17/06/2021
ប្រភពពីប្រជាពលរដ្ឋក្នុងឃុំកន្ទួត ស្រុកចិត្របុរី ខេត្តក្រចេះ បានឲ្យដឹងថា ចាប់តាំងពីថ្ងៃទី០១ ខែមិថុនា ឆ្នាំ២០២១ រហូតមកដល់ពេលនេះឈ្មួញជាច្រើននាក់ធ្វើសកម្មភាពដឹកជញ្ជូនឈើយ៉ាងពេញបន្ទុកគ្មានញញើតអ្វីទាំងអស់។ ប្រភពបានឲ្យដឹងទៀតថា ក្នុងចំណោមឈ្មួញដែលធ្វើសកម្មភាពដឹកជញ្ជូនឈើខ្លាំងក្លាជាងគេគឺឈ្មួញឈ្មោះ ដុំ ដែលមានខ្នងបង្អែករឹងមាំ។ ឈ្មួញឈ្មោះ ដុំ ប្រើប្រាស់គោយន្តធំៗដែលអាចផ្ទុកឈើបានច្រើនម៉ែត្រគូប ឆ្លងកាត់ឃុំកន្ទួត ស្រុកចិត្របុរី ទៅដល់គោលដៅយ៉ាងរលូនព្រោះមានលោក ចាន់ ធី អធិការរងនគរបាលស្រុកចិត្របុរី ជាអ្នកនៅពីក្រោយខ្នង។
ប្រភពដែលស្និទ្ធនឹងឈ្មួញឈ្មោះ ដុំ បានឲ្យដឹងថា ឈ្មួញម្នាក់នេះចេះបែងចែកផលប្រយោជន៍ដល់មន្រ្តីជំនាញនិងសមត្ថកិច្ចពាក់ព័ន្ធជាច្រើនស្ថាប័នក្នុងស្រុកចិត្របុរី ទើបអាចដឹកជញ្ជូនឈើនិងដឹកជញ្ជូនធ្យូងចេញពីឃុំកន្ទួត យ៉ាងគគ្រឹកគគ្រេង។ សូម្បីតែលោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ និងលោក វ៉ា ថន អភិបាលខេត្តក្រចេះ ក៏រក្សាភាពស្ងៀមស្ងាត់ផងដែរ។ ហេតុនេះហើយទើបមានការរិះគន់ថា បទបញ្ជារបស់លោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ ក្នុងការបង្ក្រាបបទល្មើសព្រៃឈើក្នុងខេត្តក្រចេះ ក្លាយទៅជារឿងឥតន័យព្រោះសមត្ថកិច្ចអាវុធហត្ថស្រុកចិត្របុរី បណ្តោយឲ្យឈ្មួញឈ្មោះ ដុំ និងឈ្មួញច្រើននាក់ទៀត ដឹកជញ្ជូនឈើដឹកជញ្ជូនធ្យូង ចេញពីស្រុកចិត្របុរី យ៉ាងពេញបន្ទុក។
តាមការកត់សម្គាល់របស់ប្រជាពលរដ្ឋក្នុងឃុំកន្ទួត បានឲ្យដឹងថា កន្លងមកមន្រ្តីជំនាញនិងសមត្ថកិច្ចពាក់ព័ន្ធក្នុងស្រុកចិត្របុរី បង្ក្រាបតែឈ្មួញដែលមិនបង់លុយតាមការកំណត់ប៉ុណ្ណោះ។ សម្រាប់ឈ្មួញដែលចេះបែងចែកផលប្រយោជន៍គឺអាចដឹកជញ្ជូនឈើចេញពីតំបន់ដែនជម្រកសត្វព្រៃភ្នំព្រេចនិងពីតំបន់ផ្សេងៗ ឆ្លងកាត់ស្រុកចិត្របុរី ទៅដល់គោលដៅយ៉ាងសុខស្រួល។ ហេតុនេះហើយទើបមានសេចក្តីអំពាវនាវឲ្យថ្នាក់ដឹកនាំគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិចាត់វិធានការបង្រ្កាបបទល្មើសព្រៃឈើក្នុងស្រុកចិត្របុរី ជាបន្ទាន់ព្រោះលោក សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ និងលោក វ៉ា ថន អភិបាលខេត្តក្រចេះ មិនចាត់វិធានការបង្រ្កាបបទល្មើសព្រៃឈើ។មានត
ប្រភព៖ ខ្មែរ អនឡាញ
.jpg)
.jpg)
