ពលរដ្ឋ​ខេត្តសៀម​រាប​ត្អូញត្អែថាខ្វះទឹកស្អាតប្រើប្រាស

ប្រភពពីបងប្អូនប្រជាពលរដ្ឋជាច្រើនគ្រួសារដែលមានលំនៅឋានក្នុងក្រុងសៀមរាប ខេត្តសៀមរាប បានឲ្យដឹងដូចៗគ្នាថាសព្វថ្ងៃនេះពួកគាត់មានការក្តៅ ក្រហាយយ៉ាងខ្លាំង​ចំពោះទង្វើរបស់​ក្រុមមន្រ្តីនៃ​ស្ថាប័នរដ្ឋា​ករទឹកស្វយ័តដោយ​ហេតុថាសព្វថ្ងៃនេះ​ប្រជាពល​រដ្ឋមិន​ទាន់ត្រូវបាន​គេតបណ្តាញ​ទឹក​ស្អាតឲ្យ​ប្រើប្រាស់​គ្រប់គ្រាន់​នោះឡើយ។

ប្រជាពលរដ្ឋលើកឡើងថាភាពយឺតយ៉ាវក្នុងការតបណ្តាញទឹកស្អាតដែលធ្វើឲ្យប្រជាពលរដ្ឋមានការធុញទ្រាំនេះក៏ដោយសារតែមន្រ្តីរដ្ឋាករទឹកស្វយ័តឆ្លៀតឪកាស ប្រមូលលុយពីការតបណ្តាញទឹកពោលគឺតឲ្យចំពោះតែផ្ទះអ្នកមាន ប៉ុណ្ណោះ។ ប្រជាពលរដ្ឋបាននិយាយថាពួកគាត់បានទៅសុំពាក្សនៅអង្គភាពរដ្ឋាករស្វយ័តសៀមរាប ក្នុងគោលបំណងដើម្បីតបណ្ដាញទឹកស្អាតប្រើប្រាស់នឹងគេក៏ប៉ុន្តែរហូតមកដល់ពេលនេះអស់រយៈពេលជិត២ឆ្នាំមកហើយនៅមិនទាន់បានទឹកស្អាតប្រើប្រាស់ទៀត។

បើតាមប្រភពព័ត៌មានពីប្រជាពលរដ្ឋរស់នៅម្តុំផ្សារដើមក្រឡាញ់ក៏ដូចជាផ្សារលើធំថ្មីបានបញ្ជាក់ទាំងបញ្ចេញកំហឹងដូចៗគ្នាថានៅក្បែរផ្ទះពួកគាត់មានពលរដ្ឋអ្នកមានលុយ មួយចំនួនបានស្នើសុំតបណ្ដាញទឹក ស្អាតប្រើប្រាស់ ដូចគាត់ដែរហើយយ៉ាងយូររយៈពេលតែ៥ទៅ ៧ថ្ងៃប៉ុណ្ណោះពួកគេនិងបានទឹកស្អាតប្រើប្រាស់ភ្លាមព្រោះពួកគេបាន ចំណាយលុយចាប់ពី១៥០ដុល្លារទៅ៥០០ដុល្លារទៅឲ្យភ្នាក់ងារតបណ្តាញ។

ក្នុងនោះដែរក៏មានផ្ទះវីឡានិងបុរីក៏ដូចជាសណ្ឋាគារមួយចំនួនបានចំណាយលុយរហូតដល់ទៅ១០០០ដុល្លារឯណោះ ដោយមិនចាំបាច់ទៅសុំដាក់ពាក្យដូចប្រជាពលរដ្ឋ ដទៃទៀតឡើយពោលគឺគ្រាន់តែទូរ ស័ព្ទ ប្រាប់ដល់មន្រ្តីរដ្ឋាករទឹក ទៅគេនិងចុះមកតបណ្តាញទឹកឲ្យបានប្រើប្រាស់យ៉ាងឆាប់បំផុត ។

ពាក់ព័ន្ធទៅនឹងបញ្ហាដែលធ្វើឲ្យប្រជាពលរដ្ឋមួយចំនួនធំរស់នៅក្នុងក្រុងសៀមរាបមានការខឹងសម្បារប៉ុន្តែមិនដឹងថាទៅយំស្រែកប្រាប់អ្នកណានោះ កាលពីពេលកន្លងទៅ មន្រ្តីការិយាល័យទំនាក់ទំនងអតិថិជនគឺលោកថាប់សារ៉ាធ្លាប់បានឆ្លើយបដិសេធចំពោះសំណួររបស់អ្នកយកព័ត៌មានយើងដោយលោកបានបញ្ជាក់ថាចាំសួរលោកប្រធានសិន។ប៉ុន្តែទោះបីយ៉ាងនេះក្តីរហូតមកទល់នឹងពេលនេះហាក់នៅពុំទាន់មានដំណោះស្រាយណាមួយសម្រាប់ប្រជាពលរដ្ឋនោះឡើយ ពោលគឺប្រជាពលរដ្ឋណាដែលគ្មានលុយ នៅតែមិនទាន់បានទឹកស្អាតប្រើប្រាស់ដដែល។

បើតាមប្រភពព័ត៌មានពីមន្រ្តីសាលាក្រុងសៀមរាបបានឲ្យដឹងថាបើតាមគម្រោងការតបណ្ដាញប្រព័ន្ទទឹកស្អាតនេះគឺនិងធ្វើឲ្យរួចរាល់ជាស្ថាពរនៅក្នុងខែមិថុនាឆ្នាំ២០១៣ កន្លងមកនេះ។ប៉ុន្តែគេឆ្ងល់ថារហូតមកដល់ពេលនេះហេតុអ្វីក៏គម្រោងនៃការតបណ្តាញទឹកស្អាតនេះនៅតែមិនទាន់បញ្ចប់នោះដែលជាហេតុធ្វើឲ្យប្រជាពលរដ្ឋចោទប្រកាន់ ថាក្រុមមន្រ្តីរដ្ឋាករទឹកស្អាតខេត្តសៀមរាប ឆ្លៀតឪកាសរកលុយច្រកហោប៉ៅសិន។

ទាក់ទិននឹងរឿងរ៉ាវនេះដែរសារព័ត៌មានខ្មែរ៧មករាមិនអាច ស្វែងរកការ​បំភ្លឺពីមន្រ្តីអាជ្ញាធរ​ក្រុងសៀមរាបបានទេ ។ប្រជាពលរដ្ឋក៏បាននាំគ្នាសំណូមពរដល់អជ្ញាធរខេត្ត សៀមរាប​ជាពិសេសឯកឧត្តមឃឹម ប៊ុនសុង អភិបាលនៃគណអភិបាលខេត្តសៀមរាប សូមឲ្យជួយចាត់វិធានការពន្លឿនការតបណ្តាញប្រព័ន្ធទឹកស្អាតរបស់អង្គភាពរដ្ឋាករ ទឹកស្វយ័តដើម្បីឲ្យប្រជាពលរដ្ឋបានទឹកស្អាតប្រើប្រាស់គ្រប់ៗគ្នាផង៕