បក្សប្រឆាំងប្រារព្ធខួប ថ្ងៃ២៣តុលាសន្តិភាពទីក្រុងប៉ារីស

គណបក្សប្រឆាំង ដែល​ទើប​រួបរួម​ថ្មី រវាង​គណបក្ស​សម​រង្ស៊ី និង​គណបក្ស​សិទ្ធិមនុស្ស គឺ​គណបក្ស​សង្គ្រោះ​ជាតិ នៅ​ព្រឹក​ថ្ងៃទី​២៤ ខែតុលា ឆ្នាំ​២០១២ បាន​រៀបចំ​ប្រារព្ធ​ពិធី​អបអរសាទរ ខួប​ឆ្នាំ​ទី​២១ នៃ​កិច្ចព្រមព្រៀង​សន្តិភាព ទីក្រុង​ប៉ារីស ថ្ងៃទី​២៣ ខែតុលា ឆ្នាំ​១៩៩១-​ថ្ងៃទី​២៣ ខែតុលា ឆ្នាំ​២០១២​។​

ពិធី​អបអរសាទរ ខួប​ថ្ងៃ​ចុះ​កិច្ចព្រមព្រៀង​សន្តិភាព ទីក្រុង​ប៉ារីស បាន​ធ្វើឡើង នៅ​ថ្ងៃ​ពុធ ទី​២៤ ខែតុលា ឆ្នាំ​២០១២ វេលា​ម៉ោង ៨ ព្រឹក នៅ​ទីស្នាក់ការ​កណ្តាល​គណបក្ស​សមរង្ស៊ី ស្ថិតនៅ​ផ្ទះ​លេខ ៥៧៦ ផ្លូវជាតិ​លេខ​២ សង្កាត់​ចាក់អង្រែលើ ខណ្ឌមានជ័យ រាជធានី​ភ្នំពេញ​។​

សេចក្តីជូនដំណឹង បាន​លើកឡើង​ថា កិច្ចព្រមព្រៀង​សន្តិភាព​ទីក្រុង​ប៉ារីស ថ្ងៃ​២៣​តុលា ឆ្នាំ​១៩៩១ បាន​នាំមក​នូវ​ប្រជាធិបតេយ្យ សន្តិភាព ការឯកភាព និង​បង្រួបបង្រួម​ជាតិ ព្រម​ទាំង​សេដ្ឋកិច្ច​ទីផ្សារសេរី សម្រាប់​លើក​តំកើង​ជីវភាព​ប្រជា​ពលរដ្ឋ​ខ្មែរ​។

ក៏​ប៉ុន្តែ​បើ​តាម​សម្តេច​នាយ​រកដ្ឋមន្ត្រី ហ៊ុន សែន សន្តិភាព​ពេញលេញ​របស់​កម្ពុជា កើត​មាន​តាមរយៈ​នយោបាយ​ឈ្នះ​ឈ្នះ​របស់​សម្តេច ដែល​បាន​បញ្ចប់​ទាំងស្រុង​នូវ​សង្គ្រាមស៊ីវិល គឺ​ការរំលាយចោល​នូវ​អង្គការ​ចាត់តាំង​ក្រុមខ្មែរក្រហម នា​ឆ្នាំ​១៩៩៨ ដោយ​គ្មាន​ការ​បង្ហូត​ឈាម​។​

ប្រទេស​ជា​ហត្ថលេខី​ចំនួន ១៨ នោះ រួមមាន​៖ ប្រទេស​ជា​សមាជិក​អចិន្ត្រៃយ៍​របស់​ក្រុមប្រឹក្សាសន្តិសុខ អ​.​ស​.​ប​. ( ៥ ប្រទេស ) គឺ អាមេរិក​, អង់គ្លេស​, បារាំង ( សហប្រធាន​សន្និសីទ ), ចិន និង​សហភាពសូវៀត រួម​ទាំង​ប្រទេស​នៅ​អាស៊ី​អាគ្នេយ៍ ( ៨ ប្រទេស ) គឺ​ឥណ្ឌូនេស៊ី ( សហប្រធាន​សន្និសីទ ), វៀតណាម​, ឡាវ​, ថៃ​, សឹង្ហ​បុរី​, ម៉ាឡេស៊ី​, ហ្វីលីពីន និង​ប្រ៊ុយណេ​។ ក្នុងនោះ ក៏​មាន​ប្រទេស​យូ​ហ្គោ​ស្លា​វី ( ពេលនោះ ជា​ប្រធាន​ក្រុម​ប្រទេស មិន​ចូល​បក្សសម្ព័ន្ធ ) និង​ប្រទេស ៤ ផ្សេងទៀត គឺ ឥណ្ឌា​, ជប៉ុន​, កាណាដា និង​អូស្ត្រាលី​៕