អារីណាក្លឹប​ជា​ទី​តាំង​សម្រាប់ក្រុម​ក្មេង​ទំនើងបើក​ឆាក​ប្រ​យុទ្ធគ្នាជា​រៀង​រាល់យប់

ករណីអារីណាក្លិបដែលស្ថិតនៅតាមបណ្តោយផ្លូវលេខ១០៣ សង្កាត់ផ្សារដើមថ្កូវ ខណ្ឌចំការមន ប្រជាពលរដ្ឋដែលរស់នៅជិតខាងធ្លាប់នាំគ្នាផ្តិតមេដៃប្តឹងជាញឹកញាប់ រួចហើយ ដល់អាជ្ញាធរ និងសមត្ថកិច្ចមូលដ្ឋាន ខណៈដែលក្លិបអារីណាបង្កផលប៉ះពាល់ដល់ការទទួលទាន ដំណេករបស់ពួកគាត់ លើករណីវាយតប់គ្នាពីក្រុមក្មេងទំនើងកើតមានមិនលស់ថ្ងៃនោះ ។ ប៉ុន្តែជា លទ្ធផលបើទោះជាមានការប្តឹងពីប្រជាពលរដ្ឋ ក៏ក្លិបកកម្សាន្តនេះនៅតែដំណើរការបានដដែល។

ជាក់ស្តែងកាលពីវេលាម៉ោង១០និង៣០នាទីយប់ ថ្ងៃទី១៩ ខែសីហា ឆ្នាំ២០១២ អារីណាក្លិប បានក្លាយទៅជាទីតាំងដែលក្រុមក្មេងទំនើងបើកឆាកប្រយុទ្ធគ្នាដូច សព្វមួយដងសារជាថ្មីទៀត ដោយគូជម្លោះ ពីរក្រុមមានគ្នាវាយតប់គ្នាក្នុងក្លិបមិនអស់ចិត្ត ក៏នាំគ្នាមកសាកកម្លាំងមុខក្លិប បន្ទាប់ពីមានសន្តិសុខ និងនគរបាលមូលដ្ឋានឈរមើលប្រៀបដូចជាអាជ្ញាកណ្តាលនោះ។

សាក្សីដែលបានឃើញហេតុការណ៍នេះនិយាយថា គូជម្លោះពីរក្រុមដែលមួយក្រុមមានគ្នាប្រមាណជា ១០នាក់ បើកឆាកវាយតប់បង្ករបួសស្នាមដូចជាក្នុងរឿងកុន និងមានរយៈពេលជិតកន្លះម៉ោង ប៉ុន្តែសន្តិ សុខ និងនគរបាលមូលដ្ឋានដែលមានវត្តមាននៅទីនោះមិនដឹងជាពួកគាត់ដើរតួជា អាជ្ញាកណ្តាល ឬខ្លាចរអារចំពោះក្រុមក្មេងទំនើងបើកឆាកប្រយុទ្ធគ្នានោះ ឬមួយយ៉ាងណា បែរជានាំគ្នាឈរមើលការ វាយទាត់ធាក់គ្នាស្ទើរតែមិនចោលក្រសែភ្នែកទៅវិញ។

ប្រជាពលរដ្ឋដែលជាអ្នករស់នៅជិតខាងបានបង្ហាញពីការខ្លាចរអារ ជាទីបំផុតលើបញ្ហាសន្តិសុខដែលទីតាំងនេះមានការវាយតប់គ្នា ហើយក្រុមក្មេងទំនើងមួយចំនួនសុទ្ធតែមានកាំភ្លើង បំពងសំឡេងរំខានដល់ការទទួលទានដំណេកស្ទើររាល់យប់ ប៉ុន្តែអាជ្ញាធរ និងសមត្ថកិច្ចមូលដ្ឋានមិនអើពើរ ដូច្នេះការវាយតប់គ្នាដែលកើតឡើងជាញឹកញាប់ដ៏អនាធិបតេយ្យ ប្រសេកប្រសាចពេញក្លិប និងមុខក្លិបអារីណានេះ មិនដឹងថា អាជ្ញាធរមានវិធានការបែបណាទេ បើបើកអាជីវកម្មចាប់ពីម៉ោង៦និង៣០នាទីល្ងាច រហូតដល់ម៉ោង៣និង៣០នាទីរំលងអធ្រាត្រឃើញតែរូបភាពនៃឆាកប្រយុទ្ធ គ្នារបស់ក្មេងទំនើង ប៉ុន្តែអាជ្ញាធរមិនចាត់ការ ទើបប្រជាពលរដ្ឋដែលធ្លាប់ផ្តិតមេដៃប្តឹងពីក្លិបអារីណានេះនិយាយ គ្រប់ៗគ្នា ថា«ឯណាទៅ ការអនុវត្តគោលនយោបាយភូមិ ឃុំមានសុវត្ថិភាពនោះ»៕