតិ​ស្រេច​តែ​អំពើ​ចិត្ត​នោះទេ​។ ការព្យាយាម​បិទបាំង​អំពើអាក្រក់​របស់ខ្លួន​បែបនេះ ត្រូវបាន​ក្រុមមន្ត្រី​នៃ​មន្ទីរ​ធនធានទឹក​និង​ឧតុនិយម​ខេត្ត​លើកទ្បើង​ថា អង្គភាព​ប្រ​ឆាំង​អំពើពុករលួយ និង​លោក ម៉ៅ ធនិន ដែលជា​អភិបាលខេត្ត​ពោធិ៍សាត់​ត្រូវ​ស៊ើបអង្កេត​ឲ្យ​បានច្បាស់លាស់ ដើម្បី​ចាត់វិធានការ​តាមផ្លូវ​ច្បាប់​។​

លោក កែវ វ័យ ប្រធាន​មន្ទីរ​ធនធានទឹក​និង​ឧតុនិយម​ខេត្តពោធិ៍សាត់​ត្រូវគេ​រាយការណ៍​ថា​បាន​ឃុបឃិត​ជាមួយ​បក្ខពួក​ក្រោម​ឱវាទ​មួយ​ក្តាប់​តូច កេងប្រវ័ញ្ច​ថវិកា​ស្ទើ​គ្រប់ជំពូក​នៅក្នុង​មន្ទីរ ក៏ដូចជា​គម្រោង​ផ្សេងៗ​ដោយ​គ្មាន​ខ្លាចក្រែង​អ្វី​ទាំងអស់​។ កន្លងមក​គេ​ធ្លាប់​ឃើញ​ក្រុមអធិ​ការកិច្ច​នៃ​ក្រសួង​ធនធានទឹក​និង​ឧតុនិយម​ចុះទៅពិនិត្យ​ជា​បន្តបន្ទាប់ ប៉ុន្តែ​ក្រុមមន្ត្រី​សវនកម្ម​ទាំងនោះ​ត្រូវ​ថ្នាំ​សណ្តំ​របស់លោក កែវ វ័យ ហើយ​រក​មិនឃើញ​អំពើពុករលួយ​យ៉ាង​ពេញបន្ទុក​នោះទេ​។  អាច​និយាយបានថា​ក្រុមមន្ត្រី​អធិការកិច្ច​ទាំងនោះ​ទៅពិនិត្យ​មើល​លុយ​របស់​ប្រធាន​មន្ទីរ​ធនធានទឹក​និង​ឧតុនិយម​ខេត្តពោធិ៍សាត់ មិនមែន​ទៅ​ស៊ើបអង្កេត​អំពើពុករលួយ​ដើម្បី​ចាត់វិធានការ​ទ្បើ​យ​។

​អំពើពុករលួយ​របស់​លោក កែវ វ័យ ត្រូវបាន​គេ​ដឹងថា​មានការ​ឃុបឃិត​ជា​ប្រព័ន្ធ​តាំង​ពីលើ​រហូតដល់​ក្រោម ហើយ​ការប្រែប្រួល​ជីវភាព​ដ៏​ឆាប់រហ័ស​របស់លោក កែវ វ័យ ត្រូវបាន​គេ​សង្ស័យ​ទាក់ទង​ទៅនឹង​អំពើពុករលួយ​។ មន្ត្រីរាជការ​នៃ​មន្ទីរ​ធនធានទឹក​និង​ឧតុនិយម​ខេត្ត ពោធិ៍សាត់​បាន​អំពាវនាវ​ឲ្យ​លោក ម៉ៅ ធនិន អភិបាលខេត្ត​ពោធិ៍សាត់​និង​លោក ឱម យ៉ិនទៀង ប្រធាន​អង្គភាព​ប្រឆាំង​អំពើពុករលួយ​ស៊ើបអង្កេត​ឲ្យ​បានច្បាស់លាស់​រាល់​ភាពមិនប្រក្រតី​ដែល​លោក កែវ វ័យ ប្រព្រឹត្ត​។ ដោយហេតុថា ក្រុមអធិការកិច្ច​ក្រសួង​ធនធានទឹក​និង​ឧតុនិយម​មិនអាច​រកឃើញ​អំពើពុករលួយ​របស់លោក កែវ វ័យ ទេព្រោះ​លុយ​បាន​បាំង​ភ្នែក​ពួកគេ​ជិត​អស់​ទៅហើយ​។

យើង​ពុំ​ទាន់​អាច​សុំ​ការ​បកស្រាយ​ពី​លោក កែវ វ័យ បាន​ទេ​ព្រោះ មិន​មាន​លេខ​ទូរ​ស័ព្ទ​សំ​រាប់​ធ្វើ​ការ​ទំនាក់​ទំ​នង៕