ខេត្តសៀមរាប៖ សមត្ថកិច្ចចម្រុះបានបង្ក្រាបគោយន្តកន្រៃពីរគ្រឿងដឹកឈើល្មើសច្បាប់ប្រហែល ៤មែត្រគូប ដែលឆ្លងកាត់មកពីខេត្តព្រះវិហារចូលមកតាមព្រំប្រទល់ស្រុកស្វាយលើខេត្តសៀមរាប។
ហេតុការបង្រ្កាបនេះ បានធ្វើឡើង កាលពីថ្ងៃទី១៨ ខែសីហា ឆ្នាំ២០២១ នៅវេលាម៉ោង ៥និហ៣០នាទីព្រឹក ត្រង់ចំណុចភូមិត្រពាំងស្វាយ ឃុំស្វាយលើ ស្រុកស្វាយលើ ខេត្តសៀមរាប ។
លោក ម៉ែន វុទ្ធី នាយសង្កាត់រដ្ឌបាលព្រៃឈើស្រុកស្វាយលើ បានឲ្យដឹងថា ចំពោះឈើមួយគោយន្តបានប្រគល់ឲ្យទៅម្ចាស់វិញ ដោយឡែកមួយគោយន្តទៀត ត្រូវយកទៅរក្សាទុកនៅសង្កាត់រដ្ឌបាលព្រៃឈើស្រុកស្វាយលើ។
បើយោងតាមប្រភពបានបង្ហើបឲ្យដឹងថា ម្ចាស់ឈើឈ្មោះ សិទ្ធ និងឈ្មោះ វង ជាអ្នកដឹកជញ្ជូនឈើយ៉ាងសកម្មមិនដែលខ្លាចញញើតសមត្ថកិច្ចនឹងជំនាញខាងណាឡើយ គឺគេមានខ្នងបង្អែកនៅពីក្រោយយ៉ាងក្រាស។ បច្ចុប្បន្ន វត្ថុតាងត្រូវបានយកមករក្សាទុកនៅសង្កាត់រដ្ឌបាលស្រុកស្វាយលើខេត្តសៀមរាបដើម្បីកសាងសំនុំរឿងទៅតាមច្បាប់ស្តីពីព្រៃឈើ ។
ទោះបីជាយ៉ាងណាក៏ដោយ ជុំវិញករណីការបង្ក្រាបគោយន្តដឹកឈើនេះ ពលរដ្ឋមានការសាទរយ៉ាងខ្លាំងចំពោះនគរបាលប្រឆាំងបទល្មើសសេដ្ឌកិច្ចខេត្តសៀមរាបដែលបានបង្រ្កាបបទល្មើសទាន់ពេលវេលា៕
