ប្រជាពលរដ្ឋប្រទះឃើញសពបុរសម្នាក់អណ្តែតទឹកស្ទឹងសង្កែហើមផ្កាប់មុខមិនស្គាល់អត្តសញ្ញាណកាលពីម៉ោង៦និង២០នាទីព្រឹកថ្ងៃទី២០ ខែកក្កដា ឆ្នាំ២០១៣ នៅចំណុចក្នុងស្ទឹងសង្កែត្រើយខាងកើតក្រោមដើមអំពិលស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបងខេត្តបាត់ដំបង។
ចំណែកបុរសប្រមឹកម្នាក់ផឹកស្រាស្រវឹងបាត់ខ្លួនមួយយប់ប្រពន្ធប្រទះឃើញសពនៅក្នុងស្រះទឹកក្រោយផ្ទះសង្ស័យរអិលជើងធ្លាក់ចូលទឹកវាឡើងមិនរួចកាលពីវេលាម៉ោង១០ និង៣០នាទីព្រឹក ថ្ងៃទី១៩ ខែកក្កដា ឆ្នាំ២០១៣ នៅចំណុចភូមិបឹងសង្កែឃុំឃ្លាំងមាស ស្រុកបវេល ខេត្តបាត់ដំបង។
លោក អាត់ រីន គរបាលបច្ចេកទេសក្រុងបាត់ដំបងបានអោយដឹងថាសពបុរសម្នាក់ដែលប្រទះឃើញមានវ័យជាង៣០ឆ្នាំទំនងជាអ្នកយាមចាំចំការ សពដេកផ្កាប់មុខសក់ស្លូតមានកំពស់ប្រហែល១,៧០ម៉ែត្រសម្បុរសណ្តែកបាយមិនមានស្នាមអ្វីផ្សេង (ស្នាមវៃឬកាប់) ពាក់អាវយឺតដៃខ្លីពណ៌អាចម៌សេះមានពាក់ខោលីអូរឃ្វៀលជើងពណ៌ខ្មៅ។
លោក អាត់ រី បានបញ្ជាក់ថា កាលពីថ្ងៃទី១៨ និង១៩ ខែកក្កដា ឆ្នាំ២០១៣ ទឹកស្ទឹងសង្កែមានការជន់ហូរខ្លាំងដោយមានភ្លៀងធ្លាក់នៅតំបន់ចំការព្រៃភ្នំស្រុកលើដូច្នេះសពបុរសនេះអាចជាអ្នកចំការដែលអាចរអិលជើង ឬក៏ធ្វើដំណើរឆ្លងកាត់ទឹកត្រូវទឹកហូរគួចបោកបណ្តាលអោយស្លាប់តែម្តង។ តាំងពីព្រឹករហូតដល់ម៉ោង២រសៀលថ្ងៃទី២០ ខែកក្កដា ឆ្នាំ២០១៣ មិនទាន់អ្នកស្គាល់សាវតាសពជនរងគ្រោះនោះឡើយ ហើយពេលនេះសពជនរងគ្រោះបានយកទៅតម្កល់ទុកនៅវត្តពោធិ៍ក្នុងឋិតក្នុងភូមិកើតហេតុខាងលើ៕ដោយ មៀច បូរ៉ា ប្រភពពីខ្មែរ៧មករា