ប្រជាពលរដ្ឋជាង៦៦០គ្រួសារ នៅសង្កាត់ជ្រាវទឹកភ្នែករហេករហាមព្រោះតែអាជ្ញាធរអប្សរា

ក្រុម​ប្រជាពលរដ្ឋជាង៦០០គ្រួសារ នៅសង្កាត់ជ្រាវ ក្រុងសៀមរាប យំសោក​បោកខ្លួន ព្រួយ​បារម្ភខ្លាច​បាត់​បង់​ដី​លំនៅឋាន និង​ដី​បង្ក​ប​ង្កើនផល ដោយសារអាជ្ញាធរ​ជាតិ​អប្សរា​នៅ​ពេល​ថ្មីៗនេះបាន​យកតំបន់មួយចំនួន នៅ​សង្កាត់​​នេះ ដាក់ចូល​ជាតំបន់​​​គ្រប់គ្រងដោយអាជ្ញាធរជាតិអប្សរា ដែល​ពលរដ្ឋ​ខេត្ត​សៀម​រាប​​ស្អប់ខ្ពើមបំផុត។

ទុកសោក​របស់ពលរដ្ឋ​សង្កាត់ជ្រាវនេះ បានកើតឡើងបន្ទាប់ពីអាជ្ញាធរជាតិអប្សរា បានបិទផ្សាយផែនទីចាប់​ពីចំណុច ត្រពាំង​អូរ និង​ដីទួល​ប្រា​សាទបុរាណនៅក្នុងសង្កាត់ជ្រាវ ​ក្រុងសៀមរាប កាលពីថ្ងៃទី៣០ ខែធ្នូ ឆ្នាំ២០១៥កន្លងទៅថ្មីៗនេះ។

លោក សំ សុខា ពលរដ្ឋនៅភូមិរំចេក សង្កាត់ជ្រាវ ក្រុងសៀមរាប បាន​ថ្លែងនៅថ្ងៃនេះថា ​ការដាក់ឲ្យ​មាន​តំ​បន់​អាជ្ញា​ធរ​ជាតិ​អប្សរានោះ លោកថា ធ្វើឲ្យប៉ះពាល់ដល់ការរស់នៅរបស់ពួកគាត់ ដូចជាការសង់​លំនៅ​ឋាន និងការ​បង្កប​ង្កើនផលកសិកម្ម​ជាដើម។ លោក​បន្ដថា​ ​​ដីធ្លីពួកគាត់មួយចំនួនបានកាន់កាប់តាំងពីដូនតា រាប់​រយ​ឆ្នាំណាស់មកហើយ និងខ្លះ​ទៀត​បានទិញ​តគ្នា​ដើម្បីតាំងទីលំនៅស្ថាន ប៉ុន្ដែឥឡូវ​បែ​ជា ​អា​ជ្ញាធរ​ជាតិ​អប្សរា មក​ប្រកាសថា ជាតំបន់ដែលខ្លួន​គ្រប់គ្រង​ទៅវិញ។

​បុរស​វ័យ​​៧០ឆ្នាំរូបនោះ ខកចិត្ដចំពោះ​រដ្ឋាភិ​បាល​ដែលយកកន្លែងរស់នៅដ៏​សុខ​សាន្តរបស់​ពួក​គាត់ជាច្រើន​ឆ្នាំមក​នោះ​ឲ្យទៅ​​ស្ថា​ប័ន​អប្សរា​គ្រប់​គ្រង​ទៅវិញ​ ដែល​អាចប្រឈមបាត់បង់ដីនៅពេលខាងមុខ។ ​លោក​​តា ​បានមានប្រ​សាសន៍ទៀតថា អាយុ៧០​ឆ្នាំ​ទៅ​ហើយ​ទើប​បាន​ដី​មួយ​ឡូសំរាប់​រស់នៅ ​ឥ​ឡូវ​គេ​ថា​អប្សរា​ទៀត​ហើយ​​តំ​បន់​អប្សរា​គឺ​គេ​​ហាម​​មិន​​អោយធ្វើ​អីទេ​​ មិន​ឲ្យ​លក់​ មិន​អោយ​សាង​សង់​សូម្បីបង្គន់អាចម៌ ។

