លោក សៅ សុគន់ និងលោកស្រី ឆេង ឈត់ ត្រូវបានគេចោទថា ក្លែងឯកសារយកដីគេ

លោក ផន ផាន់ណា តំណាងឱ្យជណនរងគ្រោះពីរនាក់ម្នាក់ឈ្មោះ យិន វិទ្ធី ភេទប្រុស និងម្នាក់ទៀតឈ្មោះ ឡាម មករា ភេទស្រី សញ្ជាតិខ្មែរ បានប្រាប់អ្នកយកព័ត៌មានយើងថា ឈ្មោះ សៅ សុគន់ និងភរិយាឈ្មោះ ឆេង ឈត់ ជាលក់ថ្នាំពេទ្យ នៅក្រុងសៀមរាប បានកែតួលេខក្នុងប្លង់ដីរំលោភយកដីជនរងគ្រោះចំនួន ១២៣០០ម៉ែត្រការ៉េ ស្ថិតនៅភូមិថ្នល់ថ្មី ឃុំអន្លង់វែង ស្រុកអន្លង់វែង ខេត្តឧត្តរមានជ័យ។

លោក ផន ផាន់ណា ឱ្យដឹងទៀតថា ដីខាងលើនេះម្ចាស់ដីបានទិញតាំងតែពីឆ្នាំ ២០០៩ ដែលមានពាក្យស្នើសុំកាន់កាប់ប្រើប្រាសដីធ្លីលេខ ០០២/០៩ ចុះថ្ងៃទី០១ ខែមករា ឆ្នាំ២០០៩ ដោយលោក ហង្ស សាត អតីតមាឃុំអន្លង់វែង។

នៅពេលថ្មីៗនេះក្រុមការងារភូមិបាលស្រុកអន្លង់វែង បានចុះវាស់វែងជូនប្រជាពលរដ្ឋជាប្រព័ន្ធ ស្រាប់តែឈ្មោះ សៅ សុគន់ និងឈ្មោះ ឆេង ឈត់ វាស់ចូលដីខាងលើចំនួន ១២៣០០ម៉ែត្រការ៉េ ថែមទាំងលួចកែតួលេខលើកឯកសារ ពាក្យស្នើសុំកាន់កាប់ប្រើប្រាសដីធ្លី របស់ខ្លួន ដើម្បីបង្កើតចំនួនម៉ែត្រការ៉េថែមទៀតផង។

លោក ផន ផាន់ណា តំណាងឱ្យជនរងគ្រោះ ស្នើសុំទៅលោក អភិបាលស្រុកអន្លង់វែង មេត្តាជួយផ្តល់យុត្តិធម៌ជូនពួកគាត់ផង ព្រោះលោក សៅ សុគន់ និងភិរិយាឈ្នោះ ឆេង ឈត់ ខាំមិនព្រមលេងទេ ដោះស្រាយនៅសាសាឃុំមិនបានសម្រេចទេ។

អ្នកយកព័ត៌មានយើងពុំទាន់អាចសុំការបកស្រាយពីលោក សៅ សុគន់ និងលោកស្រុ ឆេង ឈត់ បានទេព្រោះគ្មានលេខទូរស័ព្ទសម្រាប់ទំនាក់ទំនង។ អង្គភាពព័ត៌មានយើងរងចាំការបកស្រាយពីលោក សៅ សុគន់ និងលោកស្រី ឆេង ឈត់ រាល់ម៉ោងធ្វើការ តាមរយៈលេខទូរស័ន្ទ 097 93 30 300/ 012 70 39 14។ ដោយៈ ផ្លុង រ៉េត