ពាក់ព័ន្ធនិងករណីខាងលើនេះ ពលរដ្ឋនៅភូមិក្រសាំងបាន​​ឲ្យ​ដឹង​ស្រ​ដៀងគ្នាថា​ ពួក​គាត់​រស់​នៅ​ក្នុង​សង្កាត់​ជ្រាវ​​នោះ​​មិនដឹងថាជាតំបន់អាជ្ញាធរជាតិអប្សរាកើតឡើងនៅពេលណានោះទេ ប៉ុន្ឌែអ្នកភូមិបន្ដថា ​នៅពេលមន្ទីរ​សុរិយោ​ដី​បិទ​​ប្រកាសក្បាលដីនៅសង្កាត់ជ្រាវនេះ ​ទើបពួកគាត់ភ្ញាក់ផ្លើល ដោយ​ឃើញ​មានគំនូស​កំណត់ដីរបស់​អាជ្ញាធរជាតិ​អប្ស​រាគ្រប់គ្រងមួយចំនួន។

លោក ក្អោបរ៉ន ចៅសង្កាត់ជ្រាវ ក្រុងសៀមរាប សម្ដែងការអាក់អន់ចិត្ដចំពោះករណីនេះ ដោយ​លោក​​មានប្រសាសន៍​ថា លោកទើបដឹងថា មានពីតំបន់អាជ្ញាធរជាតិអប្សរា​នៅថ្ងៃទី៣០ ខែធ្នូឆ្នាំ២០១៥​ នេះឯង។ លោកបន្ដថា មកដល់ថ្ងៃទី៧ ខែមករានេះលោកទទួលពាក្យបណ្ដឹងពីពលរដ្ឋដែលរងផលប៉ះពាល់​ចំនួន​៦៦​៣​ក្បាលដី។ លោកទទួលថា ទីនោះមានត្រពាំង ទីទួលប្រាសាទ ប៉ុន្តែពលរដ្ឋមិនដែលប៉ះពាល់​ដល់វត្ថុមាន​តម្លៃ​នោះ​ទេ។

ករណីនេះ អ្នកនាំពាក្យ អាជ្ញាធរជាតិអប្សរា លោកស្រី ចៅស៊ុនកិរិយា មានប្រសាសន៍ថា ដីនៅតំបន់​សង្កាត់ ជ្រាវ ស្ថិតនៅក្នុងតំបន់បុរីវប្បធម៌ និងទេសចរណ៍ គ្រប់គ្រងដោយអាជ្ញាធរជាតិអប្សរាតាមអនុក្រិត្យ​នៅ​ឆ្នាំ១៩៩៥។ លោកស្រីបន្ដថា អាជ្ញាធរជាតិអប្សរាបានប្រកាសបិទផ្សាយជាច្រើនឆ្នាំមកហើយ ប៉ុន្ដែពលរដ្ឋ​បានវាយកំទេចស្លាក​អប្សរាចោល។  លោកស្រី ចៅស៊ុនកិរិយា បានបន្ថែមថា តំ​បន់​ដែល​គ្រប់​គ្រង​ដោយ​អាជ្ញា​ធរ​ជាតិអប្សរា មានទំហ៊ំដី​ជាង​៤​ម៉ឺន​​ហិក​តា ប៉ុន្ដែមិនស្ថិតនៅមួយកន្លែងនោះទេ។

ប្រជាពលរដ្ឋ​នៅ​សង្កាត់​ជ្រាវ​ក្រុងសៀមរាប ស្នើសុំទៅ​រដ្ឋាភិបាល​កម្ពុជា មេត្តារំសាយ​អាជ្ញាធរ​អប្សរា​ចេញ​ពី​សង្កាក់ជ្រាវ​ទៅ ព្រោះ​នៅ​សង្កាត់​នេះមាន​តែ​កូន​ថ្លុក​ក្របី និង​ទីទួល​ដំ​បូកគ្រាន់​ចង​គោក្របីតែប៉ុណ្ណោះ វា​មិន​មាន​ប្រាសាទបុរាណធំដី ហើយ​ក៏មិន​មាន​ត្រពាំង​បុរាណអ្វីធំដំនោះដែរ បើ​មិន​ជឿសូម​រដ្ឋាភិបាល​ចុះ​មក​ពិនិត្យ​ដោយ​ខ្លួនឯងចុះ៕